حلول عبقرية للحياة الزوجية

سمعنا و قرينا كتير عن قصص حب اسطورية مكتملتش .. ياترى لو كانت اكتملت كان هيبقى الحال إيه ؟؟؟؟ قيس اتجنن ف حب ليلى !!! ياترى لو كان اتجوزها كان ممكن يفرط فيها ؟؟؟ مستحيييييييييييل ... طب مقابر الحب بعد الجواز بنحفرها ليه ؟؟؟؟؟

قبل الجواز :

اتنين كمنجة ( جوز عصافير بتطير و تغنى ف كل حتة !!! ) دباديب و قلوب و ورد أحمر .. فسح و ضحك و زقططة .. حب و شوق و كلام معسول .. والأهم من ده كله اخلاصهم لبعض .. تمسكهم ببعض

بعد الجواز :

طاسة و حلة و رجل مقشة !!!!!!!!!!! اتنين متنحين ف وش بعض و لا كإنهم يعرفوا بعض!!!!!! زعيق و شخط و غلط !!! و كف يخبط على كف !!!!

فين اللى أنا حبيتها ؟؟؟ فين اللى أنا حبيته ؟؟؟؟ لا جواب بيريح بالهم و لا بالهم بيرتاح أصلا

طب إيه الحل ؟؟؟؟؟؟ إن الناس متتجوزش يعنى ؟؟؟ لأ طبعا

أنا هعمل فيكم خدمة ... كورس النهاردة .. إليكم حلول عبقرية للحفاظ على الحب والحياة الزوجية :

انتى : غمى عينيكى و سدى مناخيرك !!! و قولى لجوزك : انت أجمل زوج ف الدنيا !!! طلتك بالدنيا .. فداك الدنيا ... الدنيا الدنيا الدنيا !!! حبيتها و انا وياك !!!! و دى أخرة حالى معاك !!!! الله على صوابع رجليك !!!! يجننوا !!!

شخيرك يا حبيبى هو السيمفونية الجميلة اللى معرفش يلحنها بيتهوفن !!!!! الله على ريحة عرقك !!!! .. آياااااااه يا كسكيلياه !!! و لا كل برفانات الدنيا !!!! أحلى حاجة فيك عماصك !!!! احم أقصد إخلاصك !!!

********************************************************

انت : خد اسبرين مهدئ و ارزعها بكام جملة من بتوع الأفلام !!!!! انتى عمرى و حبيبتى و مليش ف الدنيا دى غيرك .. غير بس امى و بابايا و بنت خالتى و بنت الجيران !!!! انتى أملى وانتى منايا !!! يا سبب سعادتى و هنايا

الله على تسريحة شعرك و هو منكوش !!!! الله على جفاف بشرتك !!!! يا سلام على الشعر المفلفل لما يهفهف !!!! لما القمل بيعدى بين شعرك حبيبتى بسمعه بيقول آهاااااااات !!!! آآآآآه يا قلبى

صوتك زى همس الغربان ف ليلة حالكة !!!! همسك بيهز الحجر يا حبى .. الله على خنشرتك يا حياتى !!!!!!! ربنا ما يحرمنى منك .. طول الاسبوع ده

*******************************************************

انتى : كحى برقة و كإنك ما سمعتيش حاجة !!!!! و افتكرى ممثل وسيم براد بيت مثلا و لا توم كروز .. و حاولى أرجوكى حاولى تشوفى جوزك شبهه !!!! واديله جملتين حلوين كده ف جماله

يااااااه يخرب بيت جمال عينيك الخٌضر ( بس اتأكدى من لون عينين جوزك !!!!!

شعر ده و لا حرير ؟؟!!!! ( علا الله ميكونش أكرت !!! ) ربنا يخليك ليّا يا بغلى !!!!! احم أقصد يا بعلى

******************************************************

انت : ابلع ريقك جااااااامد !!! و قوللها : باحبك كلمة بقالى سنين عايز أقولهالك !!!!! كانت واقفة ف زورى !!!!!! آتشىىىى !!! الحمد لله

بحبك عدد الدقايق ف الثانية !!!!! عدد الشهور ف الساعة !!!! حتى بعد ما تموتى هتجوز طبعا و هفضل احبك يا عمرى !!!! بحبك يا حبيبتى لدرجة الجنووووون .. لدرجة انى حاسس انى داخل على تخلف عقلى !!!!!

******************************************************

انتى : حسسيه باهتمامك و حبك دايما بقى .. طبطبى على قفاه !!!!!! و ف همس العصافير صوصوى : بعد الشر يا حبيبى

بحبك ياجوزى حب البكتيريا للحشرات !!!! يا أجمل مرار .. احم احم يا أجمل قرار أخدته ف حياتى !!!!!! كان أسعد يوم ليا يوم جوازنا .. كان يوم مالوش ملامح !!!!! حبك ف قلبى جامح !!! يا روووووحى

******************************************************

انت : ابتسم و أمرك لله !!!!! افتكر القطة بتاعة الجيران .. قد إيه القطة جميلة زى صحبتها !!!! سيبك من صحبتها .. ركز ف القطة !!!!!! حاول تشوف مراتك زى القطة الوديعة !!!! يعنى نانسى و لا هيفاء أحسن من مراتك ف إيه ؟؟ هو انت كنت شفتهم ف البيت من غير مكياج وباروكة ؟؟؟

ياللا بص لمراتك ف عينيها .... و ف لحظة شوق و حنية .. أن أن آآآآآآن !!!!! اخبط قبلة على جبينها و احضنها !!!! .. و اجرى على الحوض رجّع علطول !!!!!

*****************************************************

انتى : انتهزى الفرصة انه هربان منك !!!! و حاولى تخلى جو بيتكم رومانسى ... حطى ورود ف كل حتة و متنسيش الشموع - عادى ما هو كله بفلوس حضرته !!!! و شغلى سى دى فيلم رومانسى – اسماعيل يس ف مستشفى المجانين !!! – أو حتى ميوزيك هادية – لشعبان عبد الرحيم !!! برافووووو !!! و على فكرة مفيش أحلى من الطفولة .. عيّلوا شوية !!!!! العبوا كوتشينة طاولة شطرنج ، و عموما اطمنى بكرة هتعلبوا برضه .. بوكسات و مصارعة

****************************************************

انت : لإن خنقة البيت وحشة خصوصا لما تكونوا علطول ف وش بعض !!!!! فأنت اقترح عليها تخرجوا تشموا هوا

الخروج ضرورى .. و متنساش تجيبلها عقد فـُل و انتوا راجعين.. لو مراتك مابيمشيش معاها عقد فل يبقى عقد دهب !!!! عقد ألماظ !!! كدة يعنى !!!!!

ممكن تزود فرحة الفسحة و تجيب حماتها أو حماتك !!! أو تجيبهم هما الجوز !!!! أو اكسروا الروتينية بالزيارات العائلية !!!!! بالطريقة دى هتعدوا الشلل بمراحل

****************************************************

انتى : يا سلاااااااام .. الفرصة جت لحد عندك !!!! قوليله موافقة بس مش عايزة أكلفك يا حبيبى .. احنا ممكن نتعشى وجبة كباب و جمبرى و نرجع علطول !!!!!! لو مزنقة معاك الشهر دة بلاش منها يا حياتى ... ممكن نبعت ديليفرى !!!!!!!!!

****************************************************

انت : حاول تحافظ على اتزانك !!!!! خد كبسولة ضد الصرع ف كل حوار يدور بينكم !!!!! و ف هيام و منى العشاق قوللها : ربنا رزقنى بأجمل هدية !!!!!!! اللهم لا اعتراض

كلمة أخيرة : اللى بيستمر بعد الجواز .. هو بس الحب الحقيقى حتى مهما واجهوا من عقبات حتى رغم العواصف .. اللى بيستمر هو صدقنا مع نفسنا و مع غيرنا.. الأمانة بتقول منكونش غير بوش واحد..

المشاركة و المراعاة و التفاهم أهم علاقاتنا الإنسانية (جواز أو غيره ) شاركيه همومه و أفراحه .. شاركها اهتماماتها ومشاكلها .. صلـّوا و اتعبّدوا مع بعض ..استشيروا بعض .. رخّى لما الطرف التانى يشد

اتأكد انه مفيش حياة من غير مشاكل بس فيه ناس بتكبرها و ناس بتعديها .. و ناس بتسأل عن حقوقها و ناسية واجباتها !!!! و ناس مبتراعيش و عايزة اللى يراعيها !!!! بلاش تدخلوا الأهل ف مشاكلكم على الفاضى و المليان !!!

مش عيب انك تغلط ف حق حد ( كل الناس بتغلط ) لكن العيب انك متعترفش بغلطك و متكفرش عنه ... وف الآخر الكلام ف الموضوع ده ملوش نهاية مهما الناس كتبت و قالت

**************************************************

مسك الختام : الجواز مش آخر المطاف .. و لا آخر محطة !!!! بالعكس هو البداية الحقيقية .و عشان تستمر المركب ف البحر و يكمل المشوار لازم نتعلم – و انا منكم – ازاى نحافظ على الحب بعد الجواز مهما مرت الأيام والسنين .. مهما خدشته المشاكل و الظروف

أسفة على التأخير ف الكتابة

إيمان

فنون التثبيت

طبعا زى ما انتوا عارفين فيه شباب كتير مساكين !!!!!!!!! مش بيعرفوا يثبتوا البنات !!!! غلااااااااااااااااابة !!!! أنا بقى النهارده هعلم كل شاب " كيفية تثبيت البنت " !!!!! عشان تبقوا تعرفوا تثبتونا صح !!!!!!!!! هاهاها – وش متغاظ و ابتسامة بلهاء

أولا :
تنوى النية !!!!! عشان ربنا يتقبلها منك !!!! وادعى ف ثقة : يارب وفقنى و خلينى أعرف أثبت البنت أو أى بنت !!!! عشان مطلعش عيل قدام اصحابى !!!!! آمييييييييييييييييييين

ثانيا :
مرحلة المعرفة النظرية ... تثبيت البنت بيتوقف على مدى استجابتها .. فهى تنكمش بالحرارة و تتبرر بالبرورة !!!!! بس خد ف بالك حاجة .. لانه مش كل البنات زى بعضها فالبنات 3 أنواع : يا من النوع السهل ( الماااايص ) يا من النوع الوسط ( النص نص ) يا من النوع الصعب ( الملتزم )، ده غير انه بين كل نوع و التانى درجاااااااااااااات !!!! يعنى من هنا لبكره !!! بالنسبة للنوع الأولانى : هيا متثبتة خلقة !!!!!!! مش محتاج تثبيت !!!!! أما اذا كان عينك على بنت من النوع التانى فانت هتغلب شوية !! ياللا كله ف فدا الوطن !!!!!! أما بقى اذا كان عينك على بنت من النوع التالت فانت عينك على كبيييييييير !!!! مقدرش أضمنلك بالكورس ده انك لازم هتوصلها !!! ياللا كله ببركة دعا الوالدين !!!! و انت و شطارتك بقى

ثالثا :
لازم تقعد تتمرن مع نفسك كيفية التسبيل !!!!
بحلق ف المراية !!! ظبط عيونك !!!! ارمش خفيف !!! تنح ف المراية و قوللها : يا حلاوتك يا جمالك !!!! ( حتى لو كان اللى فيها حمار !!!! ) غلط غلط !!!!! عيد تانى !!!! عايزة مصداقية !!!!! فين الحرفنة ؟؟؟؟؟؟؟؟؟؟؟

أنا بقى هقولكم فين الحرفنة عشان تبقوا تتحرفنوا علينا

رابعا :
اتمرنت الحمد لله ؟؟؟
كده نبدأ وقت الجد !!! عايزين شباب ترفع راس مصر !!!! و تمشـّى البنات على كعوب رجليها !!!! ( كانت بتمشى على صوابعها !!! ) و مايكروسوفت تختم على قفاكم ختم الجودة !!!! هذا الشاب نجح فى تثبيت البنت إياها !!! أمال ايه ؟؟؟؟؟ يا سلام بقى لو كانت البنت من النوع الملتزم تبقى الشهادة بتاعتك مضاعفة !!!! و تبقى اجتزت بمهارة كل اختبارات فنون التثبيت !!!!! و مش بعيد يجيلك منحة من برة !!!!!!! و على فكرة الشهادة دى هتبقى مطلوبة فى جهن.. فى الجنة !!!!
طبعا

خامسا :
انتقلنا لمرحلة التطبيق ... طبعا لازم ف الأول تجر أى كلام !!! قول أى كلام ف أى اتجاه !!!! شوية شوية لما الجو يلين ابدأ اتكلم عنها و امدحها !!!!! لازم يكون كلامك منمق و مترتب كويس !!!! أنصحك تحفظه و خلاص !!!!! ( انتى عسولة أوى ، بلوبيف بلوبيف !!!!! ، كنت فاكر انه القمر بيطلع بالليل بس !!! ) لأ يا ضنايا بيطلع الضهرية برضه !!!! ما عليييييييييييينا ... كده تبقى عديت المرحلة الأولى ، مستوى الجودة :
قرد صغنن

سادسا :
اذا ما نفعتش طريقة مدح الشكل استخدم الطريقة رقم 112 !!!!
ع البوليس عدل !!! و الطريقة دى بتنص على ابداء الاهتمام و زيادة جرعة الملح !!!!!!!! سورى المدح !!!! مش عايزين عك الله يخليك !!!!! اسأل عنها و اهتم باهتماماتها .. خليك معاها على طول الخط !!!!! لو دخلتم ف حوار وافقها دايما !!! اوعى تعارضها يبقى الكورس باظ و تقعد تقشر بصل !!!! ( أيوة انتى صح ، صباح الملوخية !!! ، تفكيرك تمام ، دماغك رائعة ، مسقعة باللحمة المفرومة !!! ، اسلوبك مبهر ، كابتشينووووو !!!! ) يعنى ما تركزش على الشكل بس عشان ما تزهقش !!!!! ... كده تبقى عديت المرحلة التانية ، ما شاء الله بقيت نسناااااااااااااااااااااس

سابعا :
اذا برضه مانفعوش السياستين اللى فاتوا ..
ثق انه مفيش أحلى من اللف و الدوران !!!!!!!!!! شد و ارخى زى ما انت عايز !!!! اشتغلها يعنى !!!! طلعها السما بأسانسير سريع و اخبطها ف الأرض مرة واحدة !!!!! بمعنى أدق عشان ذوى النفوس المريضة .. سورى الدقيقة !!!!! انك لازم تلففها حولين نفسها !!!! شوية حسسها انك مهتم جدااااااااا بطريقة غير معقولة و مرة واحدة ارزعها ب " أختى " !!!!!!!!!!! ... اذا اتصدمت يبقى تأكد انه انت كده عديت المرحلة التالتة ، و بقيت شمبانزى

ثامنا :
و دى المرحلة الأخيرة ...
اللى بتكون ناتج فشل الأساليب القدييييييييييييييييييمة !!!!!! اذا ما نفعش اللف و الدوران يبقى ما قدامكش غير اسلوب المواجهة !!!!! أمرك لله صارحها بالكذب !!!!!!!!!! ( أنا معجب بيكى ) .. أن أن آآآآآآآآآآآآآآآن !!! هاتفرفر أهيه !!!!! حالة صمت و اسبهلال !!!!! أيوة بالسين بقى !!!! تناحة يعقبها خجل ده اذا كان فيه دم !!!!!! ركز انت بس ف عينيها جامد !!!! اوعى تفلت منك !!!!! و بكل ثقة و هدوء تام اسألها : ها ؟؟؟!!! و توقع منها طبعا الاجابة المعروفة : ها إييييييييييييييه ؟؟؟؟؟ !!!! ثم جاوب انت بقى على السؤال يا فكيك !!!!!
بخخخخخخخخخخ الكاميرا الخفية

امال انتوا فاكرين إيه ؟؟؟؟؟؟ ده احنا نعلمكم !!!!!! أنا بس نفسى أفهم حاجة ... لما الشاب بكل ثقة بيبدى اعجابه ببنت و يسألها ببراءة : موافقة ؟؟؟؟!!!! بيبقى قصده موافقة على ايه ؟؟؟؟؟؟؟؟؟؟؟؟؟؟؟ ... موافقة انه يتسلى بيها ؟؟؟؟ و لا موافقة انه يعلقها معاه زى البيت الوقف 5 أو 7 سنين ( ده اذا ماكانش أكتر !!! ) لحد ما حضرته يكون نفسه و يقدر يتقدملها !!!! و لا موافقة انها تغش معاه أهلها !!!! و لا ده عشان يبقى فيه سماح ضمنى بإنه العلاقة بينهم تزيد !!!!! المفروض يحدد أنهو فيهم !!!! عشان سوء الظن لا سمح الله

سؤال صغنتوت

هو ايه لازمة ده كله ؟؟؟؟؟؟ هو إيه أصلا أهمية تثبيت البنات ؟؟؟؟؟ هل عشان يحس الشاب إنه مرغوب ؟؟؟؟؟ و لا إنه يكون قدام نفسه و قدام اصحابه الواد الفتك اللى مقطع السمكة و ديلها ؟؟؟؟؟!!!!!!! و لا هو تسلية و تقضية وقت و خلاص ؟؟؟؟ يا ترى لما أى شاب بيتبع سياسة التوهيم و فنون التثبيت بيراعى انه البنات كائنات ليها قلب و مشاعر ؟؟؟؟؟؟ ليه مش بنخاف على مشاعر بعضينا ؟؟؟؟؟؟؟؟؟؟؟؟؟؟؟؟؟؟؟؟؟؟؟؟

****** رمضان كريم *****
إيمان

الحب مش مخلوق للناس بس

لما بنتكلم عن الحب .. كلنا بيخطر ببالنا انه المقصود هو الحب بين اتنين و بس .. آدم و حوا ... و بنشوف علامات استفهام كتير ف عيون الناس !!!! و رغم انه الحب موجود ف حياة كل انسان بس كتير منا ما بيشوفهوش .. ليه ؟؟؟؟؟؟؟؟

عشان أكيد النضارة بايظة !!!!!!!!!! لأ بجد بقى عشان الحب ليه أشكال كتير يكفى اننا نعرفهم عشان نقدر نحب

( 1 ) –

الحب الالهى

و ده أعظم و أطهر أنواع الحب .. لما الإنسان يعبد ربنا بكل جوارحه .. لما يصلى لربنا بحب مش علشان تقضية فرض واحد اتنين تلاتة هيلاهوب !! ..لما يحب يقرا القرآن و تلاقيه بيتأثر من كل آية .. كل كلمة .. فيستبشر بآيات و يبكى بآيات بس مش لازم البكا قدام الناس يعنى !! .. لما يصوم تطوع ف عز الحر ، ف عز المرض !!! و لما .. و لما .. فاعرف انه ده بيحب ربنا و ربنا بيحبه .. "" يا أيها الذين آمنوا مَن يرتد منكم عن دينه فسيأتى الله بقومٍ يحبهم و يحبونه .. "" ...... يعنى الحب بين العبد و ربه موجود

( 2 ) –

حب النفس

و اقصد بيه حب الانسان لنفسه لكن بدون غرور .. يعنى ايه الانسان يحب نفسه ؟؟؟؟

يعنى يكون راضى عنها ، قانع ان ذاته جميلة زى ما خلقها ربنا مش بيحاول يغيرها لا بعمليات تجميل و لا ميكانيكا !! .. عارف انه فيه عيوب لازم يصلحها هيهااااات !!! .. زى ما فيه مميزات بيحمد ربنا عليها ده اذا كان فيه مميزات أصلا !!! .. ان ذاته تكون غالية عليه ف المشمش !!!! .. ميحاولش يأذيها ، بيوجهها للخير و يحذرها من الشر لانه اللى بيحب حاجة بيكون عايزها على أكمل وجه .. و حتى لما بتغلط نفسه ما بييئسهاش من رحمة ربنا .. و انه .. و انه ..

و على فكرة مفيش انسان يقدر يحب اى حاجة تانية غير لما يكون عنده القدرة انه يحب نفسه الأول .. أهم حاجة محدش ينكش شعره و متنسوش غسيل الأسنان عشان تفضل ذاتكم نضيفة !!!!!

( 3 ) –

حب الطبيعة

انك تحب البحر و تكتب فيه قصايد - زى حالاتى- مجنون رسمى !!!!!!! .. انك تحب الورود و الأشجار و الشمس و تتأمل السما و سحابها الصافى ..

و تكلم القمر و تكلم النجوم لحد ما العباسية يكلموك !!!!!!!!!! .. انك تحب الليل بهدوئه و النهار باشراقه ..

و تسمع صوت الكروان يتهز كيانك ...

انك تحب الجناين و تلعب مع الفراشات بلاى استيشن ..

و تحب الطبيعة بكل موجوداتها ...

و نظراً لأننا ف مصر فأنت روح رمسيس و اقعد حب زى ما انت عايز !!!!!!!!!!!!

( 4 ) –

حب الناس

انك تعاملهم بإحسان و تراعى ربنا فيهم ..

انك تتمنالهم الخير زى ما بتتمناه لنفسك ..

انك تفرح لفرحهم و تحزن لدموعهم ..

انك تسامحهم لو مرة أذوك أو أسائوا ليك لو كرروها كتير .. بالشوز علطول !!!!!!!!!!

انك تنسى قسوتهم و حقدهم و تحبهم ف الله مش عشانهم يعنى !!!

( 5 ) –

الأمومة - و الأبوة عشان محدش يزعل !!!!!

و دى تانى أطهر أشكال الحب بعد الحب الالهى .. قمة الحب بتظهر لما الأم بتمسك طفلها ف حنان بتبقى خايفة عليه من النسمة !!!! .. لما الأب يضم ابنه و يطبطب عليه و يسمعله لحد ما يشب و يكبر و يحدفه بحاجة !!!! .. لما ينادى عليه ف حنان و يقوللـه : يا حبيبى ( يا حيوااااااااااان !!!!! .. و لما تلاقى الأب و الأم بيتخانقوا مين فيهم بيحب الطفل أكتر ؟؟؟؟ ( بكره يرموه لبعض !!! ) .. و لما .. و لما .. فاعرف انه الحب لسه بخير

( 6 ) –

حب المخلوقات الأخرى

زى ما انتوا شايفين الصور كلها عن الحيوانات !!! ملقيتش صور أصدق ف التعبير عن الحب والأمومة .. أكتر من الحيوانات !!!!! .. ازاى ؟؟؟ لإن قد ما هما ملهمش عقل لكن بيعرفوا يحبوا عننا .. حب مفيهوش تمثيل و لا مصلحة و لا .. و لا ..

كتير من الناس بيربوا حيوانات بمعنى أدق بيتبنوها !!!!! .. ده استنتاج رائع منى !!!! .... ممكن تكون قطة ، جرو ، عصفورة ، سلحفة ، ... أنا كنت بحب ف كتكوت بس الله يرحمه توفى من 6 سنين !!!!!!!!!! .. المهم انه الحيوانات دى بيخافوا عليها جدا و بيحبوها و كإنها ولادهم ( اسألونى أنا !!! ) .. ده غير طبعا الحب بين الحيوانات و بعضها دى حكاية لوحدها !! مش هعرف أتكلم فيها و يكفى الصور

أكيد فيه أشكال أكتر للحب بس أنا موصلتش ليها ... أكيد مفيش نوع من الحب بيغنى عن التانى ..

كنت عايزة أوصل م البوست لحاجة واحدة .....

انه الدنيا فيها حاجات كتيرة أوى تتحب ( ممكن تلهى أى انسان عن انتظاره للحب المقصود ).. و انه لما يكون الحب موجود حتى بين الحيوانات فما بالكم احنا البشر لما يموت الحب ف وسطينا ؟؟؟؟؟؟؟؟؟؟؟؟؟؟

إيمان

مهازل بنات

بعد الضجة العنيفة اللى حصلت فى القارة الأفريقية و الأسيوية نتيجة موضوعى السابق !!! و بعد الدُش السااااااااقع اللى أخدته كنتيجة فيزيائية لكشف فضايح الشباب !!!! قررت أنا إيمان الطاهر – رئيسة تحرير المدونة اللى ماتتسماش !! – بإنى آجى على نفسى شوية و اعصر على نفسى لمونة و اهزأ ف البنات بإعلان كشف فضايح البنات !!! أمرى لله أموت شهيدة و خلاص

طبعا الأمير ويليام لما كلمنى ع الموبايل بهدل أهلى و قاللى : بقى أنا واد ضايع و مقطع السمكة و ديلها و مسوى الهوايل ايشى انحرافات و ايشى مخدرات و ايشى و ايشى و تيجى انتى و تفقسينا ؟؟؟؟ !!!!! و هددنى : وحيات الحاجة ديانا الله يرحمها اذا ماكنتش أنيلها ف البنات هما كمان واكشف فضايحهم ... مش هيتقدم لأهلى !!!!!! يا سلام ؟؟ ما تامر حسنى موجود !!!!!!! الواد تامر يا حبة عينى من كتر اللوعة نزل أغنية سمّاها " يا إيمان " !!! كان ناقص يقول يا إيمان الطاهر !!! هيعمل ايه أكتر من كده ؟؟؟ يقطع نفسه ؟؟؟؟؟؟؟؟؟

ملحوظة : كل اللى فات مش اكتر من حبكة درامية لزوم الاستهبال وكده

المهم .. ندخل ف الموضوع .. قبل كل شئ لازم أرزع ملحوظة هامة جدا : هذا البوست لفئة معينة من البنات ( لزوم التنويه )عشان معنديش استعداد آخد دش تانى !!!!! استعنا على الشقا بالله

سيداتى آنساتى المفضوحات .. أحب النهارده أنـوّه بانى بإذن واحد أحد هخرب بيوتكم !!!!! عشان انتوا بجد بتسيئوا لعامة البنات و بتسيئوا للحجاب اللى انتوا لابسينه !!! و انا وراك وراك يا مجتمع لحد ما تتعدل

احم احم ابقوا زورونى ف العزا بتاعى !!!! هعمله ف سميراميس

إليكم فضايح لبنات

(1)-
الضحك بصورة مستفزة .. رقاصة يا اخواتى ؟؟؟؟ - اسمحيلى أقولك انك مايصة

(2) -
مضغ اللبان بصوت و شكل مستفز – اسمحيلى أقولك انك مايصة

(3) -
المشى بتقصع و هز الوسط – بالطبع انك مايصة

(4) –
الميكب و لا أجدع رقاصة !!! – حقاً انك مايصة

(5) –
البنطلون محزق و البادى هيتفرتك !!! – يالهوى أبسلوتلى مايصة

(6) –
المينى جيب و الشبابيك و البلكونات – اوفكورس كوايت مايصة

(7) –
التسبيل للشباب و السهوكة – رااااااائع !!! اكستريملى مايصة

(8) –
معاكسة الشباب بالكلام و الايد و غيره و غيره – ماشاء الله عديتى المايصة بمراحل

ملحوظة : كل بنت بتعمل أكتر م الحاجات دى تبقى عدت كل المراحل و جابت أقصى مجموع لجهنم

ف الآخر :
أحب أقول لكل بنت .. على فكرة لا العرى و لا المياصة و لا اللبس القصير والضيق و الخفيف اللى هيخليكى شيك و استايل و بنت ناس !!! و لا اللى هيخليكى جميلة .. بالعكس كل ده هيحقر منك و يخليكى رخيصة ملكيش أى قيمة .. و العكس صحيح

كان معكم من الإيه آر تى

المفقوعة إيمان

____________________________________

تحديث :

لما ألاقى كل مواضيعى منقولة بالحرف الواحد دون ما يتقال حتى انها منقولة و من غير ما يتعرف انى صحبتها الحقيقية من غير اى ضمير و لا أخلاق و لا دم !! احب أقول انى مش صحيح مش هقدر أثبت انها سرقة بس كل اللى بينقل من أى حد حاجة دون استئذانه و كإنه ماتعبش فيها و كإنه مش مليكها الحقيقى يبقى وقح قدام نفسه و قدام غيره ثم حرامى قدام ربنا يوم القيامة

و احب انوه طبعا بالمحترمين جدا و ده على سبيل المثال لا الحصر طبعا المحترمين كتيييييييييييييير

موضوع ازاى تطفشى جوزك ، حب زمان و لا حب دلوقتى

الحب مش مخلوق للناس بس ، هؤلاء لا يصلحون أزواجا

وعموما انا شفت كل مواضيعى بلا استثناء !! حبيت بس اورى الناس عينة من اللى شفته .. لانه لما تسرقوا بمنتهى السهولة دى و تـُمدحوا على حاجة منتوش كاتبينها و لا بتاعتكم تبقى بجد دناءة و ربنا اللى هيحاسبكم مش انا

و حسبى الله

مهازل شباب

فى البداية قبل كل شئ البوست ده موجه لفئة معينة م الشباب ومحدش ياخده على سبيل التعميم .. و بتأسف اذا كان اسلوب عرضى للانحطاط ده مستفز بعض الشئ !!! بس ده لانه فعلا أمثلة الانحطاط كتير بشكل مستفز !!! و اوعدكم انى أتكلم البوست الجاى عن أمثلة لانحطاط بعض البنات !!!! النهارده هتكلم عن ظاهرة بشعة جدا منتشرة بين الشباب

هتكلم فيه عن شوية عمايل سودة للشباب – الربع كم – و طبعا مش هقدر أفضح بلاوى أكتر ... حسن حظكم انى مش بقدر أتكلم ع المفتشى !!!!! ( حلوة مفتشى دى ؟؟؟؟؟ ) و ده طبعا بحكم انى بنوتة صغنتوتة بريئة و الله اللى يشوفنى ما يصدقش اللى بكتبه .......... !!!!!!!!!! ما علينا

نرجع للفضايح

أنا هفقسكم نافر نافر !!!!! - زى مسرحية رية و سكينة كده

إليكم جرعة من العمايل السودة

( 1 ) –
الفرجة و البحلقة للصور المفضوحة جوا المجلات المشبوهة !!!!! م الساعة 7 الصبح تلاقيهم مترصصين عند بتاع الجرايد اللى عارض مجلات أمريكانية ع الفرازة !!!!! و هيييييييييييييييص يا استاذ !!! الفرجة ببلاش !! و تلاقى هسسسسسسسسسسس لا صوت و لا نفس !!!!!!!!! متنومين مغناطيسى

( 2 ) –
الدش و بلاويه ابتداء م الفيديو كليبات الخارجة و الأفلام المشبوهة مصرية او أجنبية مبقوش يفرقوا كتير !!!!! تلاقى الشاب متلقح و متنح و عينيه مفنجلة يدب فيها رصاصة !!!!!!!!!!!! بيتهيألى لو حد اداله على قفاه مش هيحس أصلا

( 3 ) –
هنروح بعييييييييد ليه ؟؟؟؟ كفاية النت و مصايبه ... محركات البحث اللى بيلهث وراها كل (..) تيييييييييييييت

( 4 ) –
نضارة الشمس غامقة و عينين الشاب وراها مش باينة أصلا !!!!! هييييييييييييص يا استاذ !!!! محدش شايف حاجة !! آل يعنى مكسوف لا الناس تشوفه ... آل يعنى عنده دم أصلا

( 5 ) –
بكل بجاحة لا تقول نضارة و لا عدسات !!! تلاقى الشاب بيفصص البنات !!! شوية شوية هيفجرهم بعينيه !!!! و المصيبة بتكون البنت محجبة و لابسة محترم و ف غاية الأدب و مفيش فايدة !!!! امال لو كان شاف رقاصة كان هيعمل ايه ؟؟؟؟؟؟ كنا بقى نشوف ريالته ؟؟؟؟؟؟؟؟؟؟؟

و اللى يبص لبنت ف سن بناته !!!! و اللى عجوز و مكركب و فيه حيل يبص !!!!!! لأ و كمان يعاكس !!! و من بين طقم اسنانه تلاقى برص بيتكلم : عشل يالهوى عشل

( 6 ) –
الموبايل يا ما شاء الله !!!!! بيتهيألى موبايل كل راجل - اسم الله حارسه و صاينه !!! – عليه حاجات و محتاجات !!!!!!!!!!! و طبعا أقل الصور بشاعة صور نانسى عجرم و هيفاء وهبى و ماريا و بوسى سمير و اليسا طبعا !!! مفيهاش حاجة يعنى صور فنانات لابسين حاجات شبه الهدوم

( 7 ) –
الكمبيوتر يا محلاه !!!!! و ابعت ف رسايل حمرا ع الايميل!!!!

( 8 ) –
قدام الفاترينات !!!!!!!!! حتى التماثيل مش عاتقينها !!!!!!! حتى التماثيل اشتكت !!!! طوابير طوابير قدام أى محل ملابس خليعة !!! ( ملابس العرايس ) و شوووووووووووووووف بقى الأحمر و الفوشيا و البمبى المسخسخ

و اللى بيقف يتنح !!!! و اللى يبص بنظرة ثاقبة و لما حد يبص ف وشه يقلب عينه الناحية التانية بسرعة !!!!! و اللى بيعمل العمايل دى و بعدين يتكلم ف الدين !!!! و اللى بعلو صوته " استغفر الله " عشان منظره قدام الناس !!!!!!!!!!! آل يعنى الناس مش عارفة !!!! و كإن سيماهم مش ف وجوههم !!!

حقيقى حاجات بجد ........... تيت تييييييييييييت !!! كويس انه الرقابة شغالة

!!!!!آدى أكتر من نص الشباب .. فئة فاسدة

آدى جيل المستقبل !!!!!!!!!!!! ........ و اكتر من نصه جيل ( ... ) تيييييييت .. على رأى أجدادنا

حتى الغضافرة – جمع غضنفر – عواميد المجتمع و القدوة المثالية !!!! اللى المفروض يكونوا أعقل منهم بقوا أتفه منهم

كفاياكم بقى ... !!!!! لو كنتم بنات مش كنتم هتتشلوا بانه قد ايه انتم ف عيون غيركم مادة رخيصة بالشكل ده ؟؟؟؟؟؟؟؟؟؟؟؟؟ طب بلاش دى !!!!! ما بتزهقوش

الجماهير الغفيرة اللى بتلهث زى ال ( ... ) على أى حاجة !!! مفيش مرة تتكسف على دمها ؟؟؟؟؟؟؟؟؟؟؟؟؟؟

بعتذر تانى لكل شاب متدين و محترم اتوجهتلوا الاساءة على سبيل التعميم !!!! دون ما يكون ليه أى علاقة .... و لو إنهم للأسف ندروا ف حياتنا .. و مبقيناش نعيش ف مجتمع نضيف

ياللا كل واحد عارف نفسه

مش هختم غير بكلمتين و بس ..................... خافوا ربنا

إيمان

بيان تلفزيونى هام

بعد التدقيق الشديد ف شرايط القنوات الفضائية ( شرايط الشات اللى بتبقى متلقحة ف آخر الشاشة !!!! ) و بعد التتنيح بالساعات قدام شاشة التلفزيون .. استطعت بقدرتى العبقرية و الفذة من نوعها أن أستنتج ........... ان نص شعب مصر حتما ًغبى و عايز الحرق !!!!!

لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !! و بين كل جملة و جملة كان هيجيلى شلل

إليكم الشلل التالى

مهو أكيد مش هتشل لوحدى

1-
*** ممكن حب اسكندرانى ***
آيوووووووووووه و ماله !! طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!! و اذا مشينا بالحدود شوية هنلاقى فيه حب لبنانى و حب امريكانى و صينى و يابانى !!!! و هكذا و مقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!! و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة

2-
*** أنا 75 سنة ممكن أتعرف على ليدى مناسبة ***
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء الله لسه ف عز شبابه برضه !! آه و ماله ممكن تتعرف على كركوبة مناسبة

3-
*** ممكن واحدة جميلة للصداقة و الحب و ياريت برضه للسفر ***
آه ممكن طبعا !!! و يا ترى حضرتك عايزها كام سلندر ؟؟؟؟؟؟؟؟؟؟

4-
*** أنا شاب متدين ممكن ليدى عندها شقة ***
آه و ماله !! و فيه برضه شقة و عليها ليدى مجانا !!!! و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟

5-
*** أنا دلوعة و شبه نانسى عجرم ممكن أتعرف ***
آه و نص !! و ياترى واخدة من نانسى عجرم قفاها و لا كعب رجليها ؟؟؟؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟؟؟ ايه محدش راضى يشترى خلقة نانسى عجرم ؟؟؟ ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق

6-
*** أنا ف اعدادى ممكن أتعرف على بنت حلوة ***

هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟ أنا بالشكل ده هيجيلى السكر

7-
***فلانة : أنا نكدية موت ممكن أتعرف على نكدى و ننكد على بعض ***
*** فلان : أنا نكدى مووووت !! و قعتك سودة و نهارك مش باينله لون ***
كان نفسى أمسكهم هما الجوز و انكد على أهاليهم

8-
*** معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام

9-
*** أنا عايز بنت للارتباط سمرا أو بيضا أو قمحى ما تفرقش ***
حمرا !!!!!!!!!!!! تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟ جديد و منزلش السوق

10 -
*** ممكن واحدة جميلة استايل عشان أحبها ***
آه و ماله !! أنا برضه عايزة بطارية للموبايل بتاعى عشان أنا قربت أهنج !!!!!!

11-
*** أنا سى السيد بدور على أمينة تسمع الكلام و تقول حاضر ***
آه و ماله حاضر يا اخويا !!! بقى حضرتك عايز أمينة ؟؟؟؟
طب غووووووووووووووور الله يحرقك

12-
*** لو انت بتحبنى بجد ممكن أديلك رقمى !! ***
يا ما شاء الله !!! انتوا بتحبوا بعض الأول و بعدين تتعرفوا على بعض ؟؟؟؟؟؟؟؟؟؟؟؟
تصدقى بالله أنا دلوقتى بس عرفت أهمية السراية الصفرا

13-
*** فلانة : ممكن تعرفنى على نفسك عشان هتبقى حب العمر ***
*** فلان : هحكيلك عن حياتى كلها !!! .. أنا من النهارده ملك قلبك !!!!!! انتى حددى و انا تحت أمرك ***
أشوف فيكم يوم بحق جاه النبى !!! الدماغ دى معجونة من ايه ؟؟؟؟ أنا خلاص هيجيلى شلل !!! ألطم يا اخوانا ؟؟؟؟؟

14 -

*** أنا قلبى فاضى .... حد عايزنى أحبه ؟؟؟ ***
فسسسسسسسسسسسسس أنا مُت خلاص

15 -
فلانة : عرفنى على نفسك يا فلان و ابعت رقمك .. أنا بحبك أوى ، فلان : أنا اللى بحبببببببك أوييييى يا فلانة !! قوليلى صحيح هو انتى حلو ة و لا ؟؟؟؟؟؟؟؟
لا تعلييييييييق ...... أنا شكلى هموت تانى

ثوانى أموت و ارجعلكم

كلمة أخيرة :

اللى بيحصل ده كتيييييييييير .. شئ ميبقبلوش لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟

و ليه الناس بقت بتحب على نفسها ؟؟؟؟؟؟؟

رغم انه فيه بامبرز !!!!!!!

إيمان

فنون الاتيكيت يا عالم

بداية ً كده الموضوع ده منقووووووووول

الجزء الأولانى بس الموجه للبنات والباقى كله طبعا من تأليف حضرتى

الظاهر ان اللى كاتبه كان راجل فكان موجه كل البهدلة لينا !!! لكن على مين
طبعا زى ما اتعودتوا منى انى ديمقراطية جدا فعشان كده أنا هسيب البنات يتشلوا معايا شوية و بعدين طبعا أعكنن على الشباب عشان يبقى ختامها مسك !!!

********************************************
آنستي العزيزة.. لو ربنا فك عقدتك .. واتخطبتي .. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس !!!! .. قصدي قفص الزوجية السعيد.. أجمل ما في الخطوبة العزومات الرومانسية .. على أحلى محلات أكل ف وسط البلد .. واللي عمرك مانتي شايفاها بعد الجواز .. المهم نصائحي لك عند أي عزومة مع ختيبك .. قلنا رقَّه ....

اولا :
لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااااا

ثانيا :
العيش اوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري .. اوعي .. العيش بيتقطع بالسكينة ف الطبق .. وبعدين تاخدي لقمة.. لقمة.. بالعافية.. قال يعني نفسك مسدودة .. اضغطي على أعصابك جدااا وبعدين لما تروَّحي .. إبقي حِفِّي زي مانتِ عايزة ....

ثالثا :
الشوووربة.. أبوس كعب رجلك .. بند الشوربة ده مهم جدًاااا .. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون.. وطبعًاااااا عايزك تنسى تمامًا.. السلطانية اللي بتقيميها على بقك ف البيت .. وتدلدقي على روحك ... بالمعلقه وبدون صوت .. سخنة ولعة برضه بدون صوت .. وتسيبي تلت الطبق ع الأقل .. مش تميليه.. عشان تلهطيها لآخر نقطة !!!!! .....

رابعا :
الرز طبعاً .. بيتاكل بالشوكة.. اوعي إيدك تتمد ع المعلقة .. وتغرفي من طبق الرز وتعبي.. إوعي.. الرز بالشوكة.. وكإنك بتبوسيه مش بتاكليه..

خامسا :
المكرونة .. الاسباكتي .. برضه بالشوكة .. تتلف على طرف الشوكة .. لحد ما تخلص وبعدين تحطيها ف بقك من سكات .. مش تشفطي المكرونة عود عود !!! ..

سادسا :

السمك.. مشكلة .. شوفي .. بتفصلي اللحم عن الشوك .. إزاي..؟؟

تقطعي اللحم من النص .. بالطول وبعدين تفردي اللحم ع الجانبين ولما تخلصي ناحية .. متقلبيش السمكة .. بلاش فلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني .. وبدل الفيلم الهندي ده.. نصيحة .. ماتكليش السمك خالص !!!! .. قولي مابحبش السمك وخلصي نفسك..

سابعا :

الجمبري.. -إذا كنتي عارفاه !!!! .. أول ماطبق الجمبري ينزل .. بصيله بقرف واحتقار شديدين !!!! .. قال يعني زهقانة من كتر أكل الجمبري الجامبو ف بيت ببااااا.. واتنهدي جامد وقولي .. برضه..؟؟؟ وتروحي قاطعة راس الجمبريياية .. بالشوكة .. أنا ف عرضك إنسي المصمصة دلوقت ..

ثامنا :

البطاطس سواء مسلوقة أو محمرة .. اوعي تهرسيها وتدبيها ع الرز وتدي .... لا..لآ...لآ... بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي !!! ..

تاسعا :

الفاكهة.. لو الفاكهة فيها بذر.. طلعيه من بقك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزة.. اوعي ياحبيبتي من نظام التفتفة للبذر !!! .. إنسي ....

عاشرا :

ولما تخلصي أكل تحطي إيدك على بطنك.. اللي عصافيرها بتصوصو من العينات اللي كلتيها .. وتقولي له مش ممكن.. أنا عمري ما اتفجعت كدة..أنا قدامي أسبوع.. هابطل أكل فيه ... .وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. قال يعني بتمسحي بقك..

وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك .. لفة الفول والطعمية اللي جايباها معاكي !!!! ..

وبالهنا والشفااااااااااااا
****************************************

نهاركم مهبب !!! بقى احنا كده ؟؟؟؟؟؟؟ طيب طيب ماشى ماشى

إما دوقتكم المر زينا !!!
آياااااه يا كسكيلياه !!!!! أنا ف خدمة الشعب
ياللا اتفضلوا بالهنا و الشفا
لا و الله ما ينفع لازم تتفضلوا !!!!
حان وقت املاء التلة !!!!!! أن أن أن آآآآآآآآآآآآآآآآن

أولا :

بقى حضرتك لما تتنيل تاكل بلاش تهبش الفرخة اللى قدامك و بلاش اللحمة تنزل ف بقك زى الزتونة !!!! فيه حاجة اسمها شوكة و سكينة اتعلموها بقى

ثانيا :

و ياريت بعد اذنك بلاش تبلع الرز زى حبوب الشوكوبون !!!! و بلاش الأصوات الغريبة اللى بتسمعها البنات !!!! و نصيحة ماتشربش بيبسى مع الأكل لا الموضوع يتنيل أكتر !!! مش ناقصين

ثالثا :

المكرونة الاسباجتى معمولة عشان تدلعها و تتدلع و انت بتاكلها مش معمولة عشان تشفطها !!!! مفهوم ؟؟؟؟؟؟

رابعا :

العصير ابوس ايد اللى جابوك بلاش تشربه لآخر نقطة !!!!!! و تخلص الكباية ف أقل من الثانية ... انت مابتشربش مية يا ابنى ؟؟؟؟ ده عصير أنا عارفة انك متعرفوش اوى بس معلش بكره تتعود عليه !!!! هاهاها

خامسا :

ربنا يكرمك ماتمدش ايدك ف طبق السلطة الخضرا نهائى و تحسس اللى قدامك انك بتدور على حاجة تايهة !!!! بلاش قرف بقى كله بالشوكة

سادسا :

سلطة الطحينة او سلطة بابا غنوج او حتى الملوخية ماينفعش تغمس بالعيش و كده !!! اياك تمد ايدك ف الطبق نهائى أنا بحذركم !!! بالمعلقة يا حياتى ابقى اعمل كده عند بيت ماما مش قدام البنت المسكينة !!!! هتخليها ترجع كده

سابعا :

السمك طبعا مشكلة زى ما قال فبلاش تتفزلك و تطلب سمك قدامها !!!! هيا تطلب سمك ماشى احنا بنعرف نتصرف اطلعوا انتوا بس منها و هيا تسلك

ثامنا :

الفاكهة و خصوصا المانجة اياك تلحسها زى الايس كريم و تقعد بقى تمصمص و تلحس ف صوابعك !!!! المانجة حضرتك تقسمها نصين م العرض او م الطول اللى يريحك المهم تتاكل بالمعلقة و بلاش تقعد تحفر فيها و كانك هتطلع بترول !!!! ارحموا بقى

تاسعا :

فيه اختراع قديم اسمه فوطة بلاش تمسح ف الجاكيتة و لا ف قميصك المبقع !!!! و كل ما تتوسخ ايدك امسحها ف الفوطة اللى جنبك ... اللى جنبك هه بلاش حول !!!! و تمسح ف فوطتها فتكره عيشتها و تكره اليوم اللى قابلتك فيه !!!

عاشرا و أخيرا :

بلاش غش و خداع حاول تتعود على فنون الاتيكيت مش تمثله قدام الناس و بعدين لما الفاس تقع ف الراس " هنوريك اللى عمرك ما شوفتو " على رأى روتانا !!!! حراااااااااااام حرام بجد نتصدم بعد كده صدمة زى دى ... آدينى قلت و ادينى بلغت ... مانا مانا ماناآآآآآآآآآآه

أنا شكلى كده هغير اسم البلوج ده من خواطر فتاة لخواطر فتاة مفروسة

إيمان

حُب زمان و لا حُب دلوقتى ؟؟؟؟؟

أنا قررت أخرج شوية من الطور المضحك و اركب بقى الحنطور و اتحنطر !!!! لا لا لا بجد بقى البوست ده جد شوية

و ما تستغربوش ده و النبى عشان يمكن بكره لما أكتب شعر أو نثر تتصدموا م الاستغراب!!! فسيبوا الاستغراب لبعدين

تفتكروا حب زمان زى حب زمانا ده ؟؟؟؟؟

تفتكروا اختلفنا قد ايه ؟؟؟؟؟

تعالوا نرجع بالزمن ورا .. و نشيل سنين من دفاتر الزمن

هنبعد قد ايه ؟؟؟؟

تعالوا نبعد بعيد بأضعاف و أضعاف أعمارنا ....

و نفرق بين الحب زمان و الحب دلوقتى ..

(1)

زمان ..

كان الحب أجمل شئ ف الوجود .. كان الهدف الأول و الأخير للناس انهم يحبوا و يتحبوا و يعيشوا قصة حب جميلة عذرية خالية من أى غرض أو هدف تانى ..

دلوقتى ..

الحب بنبيع و نشترى فيه !!! زى الطماطم زى الكوسة !!!!! عايز تحب ؟؟؟؟ اتفضل تاخد بكام ؟؟؟؟؟؟؟؟!!! ... بقى الحب ديكور جميل زى فازة حلوة بنزين بيها البيت عشان مايبانش كئيب قدام الناس .. لكن الورد لا بنرويه و لا بنخليه يتنفس

و الورد ف الفازة نلاقيه بيدبل و نشوفه بيموت قدام عينينا و ما بنتحركش

بقى الحب زى رسمة حلوة بتترسم بمهارة على قلوب و عقول الناس !!!

بقى الحب غنوة جميلة و كام كلمة بننردها يمين و شمال !!! و الغنوة تقدم و نزهق منها و نردد غنوة جديدة !! و الناس دلوقتى عشان تحب لازم يكون ف مقابل مادى !! بقى هدفهم الأول و الأخير ... الماديات و طبعا الوسيلة الرخيصة .... الحب !!!! بقى الحب بالنسبالهم زى الأكل زى الطبيخ زى ترويق البيت زى أى روتين عادى !!!!!!

(2)

زمان ..

كانت الناس بتعيش قصص الحب و تتوجها بالجوازعشان كان هدفهم انهم بالحب و الجواز يبدأوا صفحة جديدة تضمهم هما الاتنين ... كان الجواز بالنسبالهم هو حياة تانية للحب و تكملة ليه .. كانت الناس بتتجوز عشان بتحب عشان ماتقدرش تكون ف غنى عن الطرف اللى بتحبه ..

دلوقتى ..

الجواز بقى مقبرة للحب .. بقت الناس بتتجوز عشان المفروض انه ده نهاية الحب و مش بدايته الحقيقية !!! و بقى كل طرف – ولد أو بنت – يرسم ع التانى مشاعر الحب الفياضة عشان بالحب تعمى العيون و ميبقاش فيه طريقة لتدخل العقل !!!!! و بقت الناس عايزة تتجوز و خلاص .. تحب و لا ماتحبش ما تفرقش كتير !!! و تلاقى واحد بيقولك : يا سيدى انت مكبرها ليه ؟؟ بكره الحب ييجى بعدين بالعشرة !!! و تلاقى واحدة تقولك : أنا أتجوز و اتستت و يبقالى بعل و بيت و عيال أهم حاجة و بكره برضه الحب ييجى بعدين !!! – ييجى يزورهم يعنى ؟؟ و ياترى هييجى بقى من أنهو داهية ؟؟؟ - لأ و الغريب بقى لما تلاقى ناس بجحة تقولك : حب ايه و هباب ايه !!!! أنا آه ممكن أرسمه على واحدة عشان تقبلنى بعيوبى و نواقصى لكن انى أحب بجد يا ابنى أنا من النوع العملى مليش ف العواطف !!! و تلاقى بنت معندهاش دم تقولك : حب ؟؟؟؟ بطلوده و اسمعوده !!!! ليه هنأكل الولاد حب و ندخلهم المدارس بالحب و ندفع فواتير و نجيب لبس و شقة و عربية بالحب ؟؟؟؟!!!!!!!

(3)

زمان ..

كان لما اتنين يحبوا بعض كان كل واحد فيهم يحاول ينقل مشاعره الحقيقية ف أبيات شعر أو حتى كتابة عادية بس صادقة .. كانوا بيهادوا بعض بقصايد شعر كتبينها بإيديهم و بأحاسيسهم و عواطفهم الجياشة ..

دلوقتى ..

بقت المشاعر و الأحاسيس بتتنقل بضغطة واحدة على الكيبورد !!! لأ و بقى الموضوع سهل جدا ف تبادل المشاعر .... الحب بقى رنات – مسد كوولز – المسد الأول الساعة 1 يعنى بحبك و الساعة 2 يعنى اشتاقلك و الساعة 3 يعنى بفكر فيك و الساعة 4 يعنى بطمن عليك .... و هكذا لحد الساعة 12 اتخمدى !!!! – يا حلاوة يا ولاد !! بقى الحب رنات و رسايل و شات !!!!

(4)

زمان ..

كان الحب حتى ف الأغانى ليه معنى سامى و ليه كلماته المعبرة ... كنت تعرف تفرق بسهولة بين الأغانى العاطفية و أغانى حسبالله !!! من كلماتها من لحنها من صوت مغنيها

دلوقتى ..

تلاقى الأغانى العاطفية - أو اللى مفروض انها عاطفية – شوية كلمات ركيكة على شوية طبلة و شوية رقص ف الفيديو كليب و يقولولك دى اغنية حب جامدة جدا !!!!! منتهى الرومانسية

لما مثلا نبطل نسمع لأم كلثوم و عبد الحليم و فيروز و نسمع بقى لسعد الصغير و نحب ف العنب و نحب ف الحمار !!!! أو لما واحدة تقول لحبيبها بحبك يا حمار و يروح هوه منهق !!! منتهى الرومانسية

(5)

زمان ..

كان الحب شعور مستخبى جوه قلوب الناس مش سهل التصريح بيه ... كان الحب ممكن يكبر و يكبر جوه قلب الواحد سنين و سنين من غير ما يصرح عنه أو يلمح بيه ... كان الحب بنقدر نشوفه ف عيون الناس .. ف أفعالهم .. ف مواقفهم .. كان الحب كلمة بسيطة بتتردد ف خجل بين شفايفهم لا عارفين يقولوها و لا عارفين يكتموها

دلوقتى ..

تلاقى الشاب من أول أو تانى مرة يقابل فيها البنت يروح يقولها بحبك !!! طب تيجى ازاى ؟؟؟؟ أو تيجى ازاى لما البنت تخرج عن طورها الخجول بفطرته و تروح لعند الشاب و تقوله بحبك من غير لا احم و لا دستور !!! و تبقى مستنية رده عشان لو وافق تروح تخطبه

بقى الحب شوية كلام أغانى على شوية من سيناريوهات الأفلام !!!! و بقى كل انسان – ولد أو بنت – بيتنافس مع غيره من نفس النوع مين هيقدر يوقع البنت دى ف حبه أو مين هتقدر تخلى الولد ده خاتم ف صباعها !!! و بقى الحب شعور جرئ أو ممكن تقول بجح مايتكسفش انه يتقال أو يتعبر عنه قدام ملايين الناس

(6)

زمان ..

كانت البنت تطل من الشباك المتوارب و ف لحظات صمت و لهفة عينيها تقابل عينين حبيبها و الكلام بعينيهم ياخدهم لوادى بعيد .. كان الحب بطبعه شعور خجول

دلوقتى ..

عادى خالص لما تشوف البنت مستندة على دراع حبيبها و ماشيين يتلكعوا !!! و ميبقاش شئ مثير للدهشة ف زمانا ده انه تلاقى بنت حاطة راسها على كتفه أو حتى حاضناه !!! و بقى شارع الغرام هوا الشارع اللى بيحصل فيه المفاسد !!! بدل ما كانت " شادية و عبد الحليم " عمالين يغنوا للحب ف شارع غرامهم ..... و كل اللى بيحصل ده و أكتر منه بكتييييير تحت منطلق الحب !!!!! حبهم عزرائيل

لأ مش هوا ده الحب ... سموه أى شئ تانى

(7)

زمان ..

كان الحب يعنى اخلاص يعنى وفاء و تعاهد قلبين .. كان الحب زى كنز غالى بيتمناه الناس .. كان الحب بيتقاس بالتضحية ف سبيل الحب .. كان الحب مايتقدرش بتمن أبدا

دلوقتى ..

الحب يعنى مصلحة !! الحب يعنى تسلية !! و الحب يعنى اعلان عن البنات و عرض عن الرجال و اللى ما يشترى يتفرج !!! و الحب بقى دلوقتى ليه سمسار عشان يوصل الحب للناس بأقل التكلفة و بأسرع وقت !!!! حاجات كتيييييييير اتغيرت ف الناس مش الحب هوا اللى اتغير ... الحب مفهوم واحد عمره مايتغير بس للأسف احنا اللى بنتغير و ياريتنا للأفضل لكن للأسوأ .. طريقة تفكيرنا ف الحب و طريقة تعبيرنا عنه ..... كله اتغير

مبقيتش أستغرب أحوالنا دى لإنى عايشة ف زمن تانى بعيد أوى عن زمانا ده ..... بس لسه السؤال محيرنى : هوا حقيقى ممكن نسمى ده الحب على الطريقة الحديثة و لا انا اللى عايشة بسذاجة على الطريقة القديمة ؟؟؟؟؟؟

ايمان