ف حياتنا وحياة غيرنا بنشوف مشاهد كتير .. ساعات بنتمنى المشهد يكمل للآخر و ساعات تانية بنتمنى منكونش بدأناه !!!! ساعات أحداث المشهد تجرحنا .. تفرحنا .. و تخونا !!!! و ساعات من كتر الفرحة نشتاق لدموعنا !!! الحياة طويلة و المشاهد كتير... حبيت أدون كام مشهد من مجتمعنا .. و اللى يعرف مشاهد تانية ميترددش يكتبها
مشهد 1 : عادت كالغصن المكسور .. تحمل بين يديها رفات الزمن الماضى.. زمنا كان يضاهى الكون.. و اليوم .. أزهارٌ ذبلت و شموع ٌ ذابت .. أوراقٌ من حب الأمس تتناثر من فرط الحزن .. و صوتٌ من بعيد يناديها : ألا يا آمال امسحى دموعك !!! و اعملى ريستارت !!! بتعيطى على إيه بلا نيلة ؟؟!!! و لكن الصغيرة لازالت تبكى و تردد : معيش منديل .. معيش منديل !!!!!!!
********************************************
مشهد 2 : عاد يفكر و يفكر .. ترى أحلام الأمس تعود ؟؟ كيف لحب الأمس يموت ؟؟؟ ماذا الحب بغير هواها ؟؟ ترى أنساها ؟؟ و حنينه يتمزق لوعة .. يضرب رأسه ف الجدران .. و لسان حاله يتكلم : جاتنى ستين نيلة !!! لا عارف أرجعلها و لا عارف أظبط مع واحدة !!!!!!!!!!!!!!!
*******************************************
مشهد 3 : استيقظت بعدما أشرقت الشمس عن يوم ٍ جديد .. يوماً كان فى ذكريات الأمس محفوراً بين ثنايا العقل .. يوم ميلاد مَن كان يوماً رفيق دربها و أول مَن يطرق قلبها.. تتردد كثيراً .. ترتعش اللحظة .. و تقرر إرسال ( اس ام اس ) !!! تحمل بين سطورها قوة الصمود و براءة التهنئة و ضعف الجرحى.. كلماته الخالدة تطمئنها أنها لا زالت حبيبته التى لا يفكر سوى فيها.. صوتٌ يرن فى آذانها.. (هاتفه يدق هاتفها ) لا تصدق عينها !! ترد .. تتحجر أنفاسها ..يفاجئها قائلا ً : هو مين حضرتك ؟؟؟؟!!!!!!!!!!!!!!!!!
*******************************************
مشهد 4 : عاد يحمل سيجارته بين يديه.. تحترق أنفاسه من فرط الدخان .. تختنق الحجرة.. عيناه لا ترى سوى مراسم زفاف حبيبته .. كم أنذرته و كم خسِرها .. فى عينيه دموعٌ من ندمٍ باكى ، و فى راحتيه.. صورٌ من ذكرى الأمس.. و كيس شيبسى !!!!!! و بطاقة حب كُتب عليها : متنساش التورتة و انت جاى تتقدم يا حبيبى !!!!!!!!!
*******************************************
مشهد 5 : نظرت الفتاة إلى صديقتها.. مرتدية قناع الطيبة و الحنان ، و الحقد فى دمها يكاد يطل من عينيها.. تود لو تراها أقل منها جمالا و أفقر منها حالا .. هنا يقوم "شوشو" ب (ساين إن )!!!! تتواطأ مع رموز الخسة ضدها ، و تبيع أخبارها لمَن يعطى المقابل.. و أمامها هيا الأخت الناصحة لأمرها و الحاضنة لشكوها !! شيطانٌ مريد يعبث بين أنفاسها و يقول : جدعة يا روحى !! معادنا الساعة 6 ف جهنم ان شاء الله !!!!!!!!!!!!!
********************************************
مشهد 6 : مكث الشاب أمام الشاشة.. يتطلع لهفة و يقلب بين القنوات.. ثمة سؤال يجول بين أفكاره .. أين الوزة ؟؟؟؟؟؟؟ - (تحريفاً لمسمى آخر!!!!! ) - صاحبة الوجه المشرق و الجسد الممشوق .. و شعورٌ من داخله يقول : مش كنت جبت دش اوروبى أحسن !!! فترد الشاشة : صحيح اللى اختشوا ماتوا !!!!!!!!!!!!!!
*******************************************
مشهد 7 : أغلقت الباب.. جلست وحيدة فى غرفتها الساكنة حيث الصمت رفيقاً لها.. تترنح دمعة فى مقلتيها لتسقط هادئة.. تتذكر كلماته ، كم بدت صادقة ، كم كان الوهم عظيماً .. توك توك !!! تطرق الأم الباب و تدخل لترى ابنتها و قد "كشت" من فرط الصدمة !!!! تأخذها فى حضنها (وتعملها ريفريش!!) ثم فى حسرةٍ ظاهرة تقول : اخس عليه !! متمرش فيه الشاورمة !!!!!!!!!!!!!!!!!!!!!
******************************************
مشهد 8 : ذهب إلى نفس المكان.. حيثما تلاقيا المرات القلائل .. ينظر يميناً و يساراً .. يبحث عنها فى كل جدار .. فى وجوه الناس .. فى كل مكان !! يشتاقُ إليها.. يود لو يراها لحظة.. ليؤكد لها أنه مهما كان لن يكون لغير سواها.. ترن ترن !!!!! يرد على فتاته الجديدة !!!!! : آلو يا حبيبتى وحشتينى.. كنت بعمل شوبينج !!!!!!!!! هشوفك امتى يا قمر ؟؟؟؟
******************************************
مشهد 9 : جريت كالطائر السعيد.. تطير شغفاً و اشتياقاً ، و الأمل الغائب كثيراً .. اليوم راكع بين عينيها .. تقفز السلالم من لهفتها ، و تجرى لصديقه لتعلم أخبار حبيبها.. تثق أنه لم ينساها و أنه لازال و سيزال يحبها كما وعدها... ترتعش الكلمات فى فم الصديق و تنطلق كالخنجر فى قلبها : مرتبط بغيرك من زمان .. قلتلك ميستاهلكيش ، يقوم الحب ب ( ساين أوت) فى لحظة !!!!! فقط تذرف عينيها من قوة الجرح.. و تسحب منديلا ً .. كى "تعطس" !!!!!!! و قبل أن تسارع بالرحيل يقاطعها صديقه : ليه بتجرى ورا (شادو) و النور موجود ؟؟!!! امتى هتفهمينى بقى ؟؟ أعمل أراجوز يعنى ؟؟؟؟؟؟؟!!!!!!!!
*******************************************
مشهد 10 : حمل الورد الزاهر فى دفء راحتيه.. اشتراه بآخر ما تبقى لديه فى جيبه "المفلس" !!!!! ، كان شهراً عصيباً يحمل من الأزمات ما يفوق ماله القليل .. الآن لا يريد أن يفكر سوى فى وجه حبيبته.. القانعة بعسرته .. حينما يهاديها ذاك الورد ... يستعجل الوقت كى يمر سريعاً و يراها .. آن وقت لقاءهم .. تستقبلها ابتسامة حانية من وجهه البرئ .. و تستقبله "بتناحة " : و كمان جايبلى ورد فالصو ؟؟!! يا ما جاب الغراب !!!!!!!!!!!!
******************************************
مشهد 11 : غارت الصديقة من كثرة معجبين صديقتها.. تندلع النار بين ضلوعها و تلتهمها.. و الحقد يسرى مجرى الدم فى وريدها .. تتهمها دائماً أنها مَن تجذبهم إليها.. و تضع بذور الشك فى أرضها ، و حين تجلس وحدها .. تسألها نفسها : ارتبطتى ليه يا حلوة و كنتى بتنسى بيه الأولانى ؟؟؟؟؟ تتبخر الإجابة المتوقعة : ماهو عشان أمسك العصاية من النص !!!! و زيادة الخير خيرين !!!!!!!!!!!!!!! و كله بثوابه
*****************************************
مشهد 12 : سند يده إلى وجهه.. بعيداً عن أعين الناس .. يتوارى خجلاً و حياءاً.. تتدفق الماء على خديه.. و الحيرة فى عينيه تكاد تقتله كشهيدٍ يحمل كل معانى وفاء العاشق ... ظل يفكر و يفكر و حديثه لذاته يتكلم هامساً : يارب دلنى إزاى أفرقعها ؟؟؟؟؟!!!!!!!!!!!!! ( دة على أساس إنها بالونة
****************************************
مشهد 13 : كانت فى طريقها إلى بيتها.. تسير بالخطوات الثابتة .. تفكر فى غدٍ مجهول و ربيع ٍ منتـَظر .. تشعر بالخوف ينتزع صفاءها.. و يكاد القلق يمتص رحيقها.. كيف لم تحب و قد طلبها الكثير ؟؟؟ .. " مياو مياو "!!!!! قط برئ يتتبع خطواتها .. تنظر إليه و تقول : يا حلاوتك يا جمالك !!!!! انت اللى كنت بادور عليه من زمان !!!!!!!!!!!!!!!!
****************************************
مشهد 14 : نظر إلى عينيها فى عمق.. لم تكن نظرة عابرة كما اعتاد أن ينظر إلى غيرها.. ثمة شعور آخر نحوها.. فى كلماته القليلة حروفٌ أخرى تتوارى خجلاً بين السطور.. تنطلق من عينيه أجمل قصائد حب.. تحاول أن تجد سبيلاً إليها.. لم يعد يدرى كيف المفر أو كيف الوصول.. يدفعه قلبه لأن يبوح ، يقف أمامها متلعثم الشفتين حائر الوجدان و يقول : أأ .. بـ .. بصراحة .. معاكى قلم زيادة ؟؟؟!!!!!!!!
***************************************
***** مستنية منكم مشاهد تانية *****
نهاية الفيلم : الحياة سينما بندور و ندور بين أفلامها.. و احنا أبطالها.. ساعات الفيلم يكون غامض و ساعات بنتوه.. و ساعات بنخاف .. أحداثه هيا حياتنا .. و ف طول المشوار لازم هنلاقى أحزانا و ضحكتنا ، فشلنا و نجاحنا .. لازم هنلاقى أحلام لينا بتتحقق و أحلام تانية بتتهد .. أسأل بقى شوية !! ..... معظمنا بيحب يعيش الخيال الوهمى و يسيب الواقع .. و أنا برضه .. ياترى إيه الحد اللى بيفرق بين " إنه الواحد يكون بطل خيالى و إنه يكون بطل مغفل " ؟؟؟؟؟؟؟؟؟؟؟؟؟؟؟
اتصل على زيرو تسعمية تاخد صابونة هدية !!! لول : ))))))) على فكرة السؤال ده جاى ف الامتحان
إيمان
80 comments:
نكتب ايه ما انتي كتبتي كل حاجه خلاص
تسلم الايادي
تحياتي
كل سنه وانتي طيبه
ازيك يا إيمان
جميلة جدا المشاهد دى يا إيمان بجد..وجميل قوى مزجك الفصحى بالعامية عشان تلونى المشاهد دى بالواقعية اللى كلنا بنعيشها..
جميل البوست كالمعتاد
وخفة دم جميلة طبعا
وكل سنة وانتى طيبة
أولا البقاء لله فى وفاه جدتك
وربنا يرحمها ويدخلها فسيح جناته
ثانيا موضوعك رائع جدا عايزانا نكتب أيه تانى أنتى قلتى كل حاجة بجد برافو عليكى
تحياتى لكى
بجد برافو عليكى.قدرتى تسجلى أحداث كتير ممكن أى انسان يكون واجهها ف حياته.شاطرة يا إيمى.بصى الخيال كتير بيضر الواحد
يا بنت الايه............بجد عبقرية يا يا ايمي..واحشاني يا بنتي
حقيقى يا أمى
أنتى كتبتى الجامع الشامل
هههههههههه
والله يا أمى أنتى حته سكرررررررر
ههههههههههههههه
و الله مقدرتش اعمل حاجه غير اني اكملها للاخر
مع ان عندي امتحان بكره
بجد ... صح اوي
ربنا يخلليكي بجد بجد يعني
سلاامم
بجد الموضوع تحفه اوى وانك مدخله الكلام فى بعضه ده مدى صوره هيله بجد يا ايمان طريقه الكتبابه رائعه بس مش عارف اهنيكى على ايه ولا ايه انتى هيبقى ليكى مستقبل كبير والله بشكل ده انا مبطلتش ضحك على الكلام بتاعك مع انى مخنوق جداااااااااا بس موضيعك بتخرجنى من المود الى انا فيه ده
هشاااااااااااااام
سلام عليكم
واللهى كلامك لذيذ اوى وكل حاجه مستوفيه فيه
بس مش عارف بقت كل نظرتنا ف الحياه ان الزهره بتدبل
ليه مفيش حد يكتب يقول الجنينه الى عملتها دى كلها بتاعتى ومش هاسيبها تموت من العطش
مفيش خلاص حد متفائل؟
تحفففففففففففففففففففففففه
ما شاء الله عليكي
ضحكتيني ضحك عمري ما ضحكته
خلي بالك انا اتصلت0900
والتليفون قاللي*متتصلش هنا تاني يا حيوان تيتيتي
كده برضه تعملي فينا المقلب ده
باي
البطل الخيالي هو الي فية ناس مغفلين بيصدقوا بوجودة
و البطل المغفل هو الي بيتخيل ان في ناس حسين بوجودة
---
البقاء لله
------
زاددت السرقات من مدونتك دا معناة انك بتكبري بفنك
تحياتي
اول زيارة لى ولن تكون الاخيرة
اعجبتنى مدةنتك بحق
معكيش رقم البنت الى قلبها فى الاول دى
بتبوصيلى كده ليه
عادى يعنى اوسيها
طبعا جميل اوى
و كمان العمى فى الفصحى دى جامده عشان الوقعيه
لا والله الاولاد بتتعلم يا جيهان (صوت السادات)
دا انا بوستى بقى كفته قدامك
على فكره البوستا الجديد هيعجبك
لانه عمى فى فصحى
حوار داخلى
و بعدين انا هاخد الصابونه امتى
و الربع جنيه المخرم
شفتى انا لسه فاكره اهو
;)
السلام عليكم
فعلا الدنيا زي السينما بنشوف فيها كتير
فيها اللي يبكي وفيها اللي يفرح
البقاء لله يا ايمان
وفعلا الدنيا زي السينيما فيها حاجات كتير حلوة وفيها حاجات اكتر وحشة تحياتي علي البوست الرائع ده
رائع رائع رائع
بصراحة مشاهد طريفة و جميلة جدا
مش عارف عملتيها ازاى دى ؟؟
ربنا يكرمك
د.حمـــــاس
حلوة وفي الصميم دايما يا ايمي
هي الحياة كدة..حبة فوق وحبة تحت
حبة يمين..وحبة شمال
كدة يعني...بس العاقل الي يحافظ عليها ماشية في خط مستقيم على قد مايقدر
بس بعيد عن كل ده قدرتي تعبري كويس قوي يا ايمي كأني كنت بتفرج على شريط سيمنا بجد
اسكندرانى أوى :
ده من ذوقك و الله و انا كنت فعلا نفسى أقرا مشاهد منكم
كل سنة و انت بألف خير
___________________________________
أخف دم :
مهما كان البوست فيه شئ من خفة الدم فعمره ما هيكون بنفس خفة دمك الجميلة
و البوست جميل بوجودك
كل سنة و انت بخير دايما
__________________________________
Bosbos :
جزاك الله خيرا و عظم أجرك
فرحت بوجودك الجميل ف مدونتى و بمواساتك النبيلة و بذوقط الشديد .. انتى اللى كاتبة موهوبة يارب يوفقك دايما
_________________________________
هبة :
شكرا يا هبة على مرورك و اضافتك بس خدى بالك يا قمر عشان التعليق ميتكررش كذا مرة
:)
__________________________________
Camellia :
شكرا يا كوكى على ذوقك .. سعيدة بتعليقك على البوست ده و انتى وحشانى برضه
فى القلب :
ده من ذوقك والله و انتى اللى حتة مارون جلاسيه
:)
__________________________________
Abdellrahman Ayash :
والله كلامك ده فرحنى اوى بس اللى هيخوفنى انى أكون سبب ف ان حد يسيب مذاكرته عشان يزور مدونتى .. خد بالك من امتحاناتك و بالتوفيق دايما
تحياتى
__________________________________
هشام :
أنا طبعا هشيل كل السكاكين وهنزل كل المسدسات و هعذرك انك مزرتش المدونة من فترة .. و بعدين عادى يعنى ما انت الخسران :)
كلامك المحفز ده من ذوقك و الله و ربنا يسمع منك و يا سيدى ابقى تعالى قضى الويك اند ف المدونة عشان متبقاش مخنوق!!! :) ربنا يعينك
___________________________________
أبو على :
مين قال كده بس ؟؟!! التفاؤل موجود و الحمد لله .. كونى انى كنت كاتبة معظم المشاهد مش مشاهد حياتية سعيدة و لكن خلاصة تجارب فاشلة للآخرين فده عشان التعبير هيكون أوقع ف الحالات دى
و الحمد لله رب العالمين .. : لا طيرة ف الإسلام "
تحياتى
___________________________________
عروس البحر :
ربنا يخليكى بجد على كلماتك الحلوة و ده بس من ذوقك .. بصى يا ستى عشان وجودك المرح ده و خفة دمك الحلوة هقولك على الرقم الصح
اكتبى عندك
0900 0 eman eltaher
هستنى مكالمتك !!! :)))))
اسكندرانى ف الغربة :
"البطل الخيالي هو الي فية ناس مغفلين بيصدقوا بوجودة
و البطل المغفل هو الي بيتخيل ان في ناس حسين بوجودة"
والله اضافتك معقولة و لو انى مش فاهمة حاجة !!!! أنا كنت أقصد ايه ال limit اللى لو تعداه الانسان اللى عايش على الخيال ممكن يبقى انسان مغفل .. متهيألى كده الصورة وضحت
و بعدين يا أستاذ الأبطال الخيالية ( اللى بتعيش الوهم كتير ) موجودة و بكثرة كمان
أرجو قراءة السؤال مرة أخرة و الاجابة بتأنى
عشان كده أعمال السنة هتبوظ :)))))))
تحياتى
__________________________________
good man :
طب فين رسوم الزيارة حضرتك ؟؟؟؟
:))))
أسعدنى كلامك و يشرفنى مرورك
__________________________________
Mamado :
هههههههههههههههههههههههه دايما بستنى تعليقك عشان بجد بلاقى فيه ف كل مرة حاجة لازم تفطسنى من الضحك
لكل مشهد من المشاهد دى ليه نموذج موجود .. تحب أديك رقم أنهو مشهد ؟؟؟؟
:)))))
الحمد لله بدأت أتعلم و ربنا وفقنى و طلعت الحضانة !!!!! هههههههه
ماشى ماشى
لا والله موضوعاتك ف غاية خفة الدم و بجد بفرح جدا انى أقراها
الربع جنيه موجود لما تدينى الورقة الجديدة بتاعة ال 200 جنيه !!!!!
ههههههههههه
تحياتى ليك
__________________________________
Son's egypt :
ها السينما عندى أحلى و لا السينما بتاعة بره ؟؟؟؟؟
:)))))))
Dr.hamas :
ده من ذوقك أكيد .. أسعدتنى مجاملتك الرقيقة .. الموضوع مكنش صعب أبدا .. بصيت و تأملت حواليا و كتبت .. و يارب تكون المشاهد فعلا عرفت أعبر فيها صح
ربنا يكرمك .. مدونتك اللى جميلة فعلا
شكرا لمرورك الكريم
__________________________________
بيسوو :
و الله يا بيسوو مش عارفة أقول إيه ع الجملة الأخيرة بتاعتك .. بجد فرحتنى اوى و ده من ذوقك يا بيسوو .. اضافتك مهمة و فعلا الحياة لازم تكون مش على رتم واحد
بجد جامد البوست ده
يخرب عقلك دمك خفيف اوي ، حاجه جامده بجد
تحياتي ليكي
السلام عليكم
اولا سعيد جدا بمرورك عندى
ثانيا البقاء لله
فى وفاة جدتك
ثالثا
المدونة دمها خفيف جدا ولذيذة اوى
طبعا الفيلم ماهو الا نقل
وتجسيد لصورة واقعية
انتى ابدعتى فى البوست ده جدا
وعجبنى اسلوبك فى الكتابة جدا
ممتاز
دوحة
هههههههههه
والله انتى عسل يا بت يا ايمى
وعمرى ما اقدر انسى مدونتك انا بس ساعات ادخل اقرا بس نظرا لكسلى الشديد فى فصل الشتاء فبكسل اعلق
وهقولك سر
ومدونتك بالنسبة لى ليها طعم خاص جدا
لأنها من اوائل المدونات اللى دخلتها اول ما عملت مدونتى
وكمان لأنك من اول الناس اللى زارو مدونتى
وانتى بجد كتاباتك دى فظيعة مريعة شنيعة
بتخلينى افرفر من الضحك
وانتى عارفة بقى انى بموت فى الحاجات دى
وان كاتبى المفضل هو احمد رجب
وقريبا هيبقى ايمان الطاهر
على فكرة انا اشجعك انك تنزلى كتاباتك دى فى كتاب لأنها بجد اكثر من رائعة
وانا هتبنى الحملة الاعلانية للكتاب مقابل نسخة مجانية وساندوتش شاورمة وكانز
:)
كل سنة وانتى طيبة على المناسبات الكتير اللى عدت
والبقاء لله فى وفاة جدتك
ويارب دايما اشوفك على خير
اه بالمناسبة انا فى احد تجمعات المدونين اللى كنا بنعملها الفترة اللى فاتت افتكرتك
اه والله وقولت هى مش بنشوفها خالص ليه
:)
ربع جنيه بقى
تقبلى تحياتى
ومنتظر جديد
أحمد الصباغ
البقاء لله فى وفاة جدتك
انا بردوا جدتى توفت فى رمضان اللى فات
وبجد حمدت ربنا انها توفت فى ايام مباركه زى دى
عموما البقاء لله
اهم شىء متنسيهاش بالدعاء
ادعيلها
نرجع لموضوعنا بقا
بجد احييكى على البوست ده
وبجد تركيبة جامده
وطبعا معظمها ان منكانش كلها بتمر علينا
تحياتى
علاء
انا جيييت تانى
موضوع النشر ده محتاج تفكير
انا ايميلى
ahmed4u21@yahoo.com
كيب-ان-تاتش
أحمد
ايمى
انتى بجد دمك خفيف جدا
وعلى الفكره المشاهد دى تقريبا واقعيه جدا
وكمان انتى رومانسيه اى نعم االمواضيع قلبت بقفشات فى نهاياه الماشهد بس بجد كانت رومانسيه قوى فى الاول
تحياتى وحبى
فعلا مدونتك زى العسل زيك يايمى
ربنا يوفقك وتكتبيلنا حااجات حلوه كدا كتيير
مدونتك لذيذه اوي يا ايمان هتلاقيني هنا على طول بعد كده
دونة هايلة
دى اول زيارة ومش هتكون الاخيرة ربنا يوفقك يا جميل
دعواتى
تسلم ايدك فعلا جميله مصرحياتك يا ايمى ايه اللاوه دى
ثانيا انا خلاص بطلت امتحانات يعنى مش هجاوب غلى السؤال
انا بره المذاكره
ثالثا سعات بنعيش الواقع بكل حزافيره وساعات بنعيش الحلم مين فينا مش بيحاول يحقق احلامه بس يا صابت يا خابت
تحياتى لك دمت ودام قلمك
واتمنى ان نكون مع التواصل دائما
اااه نست اقوللك البقاء لله لله ما اعطى ولله ما اخذ انا مكنتش اعرف
ربنا يلهمك الصبر
عجبني التصوير انا كنت عايش الموقف ههههههه
عموما لي تعليق علي الموضوع بخصوص موضوع العلاقه " ما بني علي باطل فهو باطل "
فاكيد الاتنين هيعملوا كدا وبخصوص صديقتها " الطيور علي اشكالها تقع "
بس اكيد فيا شواذ
بجد مش عارف اشكر حضرتك علي المدونه والشغل العظيييييييييييييييييييييييييييييييييييييم جدا الحضرتك عاملاه احييكي واتمني ان نتواصل ومتقطعيش الزيارات :) وشكرا ليكي
تحياتى
بجد و الله و بدون مجامله و لا نفاق مدونه عسل اوى و روحها خفيفه موت
و كمان انتى عامله فيها شغل جبار
ربنا معاكى و يوفئك يا رب
nice post ... so deep ... so real ... u r a real star in the sky of blogging ... thx for visiting my hample blog i'm hounerd
Hi Eman
A beautiful place here!
Excellent post!
Thank you.
have a good day
طيب يا ايمان انتى مستنيه تعليقات على المشاهد دى بجد انتى عبرتى عن الواقع بمختلف الصور بروعه
جميلة قوي
اسلوبك بيفكرني بايام جميلة قوي
لك تحيتي
السلام عليكم ورحمة الله وبركاته
ايمان مش عرفة اقول اية؟
لكن هى مشاهد جميلة وبتحصل ادامنا
لكن تفتكرى لو حد بيمر بيها وفى نفس الوقت قراها هيعرف نهاية اللى بيعيشه دا؟
مش افتكر
بس لو عرف يبقى هيفرق بين البطل الخيالى والمغفل
لان الخيال مالك لكل الحواس حتى التفكير
حقيقى مشاهد اتصورت صح
جزاك الله خيرا
انا ديما هبقى هنا علشان اعرف اخر اخبار الخيال
سلااااااااااااااام
ههههههههههههههه
ههههههههههههههه
بجد
إبدااااااااااع
انا شوفت الموضوع تلات مرات
وكل مره اضحك
بجد بجد بجد
جمييييل جداا
وخاصة اول مشهد
تحياتي
ومنتظر إبداعات تانيه
:) :) :)
بجد اسلوبك حلو وجميل وجديد كمان تسلم ايديكى يا قمر وليكى واحشة والله
بس زى ما بتقولى فعلا وهيا الحياة فعلا ايه غير اننا كاننا ابطال فى فيلم ولا مسرحية بيمر علينا مشاهد اشكال والوان ياما بس المهم ان يارب تكون المشاهد دية سواء حلوة او وحشة نقدر نتحملها
Mado :
شكرا و الله على المجاملة الحلوة دى و يارب مواضيعى بعد كده تنول اعجابك برضه
تحياتى
__________________________________
Doha :
جزاك الله خيرا .. شكرا على مواساتك .. لله ما أخذ و لله ما أعطى
ألف شكر على مجاملتك ديا ..و فعلا موضوعى هو تجسيد لواقع المعظم بيعيشه
__________________________________
Ahmed Elsabagh :
ف الأول انت نورت المدونة بعد الغيبة دى كلها و انا اللى يهمنى انه الناس تقرا الموضوع و أتاكد من ده حتى لو ماكانش فيه فرصة انهم يقولوا رأيهم او تعليقهم الشخصى
كويس بجد انك كنت متابع مدونتى
جزاك الله خيرا يا أحمد على مواساتك لوفاة جدتى
الله يرحمها
و كلامك المحفز ده بجد رفع من معنوياتى جدا الحمد لله خصوصا ان المدونة مش كل طموحى
وانه تانى أكبر حلم لياانى أنزل كتاب و أتعرف ككاتبة ساخرةوبرضه شاعرة
ربنا يكرمك على المجاملة الحلوة و ان شاء اللهخ هبقى أستفهم منك
تحياتى
___________________________________
عايش و لكن :
جزاك الله خيرا و عظم اجرك .. أنا عندى احساس قوى و العلم عند الله ان جدتى منعمة دلوقتى بنظرتها الدايمة لمكانها ف الجنة
كلنا رايحين ان شاء الله
تنور المدونة و يارب كل المواضيع تعجبك برضه
تحياتى
Ra7eel :
انتى بجد طمنتينى انه الحمد لله مقولة انه الانسان بيبان من كتاباته
انا فعلا رومانسية جدا فوق ما تتصورى
و الحمد لله لانها نعمة كبيرة .. المشكلة بس انى بعيش الخيال كتير
تحياتى ليكى و حبى و تقديرى ايضا
___________________________________
حبة حاجات (إيمان ) :
ربنا يخليكى بجد على المجاملة الرقيقة .. تنورى المدونة... ربنا يسهل ان شاء الله و الموضوع الجديد قريب بإذن الله
__________________________________
Day dreaming :
ربنا يكرمك و شكرا على المجاملة و انتى تنورى المدونة .. تحياتى ليكى
___________________________________
مروة الزارع :
شكرا يا مروة على المجاملة الحلوة و انتى أكيد تنورى المدونة علطول
تحياتى
__________________________________
Walaa :
ده من ذوقك و الله يا ولاء و الحمد لله انه الموضوعو اسلوبى ف تصوير المسرحيات الواقعية أحظى بإعجابك
و يارب علطول
جزاك الله خيرا و عظم اجرك
لا أفقدكم الله عزيزا لديكم
تحياتى
أحمد الهادى :
تعرف انا و الله قريت تعليقك يمكن أكتر من اربع مرات
و أقلبه يمين
طب شمال
إنى أفهم حاجة مش عارفة !!! دى فزورة و لا إيه ؟؟؟
بصرف النظر انى مفهمتش تعليقك بس انت بجد تنور المدونة و تحياتى لكل زمايل كليتى
___________________________________
Nour el30zamaa ;
شكرا على ذوقك الشديد .. و الحمد لله انه المدونة و المواضيع و الشغل الجبااااااار عجبك و عجب الناس
و أطمع من ربنا انه يكون ده علطول
تحياتى
___________________________________
محمد مارو :
ده و الله أكيد من ذوقك و ربنا يكرمك على الكلمات التشجيعية دى
ده بفضل الله
شكرا على مجاملتك الرقيقة
تحياتى
__________________________________
little Angel :
Thank you so much for your pretty compliment .. i hope it admires you forever .. Regards,
__________________________________
David Santos :
Hello ! welcome again David
thank you for caring of my posts .. it's preicous to see you look after my blog .. Blessings ,
رئيس جمهورية نفسى :
و الله ده اللى بيدينى اعتزازى أكتر بمتابعين مدونتى و بيدفعنى دايما انى أكتب طالما لاقية طابع على قلوب الناس
شكرا ليك
___________________________________
مصطفى السيد سمير :
مفيش احلى من أيام زمان .. و بجد فرحت ان اسلوبى بفكرك بأيام جميلة
شكرا لذوقك
__________________________________
eng_aea :
و الله انا اللى مش عارفة أقول إيه على المجاملات الجميلة و الرقيقة من شخصك الرقيق
و بجد فادتنى إضافتك جدا لانى كننت مستنية من زوار مدونتى انهم يردوا على السؤال بس محدش ادى للسؤال أهمية رغم انه ف غاية الأهمية عندى
شرا لاضافتك و فعلا عندك حق
انتى تنورينى بجد علطول
أرق تحياتى
__________________________________
أمير الهدوء :
بفرح جدا لما حد يقوللى انه قرا الموضوع بتاعى أكتر من مرة
و بجد فرحت جدا انك قريته 3 مرات !!!! دى مجاملةو اهتمام بمدونتى اعتز بيهم
و يارب مواضيعى اللى بعد كده تكون برضه عند حسن ظنك
تحياتى
__________________________________
رحيق الحب :
نورتى مدونتى يا جميل
انتى اللى كان ليكى وحشة
انا كان غصب عنى عشان مرض جدتى ثم وفاتها
فكنت مقصرة ف حق الكل تقريبا
معلش تتعوض ان شاء الله
و فرحت بجد بزيارتك
تحياتى
اكتر مشهد عجبني بجد هو مشهد تلاتاشر
مش عارف حسيته انتي قوي
منتظرين باقي مشاهدك .. وماتغيبيش الله يكرمك
انا عارف اني جيت متأخر .. بس كل ما كنت ادخل هنا وابقى مظبط طموحاتي اقرى البوست .. تحصللي حاجه
يا الموبيل يرن .. يا الباب يرن .. يا جرس التليفون يرن
المره ده بقى .. حطيت قطنه في وداني .. واللي يرن يرن
سلامووووووووووووز
جميلة أوي مشاهدك يا إيمان خصوصا إنك جمعت فيها بين العامية والفصحي
بس كنت مستنية اي مشهد تفائل كده على الماشي ولو واحد فلته يعني.. انا عارفة إنها قليلة بس الحياة لا تخلو منها ولا ايه ؟؟؟؟
يمكن إنت واقعية وأنا عاشية في الخيال بس بجد كان نفسي اشوف مشهد من اللي جوه في الخيال ده
____________
على فكرة كتابك حلوة ومدونتك حلوة وصورتك وإنت صغيرة حلوة
إنت بتسالي يا إيمان؟.. اكيد يا بنتي من غير سؤال أنا جاية علشان أزورك تاني وأنور علشان أنور مدونتك مش أكتر
ههههههههههه
يلا سلامات
ايما
المشاهد جميعها مؤثر وواقعي جدا
أعجبتني جدا لدرجة انني فقدت فيها الكلمات
فتقبلي تحياتي
عاجل الانباء
تم اصدار قرار تجديد الاعتقال للدكتور الزعفراني بعد الافراج عنه مرتين وهو الان في سجن الغربانيات في برج العرب بعدما كان محتجز في الترحيلات
شاركنا في التوقيع علي وثيقه اطلاق سراح الدكتور ابراهيم الزعفراني
برجلي اليمين دخلت المدونة
اولا هيا مدونة جميلة ، كان نفسي مدونتي تكون شخصية كده عنوانها اسمي و عادي بس مش عارف ليه كان نفسي من زمان لو عملت موقع اسميه موجة لاني اتربيت على البحر وعارف يعني ايه موجة
ثانيا مواضيعك عميقة فلسفتك هايلة وتحليلك فريد لامور الحياة لولا ان كلها بتنحصر في مواضيع الحياة الزوجية ابتداء من تثبيت البت لحد الطلاق و النفقة
ههههههههههههههه
بس انتي على كده اكبر من سنة يا ايمان
بس المهم
اني كسبت مدونة هايلة اكيد حكون من ضيوفها باستمرار دا لو سمحتي طبعا
خالص تحياتي
احمد
البقاء لله في وفاة جدتك اولا
برجلي اليمين دخلت المدونة
اولا هيا مدونة جميلة ، كان نفسي مدونتي تكون شخصية كده عنوانها اسمي و عادي بس مش عارف ليه كان نفسي من زمان لو عملت موقع اسميه موجة لاني اتربيت على البحر وعارف يعني ايه موجة
ثانيا مواضيعك عميقة فلسفتك هايلة وتحليلك فريد لامور الحياة لولا ان كلها بتنحصر في مواضيع الحياة الزوجية ابتداء من تثبيت البت لحد الطلاق و النفقة
ههههههههههههههه
بس انتي على كده اكبر من سنة يا ايمان
بس المهم
اني كسبت مدونة هايلة اكيد حكون من ضيوفها باستمرار دا لو سمحتي طبعا
خالص تحياتي
احمد
اسمحيلي اكمل بقيت البلوج
بسم الله الرحمن الرحيم
أول زيارة لية
بس بصراحة ، كوميديا رائعة
أحمد رشدي
السلام عليكم
ازيك يا ايمان
ماشاء الله على المدونه بتعتك دمها خفيف والمواقف عجبتنى وخصوصا اللى مكتوب بالازرق
بس مش غريب انو كل المواقف انها مابين اصدقاء او اتنين بيحبو بعض
ياريت تكتبى مواقف كده فى مواضيع تانيه كمان حتكون حلوه اوى
تسلم ايدك يا جميل
توكا
اه انا تانى يلا معلش استحملى
ايه يا بنتى دا انتى طلعتى مصيبه
انا قريت الموضوعين اللى قبل دا
عجبنى اوى اسلوبك
انك بتكلمى تكلمى وفى الاخر تقولى وجهة نظرك
ما شاء الله عسوله جدا
انا قولت ايه التثبيت دا دى بتقلل من احترام الولد للبنت
بس الحمد لله فهمت قصدك ايه
بس كده تمام نجحتى فى الامتحان
سلاااام يا جميل (@_@)
لا انا كده بجد زعلان
انتي يابنتي بتنزلي موضوع واحد في السنه ليه؟؟؟
ده انتي اسلوبك وطريقتك هايله قوي
يلا بقى بطلي دلع ونزلي سبع مواضيع ورا بعض خطف كده
سلامووووووووووووز
والله يا ايمان ما عارف ارد عليكي بايه
كلمة جميلة مش كفاية لوحدها
البوست ممتع بجد
ودمة زي السكر
واسمه كمان جميل
يا ريت يتعمل سلسلة اكبر م نكده
السلام عليكم
هلا ايمى
منوره مدونتك ديما بكلامك الجميل بس المره دى انتى لازم تشوفى مخرج من بتوع الايام دى وواحد فلوسو مديقاه من بتوع الايام دى برضو وتعمليه فلم تسجيلى هيبقا جميل
بجد بوست رائع وكلام جميل بأسلوبك الفكاهى الممتع ديما فى تقدم يا غاليه هيه دى سنة الحياه
اسألينى انا على الوحده لما تكونى شهر ونص على سريرر لا حركه ولا نفس
كنت بكلم نفسى فى اغلب الوقت
اه
اسف بعتزر عن غيابى ايمى عملت حادث بموتسكل نتج عنو كسر فى الفخد شريحه و12 مسمار ههههههههههههه بفكر اهربهم
بس عارفه الجميل فى الموضوع لما تعدى من بوابة امن وتصفر ويقعدو يفتشوكى هههههههههههههههههههههههههه
ان شاء الله هرجع للمدونه بأذن الله انتظرى الجديد
يلا خلى بالك من نفسك
ليكى تاج عندى روحى خديه
عارفه يا إيمان انا كنت من أول المهاجمين لأسلوب الكتابه السخريه
وعلى ما أعتقد دخلت هنا مره زمان وانتقدك كمان .
لكن بعد المقاله ديه أقتنعت فعلاً دور الكتابه ديه واللى ظهر كده اكتر هو الفينش بتاع الموضوع بتاعك اللى وصل الصورة بأسلوب خفيف ولطيف وصلب الموضوع الذى يشد الشباب ويخليه يضحك وينجذب ومع الضحك يكتسب الفكرة او المطلوب .
ربنا يوفقق .. بس عارفه كمان المشهد الصح أؤى هو رقم (11)
بس عندى مشهد جديد " ظل يراقبها لمدة عامين كلامها وخطوتها وضحكاتها وكانت هى من تضىء له حياته وحينها أدرك معنى الحياه.. وظل يخطط ويراقب كيف يصل إليها ، وظل يغطش عليها بكلامه المعسول حتى اقشعرت بدنها ، وها هو اليوم حدث ما كان لا يحلمه أن وافق أبوها عليه ، والآن يشعيشون فى تبات ونبات وجايبين صبيان وبنات وبيأكلو أيس كريم من العبد وبيسمعوا محمود العسيلى كان فيه واحده اسمها تررم "
تحياتى ،،،
( كريم غالى )
http://alayam.maktoobblog.com
ماشاء الله عقلية كوميدية عبقرية
فعلا انتي متمكنة اوي من الفكرة وبتقدري تطوعي الكلام
تحياتي
خبر ايه يا ايمي
خبر ايه بجد
يعني النت اتصلح بقاله بتاع اسبوع اهه
وانتي ولا موضوع جديد
في ايه يابنتي قلقتينا
لعل المانع خير يارب
ملحوظه
المقابله اللي بخصوص صحابي المدونين دي اصلا يوم الجمعه الجاي اللي هو موافق خماشر فبراير
ولو عرفتي تيجي يبقى هايل
سلاموووووووووز
Sooo :
نورت المدونة طبعا .. على فكرة عندك قوة حدس كبيرة .. ربنا يحميك
و الحمد لله بقى انه فيه قطنة عشان لولاها مكنتش قريت البوست !!! هههههههههه
أسفة على التاخير بجد .. ان شاء الله مش هغيب كتير كده تانى
تحياتى ليك
__________________________________
Rama :
نورتى المدونة بزيارتك الحلوة و ان شاء الله علطول
بخصوص انى مكتبتش و لا مشهد تفاؤلى ( يعنى بنهاية سعيدة ) مش عارفة ليه حسيت انه هيبقى سخيف و مش هيبقى ليه معنى و فكرة و دلالة زى ما بنشوفه ف الأفلام و المسلسلات !!! دة مش معناه انى متشائمة إلا مكنتش أحب الضحك و أحب أضحك الناس معايا .. لكن يمكن لأنى بكتب عن الحاجت الغريبة ف مجتمعنا أو حتى المشاهد اللى ممكن الواحد ينتهى منها بموعظة و نتيجة .. شكرا يا قمر على كلامك الحلو و يارب أكون رديت صح على سؤالك و عشان خاطرك هبقى ان شاء الله اكتب بوست كامل مليان تفاؤل و حب ( فيه موضوع ليا : الحب مش مخلوق للناس بس ) ده يمكن يعجبك أكتر من ده.. تحياتى ليكى
__________________________________
Linda :
و كان لكلمتك دى عظيم الأثر ف نفسى
شكرا لزيارتك الكريمة.. تحياتى ليكى
___________________________________
مدونة ياللا نفضحهم :
ف الأول أنا بشكرك على الإفادة و لكن يؤسفنى انى مش فاهمة حاجة !!!!! أناا آسفة انى جاهلة جدا من ناحية السياسة و الاعتقالات و .. و .. و ان شاء الله معاكم ... تحياتى ليك
__________________________________
موجة :
جزاك الله خيرا و عظم أجرك و لا أفقدك الله عزيزا لديكم
هههههههههه الحمد لله انك دخلت برجلك اليمين عشان لو كانت بالشمال كانت ممكن تبقى مشكلة كبيرة !!!!! انا طبعا بشكرك جدا على مجاملتك الرقيقة و الحمد لله على كل دة
ليه بس كده ؟؟!! هيا من أول فنون التثبيت لحد الجواز ان شاء الله .. أنا بس بحب أهزر و أقول حاجات غريبة لدرجة الناس تقوول ايه العجايب دى و بعديييييين يعرفوا انا عايزة أقول إيه و ده ف معظم بوستاتى تقريبا .. هههههههههه أتمنى يكون تفكيرى أكبر من سنى عشان يعوض شكلى الطفولى !!!! انت تنور طبعا ويارب علطول مواضيعى اللى فاتت و اللى جاية ان شاء الله تعجبك.. تحياتى
roushdy :
شكرا لمرورك الكريم ومجاملتك الرقيقة و مدونتك جميلة و فكرها حلو .. تحياتى
________________________________
toooka :
ف الأول عايزة أقولك انه عجبنى أوى اختيارك للصورة بتاعتك و قد إيه دة بيعكس شخصيتنا خصوصا انها رسمة جميلة بالحجاب.. طبعاا صورتى الشخصية مش بالحجاب لانى كنت طفلة صغنونة !!!! ههههههههههه ثانيا يا قمر لو انتى عايزانى أكتب ف حاجات تانية غير مواضيع الحب و الصداقة و الكلام ده فانا ان شاء الله هلبيلك الطلب ده قريب.. و انا آسفة انه الموضوع ماكنش ينفع أتطرق فيه لأى أشكال تانية أو أى انواع تانية من الاجتماعيات ف حياتنا بس أوعدك ببوست زى ما انتى حابة ..و بجد مدحك ليا كان أثره جميل عليا .. ربنا يجازيكى خير دايما
________________________________
barb michelen :
First, you are welcome in my blog anytime .. it has been very nice from you to look forward to my blog eventhough you have been waiting for a travel !!! sorry that I couldn't indicate the personality for your own and that means that i couldn't understand what you had refered to !!!!! i'm sorry .. you may need to rewrite to know me who are you & what site I asked you .. Anyway, really i was so pleased to read your comment & feel your care .. I visited your site and it was interesting but i couldn''t leave a comment there because there's no permission !!! thank you so much... Much regards
_________________________________
Soooo :
هههههههههه مش عارفة كل مرة أتاخر و كل مرة أعتذر !!!! بس و الله ربنا عالم انه غصب عنى التأخير ده و انه بجد وقتى مش مسامح حاليا لأى اهتمام زايد بمدونتى .. بس أوعدك ان شااء الله انه على الأقل لو اتأخرت تانى متأخرش كتير كده !!!! و ربنا يكرمك بجد على مدحك الجميل ده .. أمال انا أقول ايه ف خفة دمك المعهودة ؟؟؟؟
تحياتى ليك
أحمد سلامة :
و الله أنا اللى مش عارفة أقول ايه على المجاملة الجميلة دى .. ربنا يخليك ويكرمك بجد .. خفت أطول ف البوست أكتر من كده عشان ممكن النااس تــُصعق لماا تشووفه !!!! هههههههه و ان شاء الله ممكنن أبقى أكمل السلسلة ف بوست جديد بعد كدهه .. تحياتى ليك
_______________________________
إسلام الحسانى :
حمد الله على السلامة .. و اان شاء الله تكون بخير علطول .. ربنا يخليك على المجاملة الحلوة دى بس فين ده الانسان اللى فلوسه مضايقاه ؟؟؟!!!!!! ههههههه لو لقيته انت قوللى !!!!!!!! هههههه بصرف النظر عن امكانية او استحالة ده بس انا بجد فرحت جدا بالتشجيع ده .. ربنا يكرمك .. تحياتى ليك
_______________________________
Bosbos :
عااااااا تاج تانى ؟؟؟ طب ده أنا مجاوبتش على العشرة اللى قبله !!!!!! هههههههه بس عشانك يا جميل من بين الأصدقاء اللى بعتوللى هحاول أرد على التاج بتاعك ف اقرب وقت فايض عندى .. شكرا يا قمر
_______________________________
كريم غالى :
ف الأول انا بحييك على شجاعتك ف انك تكشف عن وجه الشخص اللى انتقدنى بشدة قبل كده !!!!! هههههه بينى و بينك انا كنت عارفة !!!! بس انا بحترم كل نقد بناء ومبزعلش الحمد لله .. و الحمد لله بجد اانه عجبك الموضوع ده أكتر من أى موضوع قبله لدرجة يحببك ف الاسلوب السخرى ف معالجة المواضيع .. و الله انت يا كريم اللى موهوب بجد و ف كل مواضيعك لازم ألاقى روح الموهبة تطغى عليها .. و على فكرة المشهد اللى ضفته دمه خفيف اوى بجد و سبحان الله انك تضيف المشهد الناقص من موضوعى و هو مشهد التفاؤل اللى معرفتش أعبر فيه أو أكتب عنه ... تحياتى ليك
Sendbad ;
والله اانا ما عارفة اقول ايه على المجاملة و التشجيع ده غير الحمد لله للذى يعطى و يمنح.. أما اذا كنت متمكنة من الكتابة السخرية فانت قادر بشعرك الدافى انك تخلى اى انسان يسبح بعيد ف فضاء خيالى ... تحياتى
_____________________________
Sooooo :
هههههههههه أحلى حاجة انى بدخل المدونة و اقرا كلامك ده يوم الجمعة أصلا !!!!! بس ان شاء الله تتعوض .. أنا آسفة على التأخير تانى و ان شااء الله تكون آخر مرة اتأخر كتير كده .. يارب بس يسهل و بجد انا فرحت جدا بسؤالك و انتظارك لكتابتى و ربنا يعلم انه وقتى حاليا مش مسامح أكتب كتير و بسرعة غير ظروف النت طبعا
عذرا و تحياتى
بصراحة ما أقدر أقول شيء اكثر من أني أعجبت بجد بالمدونة بتعتك التي زرتها لاول مرة (معليش)بالفعل لاول مرة .. أهنئك يا ايمان
كملاوى :
شكرا بجد على الكلام الحلو ده و الزيارة الكريمة دى
و يارب متكونش آخر زيارة
تحياتى
ايمان المشاهد دى جميلة جدا والاجمل فعلا طريقة سردك لها واللغة الفصحى الممزوجة بالدارجة التى هى اكثر من العامية استخداماً مما شاء الله عليكى جميلة جدا
مشهد عيد الميلاد والهاتف ده فظيع " مين حضرتك" لما قريتها موت من الضحك وفمى مفوح علي الاخر وعينى مبرقة متسالنيش ازاى
إنسانة شوية و شوية :
انتى بجد فرحتينى اوى بكلامك ده خصوصا انه المشهد اللى عجبك كنت حاسة انه ملوش لازمة ف البوست و انه مكتوي على الفاضى
لا ابس انتى بجد تنورينى
و ربنا يخليكى على مجاملتك دى
علي فكره البوست ده تحفه بجد ... انا مكنتش ناوي اكمله الاول لاني كنت نازل بس اتعطلت وعطلت الناس معايا لانه عجبني فعلا ودمه خفيف اوي
:)
تحياتي
السلام عليكم
هلا هلا ايمو معلش يا غاليه الظاهر انا مش هقدر اكتب ولا ايه انا سافرت بره مصر شغل والله ما عندى وقت حتى اكلم نفسى شغل من 12 ل 12 انا هربان نص ساعه عشان اشوف الايميل والدنيا ايه بس هحاول اشوف وقت انا كاتب حجات ونا فى الشغل بس معنديش وقت انزلها على النت معلش الدنيا مشا غل والف شكر على السؤال يا اغلى اخت وخلى بالك من نفسك المهم سيبك البوست بجد رآآآآآآآآئع جداااااا زى منتى متغيرتيش
Zika :
ربنا يخليك يارب
ده أكيد من ذوقك
و آسفة انى عطلت الناس معاك بسبب البوست بتاعى
شكرا ليك بجد
___________________________________
إسلام الحسانى :
الحمد لله انك بخير
و عموما حمد الله على السلامة برضه حتى لو صعب عليك تكتب
أنا برضه بعانى من نفس المشكلة بس الفرق انى مش لاقية وقت حتى أكتب مش وقت عشان أنزله !!! هههههههه
أصلى اشتغلت برضه
:))
والله كل حاجة فعلا ف الدنيا ليها عيوبها و مميزاتها
صحيح
كنت هنسى
الدنيا برة أحلى و لا مصر برضه أم الدنيا ؟؟؟
المدونة رائعة شكرا لك ..
شكرا على المدونه الجميلة و بالتوفيق دائما
شكرا على مجهودك الرائع
شكرا جزيلا على هذة المقالة الجميلة
شكراااااا على مدونتك الرائعة
مقالتك اكثر من رائعه...بالتوفيق دائما
شكرا على المدونه الجميلة و بالتوفيق دائما
Post a Comment