♥♥ نورتوا مدونتى و نورتونى.. يارب مواضيعى تعجبكم ♥ ♥
" بًنى الإسلام على خمس ٍ : شهادة أن لا إله إلا الله ، و أن محمدا ً رسول الله ، و إقام الصلاة ، و إيتاء الزكاة ، و الحج ، و صوم رمضان" ..صدق رسول الله.. "إن هذا الدين يسر ، و لن يشاد الدين أحدٌ إلا غلبه ، فسدّدوا و قاربوا ، و أبشروا ، واستعينوا بالغدوة و الرّوحة ، و شئ من الدُلجة" ..صدق رسول الله.. "مَن دعا إلى هدى كان له من الأجر مثل أجور مَن تبعه ، لا ينقص ذلك من أجورهم شيئاً ، و مَن دعا إلى ضلالة كان عليه من الإثم مثل آثام مَن تبعه ، لا ينقص ذلك من آثامهم شيئاً" ..صدق رسول الله.. "سبعة ٌ يظلهم الله فى ظله يوم لا ظل إلا ظله : إمام ٌ عادل ، و شاب نشأ فى عبادة ربه ، و رجل قلبه معلق فى المساجد ، و رجلان تحابا فى الله و تفرقا عليه ، و رجل دعته إمرأة ذات منصب ٍ و جمال فقال إنى أخاف ُ الله ، و رجل تصدق بصدقة ٍ فأخفاها حتى لا تعلم شماله ما تنفق يمينه ، و رجل ذكر الله خاليا ً حتى فاضت عيناه" ..صدق رسول الله.. "أتدرون مَن المفلس ؟ قالوا : المفلس فينا مَن لا درهم له و لا متاع ، فقال (ص) : إن المفلس من أمتى مَن يأتى يوم القيامة بصلاة ٍ و صيام ٍ و زكاة ٍ ، و يأتى و قد شتم هذا ، و قذف هذا ، و أكل مال هذا ، و سفك دم هذا ، و ضرب هذا ، فيعطى هذا من حسناته و هذا من حسناته ، فإن فنيت حسناته قبل أن يقضى ما عليه أخذ من خطاياهم فطـُرحت عليه ثم طـُرح فى النار" ..صدق رسول الله.. "يؤتى بالرجل يوم القيامة فيُلقى فى النارفتندلق أقتاب بطنه فيدور بها كما يدور الحمار فى الرحى ، فيجتمع إليه أهل النار فيقولون : مالك يا فلان ؟ ألم تكن تأمر بالمعروف و تنهى عن المنكر؟ فيقول : بلى ، كنتُ آمر بالمعروف و لا آتيه ، و أنهى عن المنكر و آتيه" ..صدق رسول الله.. "إنما مثل الجليس الصالح و جليس السوء كحامل المسك و نافخ الكير" ..صدق رسول الله.. "المؤمن القوى خيرٌ عند الله من المؤمن الضعيف ، و فى كلٌ خير، احرص على ما ينفعك و استعن بالله و لا تعجز ، و إن أصابك شئ فلا تقل : لو أنى فعلتُ كان كذا و كذا ، و لكن قل : قدر الله و ما شاء فعل ، فإن ( لو ) تفتح عمل الشيطان" ..صدق رسول الله.. "اتقوا الظلم فإن الظلم ظلمات يوم القيامة ، و اتقوا الشح فإن الشح أهلك من كان قبلكم ، حملهم على أن سفكوا دماءهم واستحلوا محارمهم" ..صدق رسول الله.. "كن فى الدنيا كأنك غريب ٌ أو عابر سبيل ، و عُد نفسك من أهل القبور" ..صدق رسول الله.. "مثل المؤمن الذى يقرأ القرآن مثلُ ( الأترُجّة ) ريحُها طيب و طعمها طيب ، و مثل المؤمن الذى لا يقرأ القرآن كمثل ( التمرة ) لا ريح لها و طعمها حُلو ، و مثل المنافق الذى يقرأ القرآن كمثل ( الريحانة ) ريحها طيب و طعمها مُر ، و مثل المنافق الذى لا يقرأ القرآن كمثل ( الحنظلة ) ليس لها ريح و طعمها مُر" ..صدق رسول الله.. "إن الدنيا حُلوة خضِرة و إن الله مستخلفكم فيها فينظر كيف تعملون ، فاتقوا الدنيا و اتقوا النساء فإن أول فتنة بنى اسرائيل كانت فى النساء" ..صدق رسول الله.. "أبشروا و أملوا ما يسُركم ، فو الله ما الفقر أخشى عليكم ، و لكنى أخشى أن تبسط الدنيا عليكم كما بسطت على من كان قبلكم ، فتنافسوها كما تنافسوها فتهلككم كما أهلكتهم" ..صدق رسول الله.. "إن الله حرم عليكم عقوق الأمهات و منعاً و هات ، و وأد البنات ، و كره لكم قيل و قال ، و كثرة السؤال ، و إضاعة المال" ..صدق رسول الله.. "صنفان من أهل النار لم أرهما : قومٌ معهم سياط كأذناب البقر يضربون بها الناس .. و نساء كاسيات عاريات ، مائلات مميلات ، رؤوسهن كأسنمة البخت المائلة ، لا يدخلن الجنة ، و لا يجدن ريحها ، و إن ريحها ليوجد من مسيرة خمسائة عام" ..صدق رسول الله.. "إن من أحبكم إلىّ و أقربكم منى مجلساً يوم القيامة أحاسنكم أخلاقاً ، و إن من أبغضكم إلىّ و أبعدكم منى يوم القيامة الثرثارون و المتشدقون و المتفيهقون ، قالوا يا رسول الله : فما المتفيهقون ؟ قال : المتكبرون" ..صدق رسول الله.. "الكيّس من دان نفسه و عمل لما بعد الموت ، و العاجز من أتبع نفسه هواها و تمنى على الله الأمانى" ..صدق رسول الله.. "أدبوا أولادكم على ثلاث خصال : حُب نبيكم و حُب آل بيته و تلاوة القرآن ، فإن حملة القرآن فى ظل عرش الله يوم لا ظل إلا ظله مع أنبيائه و أصفيائه" ..صدق رسول الله.. "يا معشر النساء تصدقن و أكثرن من الإستغفار فأنى رأيتكن أكثر أهل النار ، فقالت امرأة منهن جزلة ٌ : و مالنا يا رسول الله أكثر أهل النار؟ قال : تكثرن اللعن و تكفرن العشير.. و ما رأيت من ناقصات عقلٍ و دينٍ أغلب لذى لـُب منكن ، قالت يا رسول الله : و ما نقصان العقل و الدين ؟ قال : أما نقصان العقل فشهادة امرأتين تعدلُ شهادة رجل ، فهذا من نقصان العقل ، و تمكثُ الليالى ما تصلى و تفطرُ فى رمضان فهذا من نقصان الدين" ..صدق رسول الله.. "مرّ النبى (ص) بإمرأة تبكى عند قبرٍ فقال لها : اتقى الله و اصبرى فقالت : إليك عنى فإنك لم تصب بمصيبتى و لم تعرفه فقيل لها : إنه النبى (ص) ، فأتت باب النبى ، فقالت : لم أعرفك ، فقال : إنما الصبرُ عند الصدمةِ الأولى" ..صدق رسول الله.. "استحيوا من الله حق الحياء ، قالوا : إنا لنستحيى من الله و الحمد لله ، قال : ليس ذاك ، مَن استحيا من الله حق الحياء فليحفظ الرأس و ما وعى ، و ليحفظ البطن و ما حوى ، و ليذكر الموت و البلى ، و مَن أراد الآخرة ترك زينة الحياة الدنيا ، مَن فعل ذلك فقد استحيا من الله حق الحياء" ..صدق رسول الله.. "يا معشر الشباب من استطاع منكم الباءة فليتزوج فإنه أغض للبصر و أحصن للفرج ، و من لم يستطع فعليه بالصوم فإنه له وجاءٌ" - رحم الله رسولنا الكريم وصلى الله عليه و على آله و صحبه أجمعين

أهلا بيك ف مدونتى

قد ايه جميل انك تكتب و تعبر عن كل حاجة تدور جواك ..عن كل حاجة تدور حواليك ..عن كل لحظة تمر بيك ..و كل ذكرى تفوت عليك منتاش ناسيها و لا حابب تنساها ..عن سعادتك عن جروحك.. عن حلم بكره و عن طموحك . انك تكتب و المعانى تحس بيك و ف قلب صفحة يكون مكانك

ابحث بالمدونة

مسطول بيقول لصاحبه شوف العالم الهطلة يدفعوا 25 مليون دولار علشان بن لادن أمال لو كان بن محوج كانوا عملوا إيه !! هههههههه ... صعيدي راح أمريكا لقى الناس لابسين تي شيرتات مكتوب عليها بيبسي و كوكاكولا لما رجع البلد كتب على التي شيرت بتاعه عصير جصب !! ههههههههه ...الأمريكان والروس بيترسموا على بعض ، الأمريكان يقولوا إحنا أول ناس طلعناالقمر والروس يقولوا لا إحنا أول ناس طلعنا القمر ، أهبل كان واقف إتضايق أوي قالهم إنتوا لما طلعتوا القمر لقيتوا إيه هناك ؟؟؟ قالوله طوب ورمل وزلط قالهم: إحنا اللي مطلعينه !! ههههههههههه ... بيسألوا واحد مسطول بيقولوله المصري بنى الأهرامات والياباني بنى إيه ؟؟ قالهم بنى سونيك !! ههههههههه ...أهبل إشتري عربية شبح طلع على الطريق السريع علشان يجربها فشغل الراديو لقي المذيع بيقول : هنا لندن ، الأهبل قال يلعن أبو السرعة!! هههههههههه ... واحد غبى قوى حكموا عليه بالاعدام، بعد ما علقوه فى المشنقه قعد يشاور ويخبط بإيده ورجليه ففكروه عاوز يقول حاجه مهمة ففكوه ونزلوه بسرعة فبص لهم وقال: ياجزم كنت هتخنق!!! هههههههه ...واحد سفاح دخل شقة راجل قتل مراته فالراجل ضحك قتل ابنه والراجل برضه بيضحك قتل بنته والراجل عمال يضحك قتل أبوه والراجل هيموت على نفسة من الضحك فالسفاح استغرب وسأله: انت بتضحك كده ليه وانا بقتل فى عيلتك فالراجل قاله وهو بيضحك : اطلع من دول يا ابراهيم يا نصر!! هههههههه ... فيه واحد حماته ماتت فبيسال ايه سبب الموت قالوله : تسمم، قعد يضحك بيقولوه انت بتضحك على ايه قالهم : اكيد عضت لسانها!! هههههههه ... مجموعه فضائيه نزلت على كوكب المريخ لقو واحد صعيدى بيخبط على الازاز ومعاه فوطه بيسألوه انت بتعمل ايه هنا قالهم مسح ازاز صواريخ!! هههههههه ... مرة دكتور دخل عنبر فى سراية المجانين لقى واحد بيخبط دماغه فى الحيطة سأل الممرضة ماله ده ؟ قالت أصله كان بيحب واحدة ومتجوزهاش دخل العنبر الى بعده لقى واحد بيضرب نفسة بالشبشب قالها وده ماله قالتله أصل ده اللي اتجوزها!! هههههههههه ... واحد عبيط دخل ايده فى نار وبعد شويه جه يخرجها مش لاقاها دخل راسه يدور عليها!!هههههههه ...واحد احول قابل واحده حولة بيعاكسها : ياسلام عليك يا قمر انت والتوأم اللى معاكى قالتله مشى اللى معاك وتعالى!!هههههههه ...صرصار فطسان على روحه من الضحك علشان اللي بيضربه بالشبشب أحول !! ههههههههه ... المدرس : ماهي الكلمة التي يستخدمها التلاميذ عادة؟؟التلميذ : لا أعرف ياأستاذ،الأستاذ :أحسنت !!! ههههههه ... واحد فقير مر من قدام الجزار وبص للحمة بتمعن وقال لها حتروحى النار!! ههههههههه ... فيل ونمله بيتقابلو على النيل ،الفيل رما نفسه فى النيل، ليه ؟أخو النمله جه!! هههههههه ... واحد راح البحر لقى بنت بتغرق مديلها ايده قالتله اطلبها من ابويا !!! ههههههههه ... مدرس كيميا خلف ولد سماه سامى اكسيد الكربون !! هههههههه ... سواق تاكسي دخل اوضته ينام، مراته قفلت عليه الباب نده عليها وقال لها :إفتحى الباب واقفليه تانى!! ههههههههه ... مرة سواق تاكسى ركبت معاه واحدة حلوة قال لها تعرفى تسوقى قالت له لأ ، قال لها أنا تسوقى!! هههههههه ...واحد اشترى شريط لهانى شاكر لقى فيه" غلطة "راح رجعه!! هههههههه ...مره البوليس كبس على جماعه بيشموا، وكان معاهم ولد صغير، جه الضابط للولد يستظرف ويقول له: ياترى الشمام الصغير إسمه إيه؟ رد الولد : كانتالوب!!! ههههههههه ... واحد متجوز وقاعد في البيت وبيبص كتير في عقد الجواز، مراته قالت له: بتبص في عقد الجواز ليه يا حبيبي؟ قالها: بدور عن تاريخ إنتهاء العقد!! ههههههههه ... مرة واحد حظه وحش لقى خاتم سليمان، جه يفركه فعص العفريت!!! هههههههههه ... واحد راقد ف المستشفى جه أبوه البخيل يزوره لقى مكتوب ع الباب ادفع قال لنفسه : بعدين أزوره!! ههههههههه...واحدة بتقول لجوزها جارنا بيبوس مراته وهو رايح الشغل ، ليه انت متعملش كدة؟؟ قالها يعني هي هتوافق!!! ههههههههههه ... شلة ولاد راحو يلعبو بلياردو ، واحد منهم وقف فوق الطرابيزة وقال لهم انا الجوووووون!! هههههههه ... واحد غبي رجع من السفر لقى الشقة مليانة صراصير.. غير قفل الباب!! ههههههه ... واحد نشر في إعلانات مبوبة :مطلوب زوجة ، تاني يوم جاله 100 جواب فيهم نفس الرد : تاخد بتاعتي؟؟!! هههههههه ... واحد غبى شاف قشرة موزة على الأرض فقال يييه هاتزحلق تانى!! هههههههه ... اهبل مشترك في مسابقة أسرع رسمة رسم نقطة وقال: ده فيل جاي من بعيد!! هههههههه ... ابن بيقول لابوه بتعمل ايه يا بابا قاله : بكتب جواب لعمك ، سأله ابنه : هوا انت بتعرف تكتب ، ابوه قاله : يعنى هوا عمك اللى بيعرف يقرا يا فالح!!!! هههههههه ... مرة واحد خد مراته جنينه الحيوانات و صورها جنب قفص القرود و علق الصورة فى الصالون و كتب تحت الصورة :دى صورة مراتى مع القرود ملحوظه مراتى التالته على اليمين!! ههههههههه ... واحد بيقول لمراته: أنا النهارده عايز رومانسية فى البيت، راحت الزوجة سألت أمها : يعنى إيه رومانسية ؟؟ الأم : مش عارفة بس احتياطى إنقعى الرز!! ههههههههه ... اتنين مساطيل ماشيين على سطح بيتهم واحد وقع فى الخزان ،التانى راح استناه عند الحنفية!! هههههههه ... نساء العالم اتحدن وقررن أن لا يقومو بأى أعمال في المنزل وبعد أسبوع تجمعوا ليعرفوا نتائج إلاضراب فقالت الزوجة الفرنسية :أنا قلت لجوزى ميشيل أنا مش هعمل حاجة فى البيت الاسبوع ده كله، وقالت أول يوم ماشوفتش حاجة تانى يوم ماشوفتش حاجة تالت يوم بدأ يغسل ويمسح وقالى :انتى بتتعبى اوى ياحبيبتى ،وقالت الزوجة الانجليزية : أنا قلت لجوزى أنا مش هعمل حاجة خالص فى البيت الاسبوع ده .. أول يوم مشوفتش حاجة تانى يوم بدأ يعمل الاكل تالت يوم عشانى وغدانى بره، جت المصرية وقالت :أنا قلت لأبو العيال أنا مش هعمل حاجة فى البيت الأسبوع ده وقالت :أول يوم ماشوفتش حاجة تانى يوم ماشوفتش حاجة تالت يوم بدات أشوف شوية بعينى الشمال!!! هههههههههههه ... مرة واحد ماشى ورا واحدة و بيعاكسها فبيقـولها : الجميل وراه مشوار ؟؟؟ قالتله : لأ وراه حمار !!! هههههههه ... مرة دكتور عيون بيقول لخطيبته : شايفة الوردة اللى ف ايديا جميلة ازاى قالتله : آه جميلة أوى راح مباعدها شوية و قالها طب شايفاها كده ؟؟؟؟!!!! هههههههه ...مرة واحد إسكندراني بنته رجعت الساعة 3 بالليل قالها: كنتي فين يا بت؟ قالت له: كنا بنتمشى مع واحد صاحبي يابا قالها: طب خشي نامي إحنا نحبوا الصراحة !!!! هههههههه... مرة واحدة قالت لحبيبها البخيل: أكلها معاك بدقة وأعيش معاك إن شالله ف عشة قالها: إنتي ليه مادية قوي كده يا حبيبتي؟!!! ههههههه ...مدرس بيسأل تلميذ : ما هو الحيوان الذي يصحيك كل يوم ؟؟؟ التلميذ قاله: بابا يا أستاذ !!!! هههههههه ...واحد حشاش مسكته دورية قالوله: إركب. قالهم: لا شكرا البيت قريب !!! هههههههه... عيلين صغيرين ماشيين في الشارع لقوا قطة فالأول قال للتاني: أنا هاخد القطة دي أربيها فالتاني قاله: ما ينفعش كده تجيبلك أمراض اغسلها الأول..تاني يوم جه الولد بيعيط وقال لصاحبه: القطة ماتت وانت السبب إنت اللي قلتلي اغسلها. صاحبه قاله: ماتت وانت بتغسلها؟ قاله: لأ ماتت وأنا بعصرها !!! هههههههه ... مرة واحد مسطول قابل واحد قاله: الساعة كام؟ قاله: خمسة وخمسة. قاله: ما تعرفش تقول عشرة وخلاص !!! هههههههه ... واحد مسطول بيفتح التلاجة بالراحة قوي فسأله زميله: مالك بتعمل كده ليه؟ قاله: نفسي أعرف مين اللي بيولع اللمبة !!! ههههههههه ... مرة عريس اتقدم لواحدة فأبوها بيقوله : جيب دبلتين و على خيرة الله. راح العريس رد بحمقة : ايه ده يا عمى ده الشبكة بالمعقول !!! ههههههههه ...مرة تلميذ أبوه سأله: ليه الأستاذ كاتبلك حمار في الشهادة قاله: لا يا بابا ده توقيعك !!! هههههههه ... اتنين فشارين واحد بيقول للتاني: امبارح وأنا ماشي في الغابة طلعلي أسد وكان ف إيدي كباية مية رحت رامي الأسد بيها الأسد اترعب وجري التاني رد عليه وقاله: آه عشان كده لما طلعلي أسد من شويه وضربته بالقلم إيدي اتبلت !!! هههههههههه ... مرة واحدة اتعرفت على واحد غبي سألها: اسمك إيه؟ قالتله: أسماء قالها: آه يعني مالكيش إسم محدد !!! ههههههههه ...مرة واحدة ادت صاحبتها بغبغان هدية سألتها عليه تانى يوم قالت لها: عادى طعمه زى الفراخ !!! ههههههههه ...تلات ستات عواجيز عايزين يتجوزوا عملوا إعلان: اتجوز واحدة واحصل على اتنين مجانا !!! هههههههه ... شحات راح لواحد قال له: لله قال له: ربنا يسهلك فقال له: ولو مسهلهاش أرجعلك !!! ههههههههه ... واحد قال لابنه: نابليون وهو قدك كان أول واحد في الفصل رد الواد على والده: نابليون وهو قدك يا بابا كان إمبراطور !!! ههههههههه ...واحدة ست بتقول لجارتها: الحقيني يا أم محمد بعت جوزي يجيبلي ملوخية خبطه أتوبيس .. يالهوي وعملتي إيه ..عملت بامية وأمري لله !!! هههههههههه ... مرة ولد سأل باباه: إنت جبتنى ازاى يا بابا؟ قال له: يا ابني حطيت شوية سكر تحت السجادة صحيت من النوم لقيتك فالولد عمل زي باباه. صحى الصبح لقى صرصار قال له: لو مكنتش ابنى كنت موتك !!! ههههههههههه ... مرة راجل بخيل كان فى شوبنج هو وابنه الولد بيقول لأبوه: بابا أنا بحب الشيكولاتة قال له: حبها وحطها مكانها تانى يا حبيبى !!! هههههههههه ... طفل صغير طلع يجري على جارتهم: وريني لسانك يا طنط.. قالت له: ليه يا حبيبي؟ قال لها: أصل ماما بتقول إن لسانك زي العقربة !!! ههههههههه ...مرة مدرس قال للتلاميذ فى الفصل: اللى فاكر نفسه غبى يقف ... بعد شوية وقف تلميذ ...فسأله المدرس: وليه بقى يا سيدي فاكر نفسك غبي؟ ..فرد عليه التلميذ: أصلي محبيتش أشوفك واقف لوحدك يا أستاذ !!! هههههههههه ... كان فيه مرة واحد أهبل عرف إن صيام يوم عرفة يعادل صيام سنة فصام لحد الضهر وقال: كفاية عليا ست شهور !!! ههههههههه ... مره اتنين كفار بيحششوا واحد قال: بسم الله الرحمن الرحيم التاني قاله: يا را جل ده احنا كفار فقال له : ياه ده أنا ناسي أستغفر الله العظيم يا رب !!! ههههههههه ... مرة اتنين مساطيل راكبين عربية نزل واحد يبص على العجلة لقاها نايمة فنام جنبها التانى نزل يشوفه بيقوله: فيه إيه؟ قاله: هسسس العجلة نايمة !!! هههههههههه .. واحد صاحبنا ناصح قوي كان بيصطاد والطعم خلص يعمل إيه؟ جاب ورقة وكتب عليها "طعم" ورمى الصنارة فى المية ربع ساعة الصنارة غمزت رفع لقى ورقة مكتوب عليها "سمكة" !!! ه هههههههههه ... مرة واحد حط كباية شاى على سور البلكونة ودخل يغير الجلابية رجع لقى الهوا طير الكباية ووقعها اتكسرت فجه يفتح التليفزيون لقى عبد الحليم حافظ بيقول: الهوا هوايا فقاله: وحياة أمك لانت دافع حق الكباية !!! ههههههههههه ... مرة أستاذ بيسأل طالب: كم عمر والدك؟ جاوب التلميذ وقال له: معرفش بس هوا قاعد عندنا من زمان !!! ههههههههه ...واحد باشا الزمان دار عليه وافتقر راح اشتغل بتاع فجل وجرجير وقف ف السوق وهو لابس الطربوش وينادي: فجل يا حوش جرجير يا كلاب !!! هههههههههه ... دكتور بيطري بيقول لمراته: أنا بهيم في حبك يا حياتي قالتله: وأنا ماقدرش أرفسلك طلب !!! ههههههههه ... واحد أخنف حظه وحش أوي وقع في حفرة وفضل مستني حد ينقذه وفين وفين واحد شافه وعلى حظه كان أخنف برضه الأخنف اللي فوق قاله: استنى شوية هطنعك دنوقتي قاله: نبنا يخنيك بسنعة قاله: وكمان بتتنيأ طب شوف مين هيطنعك !!! هههههههههه

Friday

فنون الاتيكيت يا عالم


بداية ً كده الموضوع ده منقووووووووول

الجزء الأولانى بس الموجه للبنات والباقى كله طبعا من تأليف حضرتى

الظاهر ان اللى كاتبه كان راجل فكان موجه كل البهدلة لينا !!! لكن على مين
طبعا زى ما اتعودتوا منى انى ديمقراطية جدا فعشان كده أنا هسيب البنات يتشلوا معايا شوية و بعدين طبعا أعكنن على الشباب عشان يبقى ختامها مسك !!!

********************************************
آنستي العزيزة.. لو ربنا فك عقدتك .. واتخطبتي .. فإليك نصائحي حتى تأخذي بخطيبك من مركب الخطوبة إلِّي محدش عارف هاترسى على إيه.. إلى مثوااااه الأخير في قفص النسانيس !!!! .. قصدي قفص الزوجية السعيد.. أجمل ما في الخطوبة العزومات الرومانسية .. على أحلى محلات أكل ف وسط البلد .. واللي عمرك مانتي شايفاها بعد الجواز .. المهم نصائحي لك عند أي عزومة مع ختيبك .. قلنا رقَّه ....

اولا :
لازم تعرفي إن الشوكة والسكينة بيتمسكوا من إيديهم من الطرف يعني مش م الوسط ولا م البوز زي الخنجر ولا من فوق طبعًااااا

ثانيا :

العيش اوعي تفضحينا وتقطعيه بسنانك.. ولا الرغيف نصين بأيدك وكل نص لقمة وتحشري .. اوعي .. العيش بيتقطع بالسكينة ف الطبق .. وبعدين تاخدي لقمة.. لقمة.. بالعافية.. قال يعني نفسك مسدودة .. اضغطي على أعصابك جدااا وبعدين لما تروَّحي .. إبقي حِفِّي زي مانتِ عايزة ....

ثالثا :

الشوووربة.. أبوس كعب رجلك .. بند الشوربة ده مهم جدًاااا .. الشوربة تتشرب من غير صوت خالص.. ومن غير ماتقعدي تنفخي فيها.. زي القهوجي اللي بينفخ ف الحجر للزبون.. وطبعًاااااا عايزك تنسى تمامًا.. السلطانية اللي بتقيميها على بقك ف البيت .. وتدلدقي على روحك ... بالمعلقه وبدون صوت .. سخنة ولعة برضه بدون صوت .. وتسيبي تلت الطبق ع الأقل .. مش تميليه.. عشان تلهطيها لآخر نقطة !!!!! .....

رابعا :

الرز طبعاً .. بيتاكل بالشوكة.. اوعي إيدك تتمد ع المعلقة .. وتغرفي من طبق الرز وتعبي.. إوعي.. الرز بالشوكة.. وكإنك بتبوسيه مش بتاكليه..

خامسا :

المكرونة .. الاسباكتي .. برضه بالشوكة .. تتلف على طرف الشوكة .. لحد ما تخلص وبعدين تحطيها ف بقك من سكات .. مش تشفطي المكرونة عود عود !!! ..

سادسا :

السمك.. مشكلة .. شوفي .. بتفصلي اللحم عن الشوك .. إزاي..؟؟

تقطعي اللحم من النص .. بالطول وبعدين تفردي اللحم ع الجانبين ولما تخلصي ناحية .. متقلبيش السمكة .. بلاش فلح .. شيلي السلسلة بالشوكة والسكينة وحطيها ف جنب الطبق وكملي أكل النص التاني .. وبدل الفيلم الهندي ده.. نصيحة .. ماتكليش السمك خالص !!!! .. قولي مابحبش السمك وخلصي نفسك..

سابعا :

الجمبري.. -إذا كنتي عارفاه !!!! .. أول ماطبق الجمبري ينزل .. بصيله بقرف واحتقار شديدين !!!! .. قال يعني زهقانة من كتر أكل الجمبري الجامبو ف بيت ببااااا.. واتنهدي جامد وقولي .. برضه..؟؟؟ وتروحي قاطعة راس الجمبريياية .. بالشوكة .. أنا ف عرضك إنسي المصمصة دلوقت ..

ثامنا :

البطاطس سواء مسلوقة أو محمرة .. اوعي تهرسيها وتدبيها ع الرز وتدي .... لا..لآ...لآ... بالشوكة حتة حتة وإنت زي ما تكوني هاتعيطي من كتر ما البطاطس صعبانة عليكي !!! ..

تاسعا :

الفاكهة.. لو الفاكهة فيها بذر.. طلعيه من بقك بالراحة وحطيه ف إيدك وهي مقفولة.. وبعدين ف طفاية السجاير اللي ع الترابيزة.. اوعي ياحبيبتي من نظام التفتفة للبذر !!! .. إنسي ....

عاشرا :

ولما تخلصي أكل تحطي إيدك على بطنك.. اللي عصافيرها بتصوصو من العينات اللي كلتيها .. وتقولي له مش ممكن.. أنا عمري ما اتفجعت كدة..أنا قدامي أسبوع.. هابطل أكل فيه ... .وبعدين تمسكي الفوطة اللي دايمًا موجودة ع التربيزة من غير لازمة.. وتبوسيها.. قال يعني بتمسحي بقك..

وبعدين تستأذني منه لدخول التوليت لإصلاح ماكياجك.. وتخشي التواليت وتطلعي من شنطة إيديك .. لفة الفول والطعمية اللي جايباها معاكي !!!! ..

وبالهنا والشفااااااااااااا

****************************************

نهاركم مهبب !!! بقى احنا كده ؟؟؟؟؟؟؟ طيب طيب ماشى ماشى

إما دوقتكم المر زينا !!!
آياااااه يا كسكيلياه !!!!! أنا ف خدمة الشعب
ياللا اتفضلوا بالهنا و الشفا
لا و الله ما ينفع لازم تتفضلوا !!!!
حان وقت املاء التلة !!!!!! أن أن أن آآآآآآآآآآآآآآآآن

أولا :

بقى حضرتك لما تتنيل تاكل بلاش تهبش الفرخة اللى قدامك و بلاش اللحمة تنزل ف بقك زى الزتونة !!!! فيه حاجة اسمها شوكة و سكينة اتعلموها بقى


ثانيا :

و ياريت بعد اذنك بلاش تبلع الرز زى حبوب الشوكوبون !!!! و بلاش الأصوات الغريبة اللى بتسمعها البنات !!!! و نصيحة ماتشربش بيبسى مع الأكل لا الموضوع يتنيل أكتر !!! مش ناقصين

ثالثا :

المكرونة الاسباجتى معمولة عشان تدلعها و تتدلع و انت بتاكلها مش معمولة عشان تشفطها !!!! مفهوم ؟؟؟؟؟؟


رابعا :


العصير ابوس ايد اللى جابوك بلاش تشربه لآخر نقطة !!!!!! و تخلص الكباية ف أقل من الثانية ... انت مابتشربش مية يا ابنى ؟؟؟؟ ده عصير أنا عارفة انك متعرفوش اوى بس معلش بكره تتعود عليه !!!! هاهاها


خامسا :


ربنا يكرمك ماتمدش ايدك ف طبق السلطة الخضرا نهائى و تحسس اللى قدامك انك بتدور على حاجة تايهة !!!! بلاش قرف بقى كله بالشوكة


سادسا :


سلطة الطحينة او سلطة بابا غنوج او حتى الملوخية ماينفعش تغمس بالعيش و كده !!! اياك تمد ايدك ف الطبق نهائى أنا بحذركم !!! بالمعلقة يا حياتى ابقى اعمل كده عند بيت ماما مش قدام البنت المسكينة !!!! هتخليها ترجع كده


سابعا :


السمك طبعا مشكلة زى ما قال فبلاش تتفزلك و تطلب سمك قدامها !!!! هيا تطلب سمك ماشى احنا بنعرف نتصرف اطلعوا انتوا بس منها و هيا تسلك


ثامنا :


الفاكهة و خصوصا المانجة اياك تلحسها زى الايس كريم و تقعد بقى تمصمص و تلحس ف صوابعك !!!! المانجة حضرتك تقسمها نصين م العرض او م الطول اللى يريحك المهم تتاكل بالمعلقة و بلاش تقعد تحفر فيها و كانك هتطلع بترول !!!! ارحموا بقى


تاسعا :


فيه اختراع قديم اسمه فوطة بلاش تمسح ف الجاكيتة و لا ف قميصك المبقع !!!! و كل ما تتوسخ ايدك امسحها ف الفوطة اللى جنبك ... اللى جنبك هه بلاش حول !!!! و تمسح ف فوطتها فتكره عيشتها و تكره اليوم اللى قابلتك فيه !!!


عاشرا و أخيرا :


بلاش غش و خداع حاول تتعود على فنون الاتيكيت مش تمثله قدام الناس و بعدين لما الفاس تقع ف الراس " هنوريك اللى عمرك ما شوفتو " على رأى روتانا !!!! حراااااااااااام حرام بجد نتصدم بعد كده صدمة زى دى ... آدينى قلت و ادينى بلغت ... مانا مانا ماناآآآآآآآآآآه

أنا شكلى كده هغير اسم البلوج ده من خواطر فتاة لخواطر فتاة مفروسة

إيمان

42 comments:

shermen said...

أيوه أنا معاكي على طول الخط أنا ضدهم دايما أنا لسه قايله فيهم بقين حلوين في مودونة ريري
روحي ألقي نظرة كده عليهم
http://r7oba.blogspot.com/
وكمان أحمد طاهر أعلن الحرب عليا
أسكتي اسكتي ده الموضوع طلع كبير
آل عاملين نفسهم اتيكيت آل

فكرتيني لما كنت مخطوبة ولما خرجنا مع بعض والله لففني البلد مشي ساعتين على رجلي ولما وصلنا الكافيتريا الحمد لله كانت نضيفه وطلبنا الأكل رغم أني كنت جعانه لكن ما قدرتش أكل نفسي أتسدت لما شوفته بيلف البيتزا بإيده وبيأكلها على طول وأنا بأكل بالشوكة والسكينة والله العظيم ده حصل لا و في الأخر بيطلب لنفسه كنز بقوله طيب مش تسألني إذا كنت عاوزة ولا لأ قالي بصوت غليظ مش أنتي طلبتي أكل رغم أنه طلب لنفسه ساندوتشين جمب البيتزا شوفتي الطفاسه
وعاملين نفسهم اتكيت آل
أسكتي ما تفكرنيش ده أنا كرهت نفسي يومها

سلام يا قمر
وأي أتحاد نسائي خوديني معاكي فيه

تحياتي

سندباد said...

انا مش عايز اكل خالص ماله اللبان كويس وبيسلي

Eman Eltaher said...

شيرمين :

ههههههههههههههه
ألذ شيرمين حقيقى يا خبر أبيض ايه اللى يلف البيتزا ده ؟؟؟؟؟؟

هوا ايه صباع سجق ؟؟؟؟؟؟

طب كويس انى ماكنتش معاكم كنت بهدلته و نسيته البيتزا أصلا و خليته ميفتكرهاش تماما

يخرب بيت ام الطفاسة اللى هوا فيها !!! ده مش ناقص يعد الأكل على الناس

يبدو انه كان كريم حبتين

ياللا احمدى ربنا و المصحف انه راح لحال سبيله مركب اللى تودى ماترجعش أبدا و النبى !!! لانه بجد لما يحصل كده و انتوا لسه مخطوبين امال هيهبب ايه بعد الجواز ؟؟؟؟؟؟؟

حقيقى الحمد لله تقوليها كتير

و صدقينى ميستاهلوش اسألينى أنا

صحيح انا صغننة - مش صغننة أوى يعنى - و لسه مطلعتش م البيضة بس عارفة برضه نماذج جميلة بشوفها قدام عينى

يخرب بيت ام النماذج اللى بشوفها

ف أى مكان ف الشارع ف التلفيزيون ف أى مصيبة مبيعتقوش

أنا معاكم ف أى حلف يا قمر خودينى انتى و النبى لحسن أنا شكلى كده هتبهدل م الموضوع ده !!!! لكن على مين اختك برضه مش سهلة

تحياتى يا ألذ شيرمين

__________________________________

Sendbad :

ههههههههههه
و النبى حتى اللبان لازم يتاكل باتيكيت

البق يبقى مقفول و من غير صوووووووووت

هههههههههه
مظبطاكم انا ع الآخر ... معلش استحملونى شوية

قرف الامتحانات لازم أطلعه ف مدونتى

تحياتى ليك جدا

sakayar said...

طيب ما الراجل عنده حق ... انتي متضايقة لييييه؟؟؟
روميو

Anonymous said...

على فكره انا من محبين فنون الاتيكيت جدا ، يعنى بحس بالاتيكيت ان الانسان بيشعر انه انسان ، بس مش الاتيكيت فى الاكل مش مهم اؤى ، لكن الاتيكيت فى التعامل والكلام والمشى والحركه والاسلوب والنظره كلها حاجات مهمه جدا بتشعرك بقيمة اللى قدامك خاصة فى البنات طبعا .

تحياتى ,,,

shermen said...

الحمد لله طبعا
المركب اللي تودي
يابنتي ده انا جالي اكتئاب بسببه

أحمد العربي said...

يا مسهل
فالنستعد للحرب
//
اولا ازيك يا ايمان وازي احوالك دايما كدة بتنزلي مواضيع سوبر لوكس والله احلي من صابون مني زكي

المهم اية بقي الحكاية
اتيكيت اية وبتنجان اية
صلي علي النبي
يعني مثلا هتقنعيني ان لو اتخطبتي لواحد مش بيلف البتزا بس لا ده بياكل الرز بايدة زي بتوع السعودية
مش هتوافقي علية
اتحداكي
البنات دلوقتي ملهوفة علي الجواز تقولي الولاد هايخلصوا بعد اسبوع
والله مرطرطين علي القهاوي زي اللب في الشتا
نرجع بقي لموضوعنا
انا شايف ان الانسان المفروض يبقي علي طبيعتة
بس في المقابل يحاول يصلح من طبيعتة
لان الحياة الزوجية لازم تتبني علي الصراحة من البداية يعني الواحدة ما تتجوزش واحد وهي فاكراه عمر الشريف ويطلع بعد كدة توفيق الدقن
زبعدين انا عايز اسال سؤال مين في مصر بياكل الرز بالشوكة
والله مرة حاولت وكان المنظر مش لطيف خالص
المرة الوحيدة اللي عشت في دور السفير كان خالي اللي بقالة فترة بيشتغل برة ومتجوز وحدة صينية وبعيد عنك واخدة قلم في نفسها قبل ما تيجي بعتت قايمة بالاكل اللي نعملهولها والله لفيت علية انا وبابا تقوليش بنلف علي عيل تاية
اكل غريب وحاجات عجيبة
تصدقي ان جبنالها نوع من الرز الكيلو ب 210 جنية يعني مرتب شهرين من مرتبات الشباب
المهم لما جات وكلت طبعا كان في تنبيهات من ماما قبل الاكل
اهمهم اوعوا تشبعوا ....لقمتين واخلصواوتاكلوا وكانكم بتاكلوا سم
تاتا تاتا
وبشويش
المهم جة الاكل
ونفذا المطلوب بكل دقة
وعدة العزومة علي خير
الرز بالشوكة واللحمة بالشوكة والسكينة
وطبعا وسط الاكل الحاجة الساعقة اللي في كوباية ملفوفة في منديل
وسبحان الله الاكل خلص في اقل من 10 دقايق علي الرغم ان الترابيذة كانت ......مليانة بطريقة غريبة ..اصناف اول واخر مرة تتعمل في بيتنا زي اصناف شريف بتاع النيل للاسرة والطفل المهم
الموضوع لطيف بس اوفر شوية
وتحياتي

بسمه عبدالباسط said...

مع أن كل مواضيعك بتكون طويلة بس بحب دايما أكملها كلها
أتيكيت مين والنبى لما تعملى ليهم ايه مفيش فايدة

Anonymous said...

بصي يا ايمان هقولك علي حاجه
لو فيه توافق فكري وطبقي

مفيش حاجه اسمها اتيكت كل واحد بيبقي علي طبيعته
ومفيش احسن من الطبيعه اما بخصوص الحرب علي المراه فانا شايف ان المراه واخدها حقوقها كامله متكامله في ظل الاسلام واحسبيها وقوليلي

اسكندراني في الغربة said...

لو الجوازة وقفت علا الاتيكيت يبقا محدش حيجوز في سنتو
ولو مطلوب انحنا نمثل في علا بعض علاشان ندبس بعض بردوا مش حل
ولو جت علا خروجةالاختبار بتاعت الغدا برة دي يخلوها في البيت علاشان يبقا علا عيناك يا تاجر بدل فضايح الي ميشتري يتفرج
امممممممممم علاشان كدة الجواز العرفي هو الي ماشي في مصر --شفتي حد بيجوز عرفي بيعمل اختبار اتيكيت الاول
لأ طبعا بيبقا عاوز ينجز ويأديها كتاكيت مش اتيكيت

Anonymous said...

ايه يا ايمو خفه الدم دى بجد موضوع سكر انا مش ادره امسك نفسى من الضحك هاهاهاها والأ الحته بتاعه العيش والشوربة عايزة اقولك انتى خرجتينى من ضغط الامتحانات وعجبنى جدا لما قولتى ان الطرفين يكونوا واضحين مع بعض من الاول والاهم يتعملوا على طبيعتهم وان كانو مكسوفين منها يغيروها
والمهم يكون الاتيكيت فى اسلوب التعامل مش فى الاكل بس لانهم مش هيكلوا
24 ساعه
اميرة

MaMaDo said...

طبعا لازم البصمه بتاعتكو يا معشر النساء الى ضد الراجل

و بعدين الموضوع ده كان على الستات بس

بس انتى نسيتى حاجه
انه مش تأكل كتير لاحسن تفضحكو يا معشر النساء
هى تعمل ايه تجيب لفتين الطعميه فى الشنطه بتاعتها
تاكل لقمتين قدامه ال يعنلا البنت شبعت و تقوله لو سمحت بس

هصلح الميكب
دا وقت ايه
هصلح الميكب

ال يعنى مش عرفين الميكب
ميحكمش و ان حكم مفيش انذرات


و لما تدخل الحمام تأكلهم بقى
و بعدين لما تروحى ابقى كملى ياقى الشندوتشات الى معاكى



سيبو الرجاله فى حلها بقى
متخلوناش نعلن الحرب

basma saghir said...

والله يابنت يا ايمي انتي دماااااااااااغ جامدة قوي..ربنا يقويكي يا اختشي عليهم
بس والله انا طول عمري مش بظلط ولا بهبش ولا بحشر خالص خالص..ده انا حتى باكل حباية العنب على 6 قطمات
وحشاني يابنت والله

مصطفى حسان said...

البوست جااااااامد بس انا ليا سؤال واحد .. يعني إيه يهبش ويزلط ؟؟
إيه الألفاظ الغريبة دي .


وبعدين انتي مش بتتكلمي عن بشر .. ده انتي بتتكلمي عن كائنات غير آدمية بالمره .. والله يا بنتي احنا مش كده خالص

Eman Eltaher said...

Sakayar&romio :

نعم حضرتك ؟؟؟ متضايقة ليه ؟؟؟
لا متضايقة و لا هتشل و لا أى حاجة

ماشى ماشى يا سى روميو

__________________________________

Karim :

كلامك بجد بيضيف دايما للبوست حاجات مفيدة
عندك حق الاتيكيت أكيد مش ف الأكل بس و لكن اهم حاجة انه الانسان يتعلم الاتيكيت عشان يطبقه ف المواقف المختلفة
الاتيكيت ف التعامل و كل حاجة زى ماقلت ... بحيييك على اضافتك

تحياتى ليك

__________________________________

Shermen :

الحمد لله بجد يا شيرمين ميستاهلش انه يجيلك اكتئاب عشانه
يا بنتى احنا مش ناقصين

خلى البيتزا تنفعه بقى

أرق تحياتى ليكى
_________________________________

أحمد العربى :

مواضيعى أحلى من الصابون ؟؟؟ ده انت كارمنى أوى يا احمد يا عربى

بقى حضرتك أنا أصلا مش هفكر و لو مجرد أفكر انى أتخطب لواحد بياكل الرز بايده
ليه اتحولت ؟؟؟ و بعدين ده توابير توابير !!!! فمش هختار منهم غير ده

و بعدين على رأيك الرجالة على قفا مين يشيل !!!!! زى اللب ف الشتا

شكلك هتولع فيا
طب استنى اولع فيك أنا الأول

رز ايه حضرتك اللى ب 210 جنيه ؟؟؟ ليه جواه هدية دهب مثلا ؟؟؟

ماشى ماشى هعديها المرة دى بس مش عشان المرة الجاية تقوللى كيلو اللحمة الصينى ب1500

ساعتها الله أعلم هعمل فيك ايه !!! اوكيه ؟؟؟

لأ و بعد كل ده منقعدش ع السفرو غير 10 دقايق !!! يعنى يا دوبك نقعد و بعديها نقوم بقى عشان نلحق نغسل ايدينا !!! حاجة فعلا تشل

على فكرة أنا مقصدش بالموضوع بتاعى الاتيكيت اللى يعقد !!! مفيش حد بياكل ف بيته الرز بالشوكة و لا حتى قدام الناس الا لو كان مضطر و مفيش معلقة زى ما حصل معايا مرة !!!! المهم أنا أقصد الاتيكيت اللى لازم يتعمل بحيث محدش يقرف م الشخص اللى قاعد قدامه

أنا بحييييك و بشكرك على تعليقك اللذيذ ده و نصيحة متقلبش ف مدونتك وطنى و سياسى كتير

مش لايقة عليك !!! ههههه

خلاص انا ماشية

ما قلنا ماشية

لا لا انا همشى بكرامتى أحسن

Eman Eltaher said...

Bosbos :

عندك حق فعلا يا بوسبوس مفيش فايدة فيهم !! يالا معلش بقى هنعمل ايه

على فكرة انا مقصدش خالص انه مواضيعى تكون طويلة بس و الله بتيجى كده ... عموما انا بجد فرحانة ان انتى بتحبى تكمليها و انه ناس بتحب تكملها

تحياتى ليكى جدا

_________________________________

أحمد الهادى :

كلامك صح و عين العقل يا أحمد ... فعلا طالما فيه توافق فكرى و طبقى مش هيكون فيه حاجة اسمها اتيكيت لانه مش هيبقى فيه معاناة من الطرفين و طبعا الاتيكيت ف الأكل مش مهم أوى زى الاتيكيت ف التعامل بشكل عام

بس برضه مهم عشان المظهر العام و مش بقول انه يكون تمثيل !!! لأ طبعا أقصد انه الانسان يتعلمه بحيث انه يكون بعد كده جزء من طبيعته ... ومش بقول الاتيكيت اللى يعقد !! أقصد الاتيكيت البسيط العادى بتاعنا

بخصوص حقوق المرأة ... الاسلام حافظ حقوق كل انسان سواء كان امرأة أو رجل بس للأسف اللى ماشى ف المجتمع و معتقدات الناس غير كده تماما

فكرتنى ببريد الأهرام الجمعة اللى فاتت قريت واحدة كانت بتعلق على راجل كاتب مقالة عن " ما يرفضه الرجل !!! " و كان كاتب حاجات بشعة بشعة بشعة فيها استحقار واضح بقيمة المرأة و أهميتها ف المجمتع !!! بس طبعا البنت اللى ردت معتقتوش وبهدلت بكرامته الأرض !!!!! و ف الآخر امضاء " امرأة مفروسة "!!!! انا مفروسة برضه

بشكرك على تعليقك المفيد ... وتحياتى ليك

__________________________________

اسكندرانى ف الغربة:

نعم حضرتك ... يعنى المفروض انه يكون فيه اتيكيت و لا المفروض ميكونش فيه ؟؟؟

انتوا أكيد عايزين تجننونى ؟؟ أنا و الله مقصدش الاتيكيت اللى يعقد !! انا أقصد الاتيكيت الطبيعى بتاعنا
و بعدين ايه الجواز العرفى ده ؟؟؟ يا ابنى أولا هو مش جواز شرعى .. ثانيا مفيش حد فيهم هيهتم بالاتيكيت لانهم متجوزين لهدف أيا كان الهدف ده !!! و الجواز المصلحى – ده على اعتبار انه جواز – عمره ما بيكمل أبدا

تحياتى

__________________________________

أميرة:

نورتى مدونتى و الله ... انا بجد فرحانة جدا انه تتابعينى و الحمد لله انى خرجتك من جو الامتحانات

أنا قصدت انى اكتب حاجة ليها حس كوميدى عشان الجو المتوتر ده يخرجنى من المود و يخرج الناس منه

بشكرك بجد يا أمورتى على كلامك الحلو و فعلا انه أهم حاجة انه الانسان لو مش عجباه طبيعته و مش عاجبة الناس يحاول يغيرها

و اهم حاجة طبعا الاتيكيت ف كل حاجة مش الأكل بس لانه زى ماقلتى أكيد مش هياكلوا24 ساعة

أرق تحياتى ليكى

Eman Eltaher said...

Mamado :

يا نهار أبيض يا مامادو !!!!! ايه ده بتهزأنا علنى ؟؟؟؟؟

الموضوع كان مكتوب فعلا للبنات بس انا طبعا مش هسيب الولاد يفرحوا فينا !!! لاوم يدوقوا المر زينا

و لا ايه يا مامادو بيه ؟؟؟؟

ماشى ماشى بقى احنا كده ؟؟؟

طيب طيب شكلنا احنا اللى هنعلن الحرب عليكم

أى خدمة

تحياتى ليك و امرى لله

_________________________________

بيسوو :

انتى اللى وحشانى جدا و الله و دوختينى عليكى ... قعدت فترة طويلة كل شوية أدخل مدونتك أقول يمكن البنت ترد ع الناس أو تكتب حاجة جديدة مفيش فايدة و بعدين الحمد لله اطمنت عليكى انك بخير لما كتبتى انه بسبب أعطال

غيبتى كتير أوى يا بيسوو
بجد كنت مفتقدة خفة دمك و تعليقاتك اللذيذة جدا

وقلت اذا الشباب أعلنوا الحرب عليا مثلا مين هيقف جنبى أولا زى بيسووو !!! هههههه احنا متبهدلين خالص يا بيسووو

بس شفتينى و انا ببهدلهم ؟؟؟؟ ههههه

كله هييجى على دماغى

متغيبيش تانى يا قمر

أجمل تحياتى ليكى

_________________________________

Darsh :

ايه يا درش يعنى ؟؟؟؟

يعنى انت سيبت الراجل يقولنا "نلحس و نمصمص " !!! ؟؟؟ و حضرتك بتسألنى يعنى ايه الكلمات دى ؟؟؟

دى أقل حاجة و الله

و بعدين ما هو م الناس !! هو انا يعنى اللى هألف الكلمات دى ؟؟؟؟
فكرتنى بالفيلم بتاع " أحلى الأوقات " و اصحاب حنان ترك بيسألوها انتى جبتى الكلام ده منين و انتى من المعادى ؟؟

أنا برضه من المعادى ما دى المصيبة

و عمر ما الكلام ده اتقال ف أسرتى أبدا مستحيييييييل

أنا بسأل نفسى نفس السؤال !!! هو انا بجيب الكلام ده منين ؟؟؟؟؟؟؟
ياللا ما يضرش ... اهو الشئ لزوم الشئ !!!! عشان أعرف أغيظكم

هههههه تحياتى ليك بقى

إبـراهيم ... said...

يخرب بيت فقرك يا إيمي ، ده إنتي طلعتي حكاااااااااااااية .... إيه يا بنتي الجنان ده كللله !!!! ، بقى الرزز بيتاكل بالشوكـة ؟؟؟؟؟
.
.
عارفة ، من زمااااااان مادخلتش مدونتـك ، فعلاً وحشتني .........



تحياااااااتي ليكي يا قمـر

Ehab said...

مع احترامى لقدرتك على الكتابة والتأليف بس الموضوع اللى الرجالة كاتباه اظرف بكتير يعنى الصراحة مفيش وجه مقارنة
:)

أخف دم said...

ازيك يا ايمى
أنا مش عارف أصلا إيه الاصناف اللى انت قايلاها دى عشان أعمل معاها الاتيكيت ده .. مش تجيبى اصناف تتاكل يا شيخة .. وبعدين مين قال لك انى هاعزم خطيبتى على مطاعم من النوعية دى .. مش عشان البخل لا سمح الله بس عشان أنا عارف ان احنا هنفضح نفسنا ..
عموما مفيش أحسن من ربع كباب وكفتة .. كل واحد ياخد صباعين بإيده ويديها وربنا يكرمنا ان شاء الله

MaMaDo said...

توضيح الرأى زى كل مره

انا اهزقك
فشر
هى القطه كلت ولادها ولا ايه

بس الرجاله تعبت
مش مبطلين انتو هجوم علينا مع ان اللااجل يعنى بيرجع غلبان من الشغل مش قادر يقول السلام عليكو
و بيترمى زى الفسيخه المبلوه
و انتو مش سكتين بره
نشتغل رقصات يعنى عشان نرضيكو

وشى احمر و عنى قلبت على اخضر و هقلب على مجنزر

ده مش ينفى ان البوست حلو

تحياتى ليكى


و ارفع القبعه عشان اهرش و البسها تانى

Anonymous said...

يااااااااااااااااااااااا يا يمان بجد انا قعت اضحك للصبح بجد موضوع جامد والجزء لاولانى كان جامد مووووووووووت
وثانيا فى واحده كتبه فى التعليقات انها كانت خرجه مع خطبها وكل البيتزا بايديه قوللها ان الاتيكيت بتاع اكل البيتزا كان بلايد الفلحين بس الى بيكلوا البيتزه بالشوك والسكاكين وقللها انها تسال اى حد عايش بره لما بيكللوا البيتزه بيكلوها ازاى وبره دى مش معاناه انها تسال حد من القاهره لان القاهره بالنسبلها بره وعلى العموم الموضوع جامد وانا اطلب من كل بنت انها تسمع كلام الشاب الى كان كاتب الجزء لاولانى وبليز يا ايمان قوللنا اسمه ايه عشان نشكره

هشاااااااااااااام

Anonymous said...

وثانيا يا ايمان انا حساس ان لاتيكيت ده حاجه غلط ازاى تكلى بايدك الشمال لاكل انتى ممكن تقطعى لاكل بايدك اليمين بعد كده تقلبى وتمسكى الشوكه باليمين وتكلى
وانتوا عملين زى الهبل قعدين تقلدوا الغرب فى اى حاجه يبنتى شوفى الحاجات الحلوه التقدم الى همه فيه بدل ما تقعدى تبصى لخطيبك ان كل الاكل بالشوكه والسكينه ولا لا بس على العموم ياريت انتى الى متسكسفناش ومتعرفيش تكلى بالشوكه والسكينه والله يرحمه يا ايمان مكنش بيعرف يمسك المعلقه اصلا

Anonymous said...

هشششششششششششششششما م كنت نسيت اكتبهاااااااا

Anonymous said...

تعرفى انتى بتفكرينى بفلم محامى خلع ده مستفز بيشخر وهوه نايم وانتوا لو شفتوا هتلقوا نفسكم فيكم عيوب وبدل ما يخدك ويعزمك بره اتجدعنى انتى واتعلمى كام طبخه واكليه فى البيت واقعدى بصى عليه برحتك حقيقه بنات فضيه والله العظيم انا لو خرجت مع خطبتى ولقيت دماغها فضيه زيك كده او زى البتنجانات التنيه كنت ورتها لاتيكيت وعلى العموم يا ايمان عوزك تبقى تورينا عملى ازاى الواحد ياكل يااااااااااااااا بتنجانه

هشااااااااااااااام

Anonymous said...

منيكب ايه الى هتصلحيه ايش يعمل المشاط فى الوش العكر وعشان تعرفى ان كل حيات البنات عباره عن مظاهر وثانيا مستوا الجمال فى مصر مش محتاج ميكب محتاك دكتور تجميل عشان يعرف يعمل حاجه فى البنات المصرينعلى العموم حولى تنصحى البنات انها تحط ميكب ممكن يجى بفيده


هشااااااااااااااام

Anonymous said...

على العموم يا ايمان انتى مش محتاجه ميكب انا عمرى مشفتك بتحطى ميكب بس برضه زى القمر فى كل حاجه ده نوع من انواع الغزل ايه رايك عشان تعرفى ان الولاد بيعرفوا بيثبتوا حلو على العموم انا قولت اشترى حياتى بدل ما اضرب تانى يوم فى الكليه


هشاااااااااااام

Anonymous said...

حلو اوى اخر كام كلمه انك هتخليه يقرا المدونه صحيح يا ايمان هوه لوخطيبك منفز الى انتى كتباه وكل عادى هتقوليله فركش الخطوبه على العموم كل البنات بتقول كده بس اول ما بيجى ما بتصدقواااااااوالله ولو ميكانيكى بس هوه يجى بس ونشوف هتعملى ايه والزمان بينناا لما نشوف انتى ولا خطيبك الى هيمشى كلامه على التانى انا لو خطبتى عملت كده معايا وحيات امى وانا فى المطعم اوريها لاتيكيت ازاى بالجزمه سورى اصدى بالشوز اصلى عرفكم من بره هلله هلله ومن جوه يعلم الله

هشاااااااااااااام انا هسمى البيك نيم بتاعى الرجل المنتقم

Eman Eltaher said...

إبراهيم:

ها ايه رأيك ؟؟؟؟
المدونة على آخر موضة

فاتك مواضيع كتييييييير
خصوصا ازاى تطفشى جوزك

ابقى اقراه

و مادام المدونة عجبتك الحمد لله يبقى تزورها علطول

تحياتى ليك

________________________________

شريف :

و يعدين بقى يا عم شريف ؟؟؟؟
ايه التهزيئ ده ؟؟؟؟ ارحم

بقى أنا واخداكم غسيل و مكوة ؟؟؟؟
طب يبقى لسه برضه
ناقص أعلقكم من قفاكم ع الشماعة

يخرب بيت نصايحك !!!! آل ماتجوزش آل
اللى هيتجوزنى مش هيعرف أصلا يطلع عينى
امال انا روحت فين ؟؟؟؟؟

ههههههههههههه
لا و الله خليتنى بعبع !!!! دا انا أصلا غلباااااااااااان جدا و أميرة خالص

اتهد انت بقى
انت و حلفاءك من الرجالة المتبهدلين

تحياتى ليك و امرى لله

_________________________________

Casper :

يالهوى ع الانحياز !!!!! ايه الانحياز العلنى ده ؟؟؟؟؟؟

يا بولييييييييييس

الحقونى يا بنات

ايه محدش هيسأل فيا ؟؟؟؟؟؟
طب ياللا بقى عشان هرش مية

تحياتى ليك عشان الثواب و خلاص

Eman Eltaher said...

الشاعر والأخف دم اشرف :

منورنى يا اشرف و الله
أنا عارفة ايه ده ؟؟؟ ايه الأصناف دى ؟؟؟
سيبك انت
فين الفول ؟؟ فين العدس المسبك ؟؟؟
المسبك ؟؟ عادى عادى عديها

فييييييييييين المسقعة ؟؟؟؟؟

عندك حق
عارف .. مفيش أحلى من الاتيكيت برضه

هههههههههه
مهما تحاولوا مفيش فايدة

بدل ما تقف معايا يا أشرف ؟؟؟؟
ماشى ماشى

طب هات بقى صباع كفتة و بلاش تنزل حتتك بتتك ف الكباب
هههههههههههه

رخمة صح ؟؟
مفيش داعى ترد

اعظم تحياتى ليك

__________________________________

Mamado :

يخرب عقلك يا مامادو
بقى بترفع الطقية عشات تهرش و تحطها تانى ؟؟؟

ههههههههههههه
ايه يا ابنى ده ؟؟؟

انا كده هفطس على فكرة

أنا شكلى برضه هقلب
بس على مخلوق فضائى

وبعدين ايه يعنى لو الزوج يرضى مراته و يشتغلها رقاصة ؟؟؟؟

ههههههههه
هيبقى شكلكم تحفة !!! و تيجى الستات بقى و ترمى عليكم شئ و شويات

هههههههههه
شكلك هتولع فيا

تاكسى
تاكسى
تاكسيييييييييييى

__________________________________

هشام :

انت جيييييييييت يا سبع البرمبة ؟؟؟؟

شعقول شعقول منور المدونة كلاكيت تانى مرة

و انا برضه بقول ايه النور ده؟؟؟؟؟؟
دى على فكرة تالت مرة أكتب فيها ردودى ع التعليقات و الكبيوتر يهنج

صدفة صدفة علا الله بقى

ايه يا هشام ؟؟؟ انت مش ناوى تتهد شوية

يعنى السندويتش بينزل ف بقك زى الزلقان و سكتنا

يعنى بتكون المجموعة كلها ف نص السندويتش و انت ف تالت واحد و اتكتمنا

لكن بقى انك تهزأنا ... ده اللى مينفعش يتسكت عليه

وبعدين انا نفسى أعرف هو الكلام ده موجه ليا حقيقى ؟؟؟

شكلك مش هتكتم غير لما أقول للى بالى بالك و ساعتها ابقى قول على نفسك يا رحمن يا رحيم

هههههههههههههه
اصلكوا مابتجوش غير بالعين الحمرا

أنا تقوللى ايش يعمل الميكب ف الوش
العكر ؟؟؟؟
أنا ؟؟؟؟؟؟؟؟؟؟؟؟؟؟؟؟؟؟

سبحان الله

و انا اللى أصلا مابحطش ميكب عشان انا مش محتاجة أصلا انى أحط الحمد لله

ماشى ماشى

أنا تقوللى مابنصدق يجيلنا عريس ؟؟؟؟
طب أقول ايه و انت اللى عارف القدرة و العدس اللى فيها

قصدى الفول

وشايف بعينيك اللى هياكلها الدووووووووووووووووووود انى الحمد لله محبوبة من الكل تقريبا
و انه توابير توابير

على يددددددددي
صح ولا مش صح ؟؟؟

و على فكرة ده مش على سبيل التفاخر
أبدا و الله
بس عشان الهم اللى انت كاتبه ده لو حد قراه هيصدقه بجد

و هتبقى الصورة اللى واصلالهم وحشة جدا
عكس الحقيقة تماما

حسبى الله و نعم الوكيل

و بعدين مين ده حضرتك اللى ماكانش بيعرف يمسك المعلقة أصلا
؟؟؟
ده حد كنت أعرفه يعنى ؟؟؟؟؟؟
أكونش ارتبطت و انا معرفش ؟؟؟؟؟؟؟؟

ايه انت بتاكل ايه يا ابنى بيعمل فيك كده ؟؟؟
يا حول الله

و بعدين ايه الراجل المنتقم ده ؟؟؟
هو فيه بينى و بينك تااااااااااااااااار ؟؟؟؟؟؟؟؟؟؟

يعنى بتمدخ فيا ف الكلية و بتطربقها ع المدونة ؟؟؟؟؟؟

كويس انك صلحتها ف الآخر عشان كنت هتبقى مستغنى عن روحك

يا ابنى الاتيكيت اللى محتاج تتعلمه - دهه غير موضوع الأكل خلينا ساكتين !!!!! - محتاج تتعلم ازاى تكلم البنات عدل و تخاف على نفسك


و مش أنا بقى اللى هعلمك الاتيكيت
هيا هتعلمك الاتيكيت على اصوله
و ابقى قووووووووووووول حرمت

ابقى ورينا شطارتك انت بقى

و بلاش رخامة بلييييييييييييييز عشان المدونة تعبت
مش هيبقى انت و الامتحانات

تحياتى ليك و خلاص عشان الثواب و كده

Anonymous said...

اولا انتى هربتى من السوال الى انا ساله هل الاتيكيت لو تعارض مع حاجه مع اسلمنا هتفضلى مين بدل ما تحرضى الناس انهم يكلوا يشمال عشان اعجب حضرتك وابقى من الطبقيه الى انتى رسماها فى دماغك انتى والبنات الى ملهمش لزمه الى يفكروا فى الحاجات دى ومحسسانى انى هروح اخطب بنت من السرايه واخليها تهرب معايا بلا قرف ما احنا عرفين الى فيها انا من راى علميهم حاجه مش غلط وعلميهم الطاعه العمياء للزوج


هشااااااااااااااااااااااااام

Anonymous said...

انتى الى طلبتى انى ادخل تحملى بقى انا كنت ساكت ومبدخلش


هشااااااااااااااااااااام

Anonymous said...

هههههههههههههههههههههههههههههه احله حاجه بتعجبنى فى المدونه دى انى بعرف ازاى انرفزك كويس وببقى مبسوط اوى وبحس انى منتصر


هشاااااااااااااااام

Anonymous said...

ثانيا اتعلم ازاى اتعامل مع البنات فين البنات دول انا جمبكم ابقى منرى منروا والحمدلله انا بعرف اتعامل مع البنات وانتى عرفه كده كويس على العموم يا ايماااااااان انا بس بحب انرفزك وبس واوعى تزعلى منى انا بجد بعزك اوى وبجد انتى زى ما قولت قبل كده انتى ارق بنت شوفتها لغايط دلوقتى وبجد انسانه حساسه اوى وده غلط اوى الايام دى

ومتزعليش من كلامى كده انا بكلم كده من معزتك عندى


هشاااااااااااااااااااام

Anonymous said...

ولو على قطع الكمبيوتر المشكله مش فيه ربنا بيبقى عالم بالى فى قلبك وعارف انك عاوزه تشتيمينىوعلى العموم البرجرامر الشاطر الى بيعرف يضبط الكمبيوتر بتاعه كويس وثانيا فكى عن الكيس شويه وهاتيليك كمبيوتر عدل شويه



هشاااااااااااااااام

Eman Eltaher said...

هشاااااااااام :

انت يا ابنى مش بتتهد أبدا ؟؟؟؟؟؟؟؟
التلاجة بتفصل
افصل بقى ربنا يخليك
أنا فعلا كنت استغربت انه بقالك موضوعين مابتردش وقلتلك و اللى طلع من بقى يا هشام بيه انه ابقى اقرا الموضوعين و مفيش داعى تعلق لو مش فاضى

و بينى و بينك انا كنت بدعى تكون مش فاضى !!!!! هوا فيه حد بيجرى على تهزيئه ؟؟؟؟؟؟؟؟؟؟؟؟

ارحم بقى
انت ايه مابترحمش ؟؟؟؟؟؟؟؟؟؟

ليه يا ابنى غاوى تحرق دمى و تنرفزنى ؟؟؟؟؟؟؟ هوا انا عملتلك حاجة لا سمح الله ؟؟؟؟؟؟؟

يا رخامتك بجد

و بعدين انا مقلتش انه الناس تاكل بايديها الشمال
لانه ده أكيد بيتعارض مع اسلامنا

الناس يا ابنى المفروض انها بتقطع الأكل بالسكين ف الايد اليمين و تروح سايبة الشوكة و تتنيل بالايد اليمين برضه

يبدو انك محتاج كورس ازاى تاكل بالشوكة و السكينة !!!!!!! ههههههههههه

اشمعنى انت يعنى ترخم

و بعدين بتقوللى محسسانى انى هخطب واحدة من السراية !!! هيا أكيد مش هتبقى من سراية لو هتوافق ع الجوازة !!!!! هههههههههه

واضح انك متبهدل ع الآخر

معلش ملحوقة

بعض من عندكم بقى

و بعدين انت بتتكلم عليها بالشكل ده ؟؟؟ طب أنا بقى هقولها تشوف شتيمتها بعينيها

هههههههههههه
و تبقى عامل زى الفرخة المسلوقة

ههههههههههههههههه

لأ و الله مليش حق
بيبقى عندى النية انى أشتمك و احرق دمك ؟؟؟؟

المفروض طبعا انى آخد الكلام اللى يحرق دم اى واحدة بمنتهى السلاسة و الابتسامة العريضة تبقى متلقحة على وشى ؟؟؟؟؟؟؟؟؟

اعتق بقى

طبعا انا المفروض اتى أتبع نفس اسلوبك

و بالتالى

فانا بعد الكورس الفظيع اللى أخدته

دش التهزيق يعنى

لازم بقى أصلح زى ما بتعمل ف الآخر

البوقين اللى ملهمش أى لازمة

ماشى ماشى

خد عندك

انت لو لسانك يتعدل هتبقى كويس و الله
و تبطل ترخم على خلق الله
بدل ما أقولها و حيات أبلة نظيرة

و تبقى ساعتها القشة التى قسمت ظهر البغل

احم احم أقصد البعير

احم احم انت كويس و كل حاجة

أنا قلت أشترى نفسى برضه بدل ما اتبهدل بعد كده

أرجوووووووووووووك ربنا يخليك يارب ارحم بقى

david santos said...

هللو ، جميلة ema الطفل ، وانا ممتن جدا لعملكم جيدا ، عند انتهاء الاسبوع

Noony said...

إية يا بنتي
بالراحة كدة وخلينا نتفق على شوية حاجات من الأول

أولاً

أن النبي صلى الله عليه وسلم قال:
(من كان حالفا فليحلف بالله أو ليصمت).
الراوي: عبدالله بن عمر - خلاصة الدرجة: صحيح - المحدث: البخاري - المصدر: الجامع الصحيح - الصفحة أو الرقم: 2679

ثانياً

http://en.wikipedia.org/wiki/Etiquette

كلمة الإتيكيت ظهرت في القرن الثامن عشر فير بريطانيا عشان يميزوا بين الطبقات بعضها وبعض وازاي الناس تتعامل في المجتمعات المتكونة من شعوب مختلفة...وهي عبارة عن حبة قواعد غير مكتوبة بس متفق عليها دولياً بين الدول اللي بتتعامل بيها
مثلاً..من الإتيكيت إن السيدة الأولى للدولة (ماما سوزي يعني) متظهرش في المناسبات الرسمية وغير الرسمية غير يا إما ببدلة بنطلون وجاكيت يا إما بتايير جيبة وبلوزة....والجيبة لازم تبقى فوق الركبة
الإسلام قال كدة؟
ينفع إن إحنا نتبع الإتيكيت بالمنظر الأعمى دة؟
في حاجة تانية أرقى وأفضل كتير من الإتيكيت...هي آداب التعامل والحوار والطعام واحترام الغير
مينفعش نسيح دة على دة وندخل دة في دة وننسى هويتنا كدة

ثالثاً

كل شعب وليه عاداته وتقاليده
يعني، مثلاً، في بعض البلاد بيكلوا الرز بإديهم...عادي عاداتهم وتقالديهم كدة...وعندهم ان دي حاجة مش مقززة ولا مقرفة ولا منفرة...بالعكس لو جالهم ضيف يستحسنإنه يتصرف زيهم عشان مايبقاش عديم الذوق...وعشان كدة مينفعش من أساسه إن يبقى في حاجة اسمها إتيكيت

رابعاً

أنا معاكي إن اللي كاتب الكلام دة واحد مفروس..بس مش معنى كدة ان احنا نرد عليه ونفرسه زيادة ونشوف مين يفرس مين أكتر

لو عايزين فعلاً نوريهم غلطتهم ونعلمهم آداب التعامل، يبقى مش بالكلام بس...بالعمل
Actions are louder than words
عشان العمل أقوى وأكثر تأثيراً من الكلام

أنا عارفة إني طولت ودخلت في مواضيع جانبية شوية...بس مقدرتش أمسك نفسي
يا ريت متزعليش من كلامي لو كان تقيل شوية...ولو قلت حاجة غلط يا ريت تنبهيني

:)
نوني

Eman Eltaher said...

David Santos :

Hello David :
Welcome for the sacond time...
I hope you admiredthe new look of my blog.. By the way, I want to say that " ema " - that you said -is so new and so nice to my ears ...
Thank you for your word... & I'm much thankful for your interest in Arabic...
Regards,

__________________________________

Noony :

بداية كده انا أكيد مش هزعل منك لانه التعليقات معمولة أصلا عشان كل واحد يعبر عن رأيه بحرية حتى لو هينتقد غيره طالما ماكانش فيه تجريح

أنا معاكى جدا انه الحلفان بغير الله حرام و انا مش فاكرة حتى انى حلفت بكده و لما بصيت ف الموضوع تانى لقيت فعلا انى كنت على سبيل الهزار مش أكتر بقول و حيات أبلة نظيرة - ده على أساس انه فيه أصلا واحدة اسمها أبلة نظيرة!!! - بس ربنا يعلم انه ماكانش الحلفان ده مقصود " اليمين الغموس " و الله أعلم

ثانيا :أنا مقلتش خالص اننا نخالف تعاليم اسلامنا لانه الاتيكيت مش بيتعارض مع الاتيكيت لانه الاسلام مقالش اننا نقرف الناس سواء ف الأكل أو ف المعاملة او أى شئ ف حياتنا محتاجة اتيكيت و ف نفس الوقت مقلتش انه الناس تاكل بايديها الشمال - مش عارفة الراجل قال كده و لا لأ !!! هبقى أقراه تانى !!!! - بس عموما الاختلاف ف وجهات النظر لا يفسد للود قضية و احنا مختلفناش كتير لانه أنا أصلا مش عارفة وجه الاختلاف ف كلامنا احنا الاتنين

أنا برحب بيكى ف مدونتى صديقة دايمة ليها و يشرفنى أكون صديقة ليكى لو تقبلينى

تحياتى ليكى

اسكندراني اوي said...

يا ايمان الرحمه
مش قادر امسك نفسي من الضحك

هي المنجه دي اللي بتحيرني في العزايم والمطاعم

هي المنجه تنفع تتاكل الا لما تلحوس الدنيا

هههههههههه

بوست حلو تسلك ايدك

Anonymous said...

aolan taratak tohfa wa gamila wa sahla ama alatikat akid haga halwa bas fi nafs alwat fiha hagat tokhno wa aftkr ahsan haga alwastiea "kol ma hoa m3ol matlob" wa m3lsh ea akht eman zai mfi ragal bishrbo bsot fi bardo banat bishrbo bsot

Eman Eltaher said...

اسكندرانى أوى ك

أى خدمة و الله

و على فكرة انا دخلت مدونتك و دمك خفيف خالص

و فعلا المانجة دى مالهاش حل

تحياتى

_________________________________

Karim El Masry :

منور المدونة أولا يا كريم
و شكرا لذوقك

فعلا خير الأمور الوسط
و المعقول مطلوب
علا الاتيكيت فيه حاجات تخنق
خصوصا أكل الرز بالشوكة دى صعبة أوى

هههههههههههه
و الله عارفة انه زى ما فى اولاد بتعمل صوت ف الأكل فيه بنات برضه و عشان كده أنا كتبت للاتنين
و مرضيتش أكتب عن البنات أو الأولاد بس

راجل مجهول كان كتب لينا
و أنا رديت عليه
كده نبقى متساويييييييييييييين
صح ؟؟؟؟

يارب تعجبك المواضيع دايما

تحياتى ليك