أهلا بيك ف مدونتى
قد ايه جميل انك تكتب و تعبر عن كل حاجة تدور جواك ..عن كل حاجة تدور حواليك ..عن كل لحظة تمر بيك ..و كل ذكرى تفوت عليك منتاش ناسيها و لا حابب تنساها ..عن سعادتك عن جروحك.. عن حلم بكره و عن طموحك . انك تكتب و المعانى تحس بيك و ف قلب صفحة يكون مكانك
بعد التدقيق الشديد ف شرايط القنوات الفضائية ( شرايط الشات اللى بتبقى متلقحة ف آخر الشاشة !!!! ) و بعد التتنيح بالساعات قدام شاشة التلفزيون .. استطعت بقدرتى العبقرية و الفذة من نوعها أن أستنتج ........... ان نص شعب مصر حتما ًغبى و عايز الحرق !!!!!
لأ اللى بيحصل ده مش طبيعى !!! أنا قريت شوية جُمل يا جماعة بجد تنحت قدامها !! و بين كل جملة و جملة كان هيجيلى شلل
إليكم الشلل التالى
مهو أكيد مش هتشل لوحدى
1-
*** ممكن حب اسكندرانى ***
آيوووووووووووه و ماله !! طبعا زى ما انتوا عارفين فيه حب اسكندرانى و حب قاهرى و فيه فلاحى و فيه صعيدى !!! و اذا مشينا بالحدود شوية هنلاقى فيه حب لبنانى و حب امريكانى و صينى و يابانى !!!! و هكذا و مقولكوش بقى ع الحب المريخى !!!!
و برضه فيه حب بالفراخ و حب بالكباب و فيه بالشطة و اللمون !!!!!!! و يا سلام بقى ع الحب بالجبنة !!!
فظييييييييع !!! خصوصا لما بيتقطع عليه طماطم بيبقى مسخرة
2-
*** أنا 75 سنة ممكن أتعرف على ليدى مناسبة ***
خمسة وسبعين سنة يخرب بيته و قادر يمسك الموبايل و يبعت مسج ؟؟!!! ما شاء الله لسه ف عز شبابه برضه !! آه و ماله ممكن تتعرف على كركوبة مناسبة
3-
*** ممكن واحدة جميلة للصداقة و الحب و ياريت برضه للسفر ***
آه ممكن طبعا !!! و يا ترى حضرتك عايزها كام سلندر ؟؟؟؟؟؟؟؟؟؟
4-
*** أنا شاب متدين ممكن ليدى عندها شقة ***
آه و ماله !! و فيه برضه شقة و عليها ليدى مجانا !!!! و ياترى ايه مواصفات الشقة اللى عايزها ؟؟؟؟؟؟؟؟؟؟؟؟؟؟
5-
*** أنا دلوعة و شبه نانسى عجرم ممكن أتعرف ***
آه و نص !! و ياترى واخدة من 
نانسى عجرم قفاها و لا كعب رجليها ؟؟؟؟؟؟؟؟
اتدلعى يا اوختى و ماله !! و لما حضرتك أمورة كده امال بتعرضى نفسك ليه ع الشاشة ؟؟؟؟؟ ايه محدش راضى يشترى خلقة نانسى عجرم ؟؟؟ ايه الرجالة بقت بتطس ف نظرها ؟؟؟؟؟؟؟؟؟؟؟؟؟ لأ معندهمش حق
6-
*** أنا ف اعدادى ممكن أتعرف على بنت حلوة ***
هيا جات عليك ؟؟!! و ياترى عايزها ف سنة كام يا حبيبى ؟؟؟؟؟ ابتدائى و لا حضانة ؟؟؟؟؟؟؟ أنا بالشكل ده هيجيلى السكر
7-
***فلانة : أنا نكدية موت ممكن أتعرف على نكدى و ننكد على بعض ***
*** فلان : أنا نكدى مووووت !! و قعتك سودة و نهارك مش باينله لون ***
كان نفسى أمسكهم هما الجوز و انكد على أهاليهم
8-
*** معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام
9-
*** أنا عايز بنت للارتباط سمرا أو بيضا أو قمحى ما تفرقش ***
حمرا !!!!!!!!!!!! تاخدها حمرا ؟؟؟؟؟؟؟؟؟؟؟ طب ايه رأيك ف البنفسجى ؟؟؟؟ جديد و منزلش السوق
10 -
*** ممكن واحدة جميلة استايل عشان أحبها ***
آه و ماله !! أنا برضه عايزة بطارية للموبايل بتاعى عشان أنا قربت أهنج !!!!!!
11-
*** أنا سى السيد بدور على أمينة تسمع الكلام و تقول حاضر ***
آه و ماله حاضر يا اخويا !!! بقى حضرتك عايز أمينة ؟؟؟؟
طب غووووووووووووووور الله يحرقك
12-
*** لو انت بتحبنى بجد ممكن أديلك رقمى !! ***
يا ما شاء الله !!! انتوا بتحبوا بعض الأول و بعدين تتعرفوا على بعض ؟؟؟؟؟؟؟؟؟؟؟؟
تصدقى بالله أنا دلوقتى بس عرفت أهمية السراية الصفرا
13-
*** فلانة : ممكن تعرفنى على نفسك عشان هتبقى حب العمر ***
*** فلان : هحكيلك عن حياتى كلها !!! .. أنا من النهارده ملك قلبك !!!!!! انتى حددى و انا تحت أمرك ***
أشوف فيكم يوم بحق جاه النبى !!! الدماغ دى معجونة من ايه ؟؟؟؟ أنا خلاص هيجيلى شلل !!! ألطم يا اخوانا ؟؟؟؟؟
14 -
*** أنا قلبى فاضى .... حد عايزنى أحبه ؟؟؟ ***
فسسسسسسسسسسسسس أنا مُت خلاص
15 -
فلانة : عرفنى على نفسك يا فلان و ابعت رقمك .. أنا بحبك أوى ، فلان : أنا اللى بحبببببببك أوييييى يا فلانة !! قوليلى صحيح هو انتى حلو ة و لا ؟؟؟؟؟؟؟؟
لا تعلييييييييق ...... أنا شكلى هموت تانى
ثوانى أموت و ارجعلكم
كلمة أخيرة :
اللى بيحصل ده كتيييييييييير .. شئ ميبقبلوش لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟
و ليه الناس بقت بتحب على نفسها ؟؟؟؟؟؟؟
رغم انه فيه بامبرز !!!!!!!
إيمان
نانسى عجرم قفاها و لا كعب رجليها ؟؟؟؟؟؟؟؟
10 -
*** أنا قلبى فاضى .... حد عايزنى أحبه ؟؟؟ ***
46 comments:
هههههههههههههه
و الله معاك حق حاجه هبل فى هبل و ناس مجانين ....الفراخ تعمل أكتر من كده و ناس فاضية و بتتسلى
الناس دى بقى عايزه تسالى يا لب و الاتنين عارفين ضمنيا الكلام ده
ربنا يحفظنا
تصدقى بقلب فى البلوجات لقيت مدونه كاتبه بوست تقول انا رايحه المصيف مع عيلتى و هيبقى مصيف .... تييييييت اصلها كلمه مش كويسه و بتقول كمان هيبقى كده علشان لا هتعاكس و لا تتعاكس
ولسه
نسيت اقولك بوست الاتيكيت تحفه بجد
توصيله الفكره بالأسلوب الساخر ده و بالطريقه دى موهبه يارب تحافظى عليها
3ashe2elro7 :
ربنا يكرمك ع الكلام الحلو ده .. هو الموهبة الفظيعة اللى أنا فيها بسبب الحاجات اللى تشل ف حياتنا اللى بنقابلها بتطلع المواهب كلها وعشان الواحد مايتشلش بس
الحمد لله جت سليمة
موضوع البنت و المصيف مش عارفة أقول غير انه فعلا الناس الهايفة كتييييير
و الواحد أصلا مابيطقش انه حد يرمشله بعينيه و هو ماشى مش يتنيل يتعاكس
يارب تكون مدونتى صديقة ليك و طالما موضوعى عجبك نبقى نشوفكم علطول عشان حتى تدافعوا عنى لو حصل تتار ع الكلام ده و لا حاجة !!!! ربنا يستر يكون فيه ناس من المدونين بيتنيلوا يبعتوا رسايل الشات بتاعة التلفزيون اياها
تبقى مصيبة
ياللا ربنا يستر
شكرا لكلماتك
و تحياتى ليك
بصراحة مش عارف ابتدى منين ، هل من الناحية الكوميدية السخرية اللى دخلتى بيها البوست ، ام ادخل مدخلاً اكثر عملياً ويمس قضية حقيقة .
خلينا مع سياسة المدونة :لاحظت فعلا تلك الأشياء على القنوات الفضائيه وفى محل موضوعك اقدر اقول انهم ناس غلابة وحلم كل واحد واحده وحلم كل واحده واحد ، بس اللى بستغرب له ما يدخلو نت هيكون حتى اسهل او ارخص حتى . ويجيى ليهم بال يقعد يكتب ماسدج ده انا قافل الموبايل من بعد الامتحانات ومش هفتحة غير شهر تسعه ان شاء الله عشان الكلية والسفر بس ، لانى بتخنق من الموبايل اصلا .
لكن شبابنا بقى والله بقت قضية كبرى جدا .
لو كملت كلامى ممكن التعليق يتقلب لبوست .
تحياتى ،،،
هههههههههههههه
بجد جميلة التعليقات يا إيمى .. أنا قريت كتير عن الموضوع ده وكل واحد كاتب بأسلوب سخرية شكل بس بجد أسلوبك ده رائع وتعليقاتك دمها خفيف جدا ..
ربنا يديم خفة دمك عليك ويبعد عنك الشلل .. وياريت ما تغيبيش كتير وطمنينا عليك
شر البلية ما يضحك انما تعالي نتكلم من منطلق تاني
اولا : ازاي احنا بقينا نستخدم التكنولوجيا في قلة الادب لانها فعلا قلة ادب
ثانيا : فين الاسرة فين الرقابة بقي انا ادخل علي بنتي الساعة 3 الفجر مثلا القيها ماسكة الموبيل وبتبعت رسالة
ثالثا : ونيجي نسال هو الحب بقي عامل كده ليه الايام دي
رابعا حسبي الله ونعم الوكيل
خامسا بيعجبني خفة دمك
ههههههههههههههههههه
والله زي العسل يا ايمان
يخرب عقلك
ومجموعة الرسايل الغبية دي جات كلها في وقت واحد ولا انتي كنتي بتجمعها
بصراحة العالم دي دمها يلطش لو طان يعني في دم
والله من سذاجة الرسايل دي بحسها متفبركة سعات
اصل مشمعقولة فعلا الناس بقو بالسذاجة والرخص ده
موضوعك شيق
بالتوفيق
تحياتي
karim :
اولا طبعا انا فرحانة انك على قد فكيرى غيرت رأيكف العزول عن عالم التدوين و يارب فعلا يكون تفكيرى ف محله
عموما انا هدخل مدونتك دلوقتى و اشوف و ربنا يستر و ملاقيش قفلتها
ثانيا حلم كل واحد واحده وحلم كل واحده واحد ده صحيح بس عمره مابييجى بالشكل ده لانه البيت اذا اتبنى على أساس مش صح هيتهد
و الله أعلم
بشكرك بجد على مشاركتك و على فكرة كتير لما تقفل الموبايل طول الفترة دى .. أنا بلعب فيه جيمز
هههههههه
تحياتى ليك
_____________________________
الأخف دم و الشاعر الموهوب أشرف :
الكلام الحلو ده فيا ؟؟؟ ربنا يكرك يارب ات دايما رافع من روحى المعنوية
و اذا كنت فعلا خفيفة الدم - و الله أعلم - فده مايعتبرش شئ من خفة دمك
أنا فعلا غبت كتير و الموضوع اللى فات كان خلل!!! بس ان شاء الله مغيبش تانى كتير.. مسافة المصيف و ااجى !!! و ارع زى الهنود الحمر
ههههههه
تحياتى ليك
__________________________________
Sendbad :
عندك حق الدنيا اتغيرت و فيه سوء ف استخدام التكنولوجيا .. الناس مش عارفة ايه الصح و ايه الغلط
عشان كده فعلا لازم يكون فيه توجيه
عارف أكتر التوجيه فعالية .. مش النصح و لا العنف و التعنيف
أهم حاجة انه الانسان يكون قدوة حسنة لأهله و لأولاده وبالتالى فمفيش قلق عليهم اطمن يا سندباد مش كل الناس بتقلد الغلط اللى بتشوفه بره
أهم حاجة متشوفش الغلط من جوه
و لانك انسان بجد و بدون مجاملة محترم حسب اتجاه تفكيرى لعدم معرفة شخصك طبعا فانا واثقة انه اولادك لازم هيكونوا ع الطريق الصح
بشكرك يا سندباد على مشاركتك الفعالة و خفة الدم أتمنى متكونش مجاملة
تحياتى ليك
_________________________________
أحمد سلامة :
هههههههه تصدق بالله مفيش كلمة واحدة أنا مفبركاها و ربنا أعلم ان كنت بكدب
بس أكيد ماكانتش الرسايل الغبية دى بتيجى ف وقت واحد
امال انا بقول بحث و تدقيق ليه ؟؟؟؟ يا ابنى ده انا اتشليت عقبال ما جمعتهم
أهم حاجة انك تصدق انه فعلا الناس بقت بالسذاجة والرخص ده !!!! و تخلينى أصدق أنا كمان لانه انا نفسى مش عارفة أصدق
تحياتى ليك
انا معرفش اجامل
أهلاً تانى يا إيمان :
بقى معاكى الحفلة ومش تقولى كل دة .
ده أنتى طلعتى شخصية تقيلة اؤى فى الاكادمى .
انا مش عارف انتى عامله حذر تجوال على البلوج يعنى مش حاطه الايميل مش مشكلة لكن كان المفروض يبقى فيه خاصية راسلنى عشان لو اى حد يحب يبعت رساله ليكى .
على العموم ده ايميلى :
thenight_1987@hot
ياريت تبعتى ليا ايميل عشان تبعتى ليا بقى اللقاء الطلابى لانى هموت واشوف شكلى كان عامل ازاى .
وكمان عايز استفسر عن شوية حاجات تانيه .
لانى بفكراحول السنه الىل جايه المعادى
على فكره انا ساكن جنب كليه فى القاهرة اصلا
bye bye emy
و الله مرورا بارتفاع اسعار البطيخ و ثبات اسعار البرقوق
و انخفاض المشمش
احب اقول ان لما
الفراغ بيكاكى الناس بتعمل اى حاجه لحد بيقى مرض
و طبعا عشان احنا شعب متخلف
ف ده المتوقع ان دى تبقى تقضية الفراغ
انه قاعد على الشات او الرسائل ده يشتغلو فى بعض
لان ان واثق انه نص ده واحد ولد بيشتغل واحد زيه
فراغ بقى
بجد الموضوع كميل
تحياتى
عشان الثواب و كده
ها
انا عارف انتي زعلانة لية من الموضوع دة
اكيد انتي بعتي رسالة ومدحدش رد عليكي
فيها اية يعني لما البشر دي تعبر عن التخلف الي هما عيشين فية
ولا انتي ضد حرية التعبير عن الرأي
سيبيك من المحليات بتاعت مصر و جربي تتفرجي على رسائل الاخوة العرب
وحتعرفي انحنا ليسا فينا أمل و عمر
ههههههههههه
لا بجد حرام كده
اسلوبك تحفة
الجميل في الموضوع انك ممكن لو ده مش ع الميلودي تلاقي مثلا قناة دينية واحد باعت رسالة اذكار بعديها واحد باعت رسالة عايز عروسة
والله العظيم قريتها بعيني واحد باعت بيقول انا -مش عارف كان من الأردن باين - المهم بيقول أنا من بلد كذا وعندي كام وتلاتين سنة شكل الشيخ مشاري العفاسي وصوتي زي صوته بالظبط
كنت عايز أقوله واللي يلاقيه يجيبوا معانا هنا أو يوديه بقالة الحاج اسماعيل
تحياتي على الاسلوب خدي شوية وسيبيلي الباقي وانا راجع هاخدهم
يخرب عقلك يا ايمي..الموضوع ده كان فارسني من مدة طويلة قوي..ومكنتش عارفة ادخله منين وافش غلي
ربنا يكرمك فشيتي غلي بدل ما كان يجيلي ضغط
من الاخر كدة الناس دي عايزة ضرب القباقيب وان كانت القباقيب مش متوفرة يبقى الشبشب الاحمر البلاستيك ابو وردة
انا ابقى شايفة (صدق او لا تصدق) ان الموضوع مفيهوش كدب خالص خالص كل واحد بيدخل ام الشات ده بيكون عارفة ان الناس التانية كدابين ومبروم على مبروم ميرولش:)
ولا ايه؟؟؟
ابقي تعالي يا ايمي
بجد انتي مصيبه في التعبير بسخريه مع اني اول مره ادخل اعلق عندك بس انتي مشكله بجد
برافوووووووووووو
أحم
أحم
وكمان واحدة احم
انا جيت
والحمد لله بعد رحلة عززززززززززاب مع الامتحانت ربنا ياخدها
المهم الحمد لله انا عدت بسلامة الله الي الكمبيوتر سالما غانما
انما اية الموضوع المسخرة ده
والله تنفعي زي الجماعة بتوع الابحاث الاجتماعية وابحاث الشباب ده
والكلام العبيط
بس بصراحة الصراحة يعني
موضوع هايل
انتي عارفة اول ما جبنا الدش بابا كان فاكر الشريط ده اخبار
وكان لما نكون مشغلين فيلم يقراه
وشوية شوية
اية المسخرة وقلة الادب ده
اية الكلام ده
وفين فين لما فهم انها خدمة موبايل
لما اخويا الصغير اصر انه يبعت تحية للاهلي
اه بالحق ده موضوع تاني موضوع المسج الرياضي
عايزلو موضوع لوحدة
انا مرة قريت علي دريم 2 في برنامج شوشو
((من المخارات الزملاكوية الي المخابرات الاسماعيلية نشكركم لحسن تعاونكم معنا)))كان سعتها الاسماعيلي غالب الاهلي
اية رايك
موضوع هاييل
السلام عليكم ورحخمة الله وبركاته
ياطوووووووووولة بالك ، وجالك قلب تعدي قدام الشريط اللي بيلف وكمان تقري وتسجلي الكلام
انا لو منك كانت مرارتي اتفقعت من زماااااان من اول ماسيج
عجبني اوي الاتنين النكديين اللي ناويين يسوو عيشة بعض ..هههه
تحيايي
ههههههههههههههه
مديحة من اول فيصل: امك تخينة اوى يا محمود .. طلقنىىى
محمود آخر فيصل: انتى طالق يا زبالة
فيصل: إتفوا عليكوا انتوا الاتنين
هههههههههههههههههههههههههه
صباح التخلف العقلى يابنتى معلش
اللى يعيش دلوقتى ياما هيشوف
بجد ربنا يخرجنا من الدنيا دى على خير
اللهم اميييييين
----------------
مدونتك تجنن ياست ايمان ومش عارفة ازاى اول مرة اكتفشها دلوقتى يعنى هههههههه
لا بجد ما شاء الله لا قوة الا بالله ربنا يحميكى ياااااااااارب
سلام يا قمراية
:)
المدونه ممتعه ودمها خفيف وفعلا الناس عندها فراغ وكمان مفيش صدق وكله بيلعب علي كله.. بس صدقينى دا عالم رهيب واكيد تموتى على نفسك من الضخك وانتى بتابعى شات التلفزيون وفيه ناس مسجله باسم مستعار نفسه على جميع المحطات... وخصوصا الغنائيه وكلمنى على الخاص وسبحان الله كلهم صدفه رجال اعمال.. اكيد اعمال من عينه صاحب مغسله او كشك وعامله سنترال .. ابقى اتفضلى اشربى شاي عندى فالمدونه بتاعتى
sendbad :
بشكرك جدا يا سندباد ويارب أكون دايما عند حسن ظنكم
__________________________________
Karim :
لا والله لا شخصية تقيلة ف الكلية و لا حاجة .. هو بس عارفنى عشان مسابقات الشطرنج و أخيرا الشعر و بالتالى ادارة رعاية الشباب مش بتقدر ترفضلى طلب !! متواضعة أنا جدا
ههههههههههههههههه
بخصوص الحظر اللى عاملاه على المدونة بخصوص الايميل فده عشان من غير ما أحطه بلاقى تتار زى المغول ضايفنى و المصيبة مش بعرف ايميلى جابوه منين فتخيل بقى لما أحط لينك فمدونتى على ايميلى ؟؟؟ ده أنا أولع ف الايميل و انتحر بعدها
أنا هضيفك ان شاء الله و هبعتلكالفيديو العظيم بتاع كليتنا الفظيعة بس رجاء تستنانى شوية للسبوع اللى جاى
هصيف عقبال عندكم
تحياتى
_________________________________
Mamado :
بطيخ ايه و برقوق ايه ؟؟؟؟ ألطم يعنى
هو أنا كاتبة بوست عن سوق الخضار
هوا فعلا على رأيك لانه شعب مصر شعب متخلف
بس يبك هو انت بتقلدنى يا مامادو ؟؟؟؟
طيب طيب
تحياتى عشان الثواب و كده و ابقى قلدنى بقى
__________________________________
اسكندرانى ف الغربة:
و بعدين يعنى معاك ؟؟؟ هو انا اتجننت عشان ابعت رسالة
ليه اتهبلت ؟؟؟؟؟؟؟؟؟
خلاص يا سيدى أنا هشيل الحقد اللى مالى قلبى و هسيبهم لحالهم يضحكوا على بعضيهم
يولعوا ف بعض
أنا مال أهلى
ما انا كنت ف حالى
ماشى يا سيدى حقك عليا
تحياتى ليك و امرى لله
___________________________________
Sakayar :
ربنا يخليك يارب و يا سيدى خد اسلوبى كله و ببلااااااااااش كمان
فعلا حتى القنوات الدينية مش عاتقينها
ربنا يحفظنا
بشكرك على تعليقك و خفة دمك
تحياتى ليك
__________________________________
بيسوو :
و الله واحشانى يا بيسوو و انا آسفة انا ما كنتش بدخل النت أصلا الفترة اللى فاتت و الاسبوع اللى جاى كمان مش داخلة عشان مصيف و كده ان شاء الله
و باذن الله لما أرجع ان شاء الله هبقى أزورك و اشرب الشاى عندك كمان
و بجد انتى عسولة و لذيذة مووووت
تحياتى ليكى
شاب نفسه يحقق حلمه :
ربنا يكرمك يارب ع الكلام الحلو ده
و تعجبكم مواضيعى علطول
تحياتى ليك
__________________________________
أحمد العربى :
مبروووووووووك أولا على نهاية الامتحانات و نهاية العذاب
و يدومها نعمة علينا يارب
أنا هغيظك بقى
أنا الحمد لله دى أخر سنة ليا مذاكرة
ههههههههههههههههههه
ربنا يستر بس و اتخرج على خير
دمك خفيف كالعادة يا أحمد و تعليقك لذيذ كالعادة و فعلا الموضوع ده حاجة و موضوع الدش ده حاجة تانية
هههههههههههه
أحسن حاجة نشيلوا و نستريح
تحياتى ليك
___________________________________
خمسة فضفضة :
تعرفى و الله أنا شفت لينكات لمدونتك و تعليقاتك اللذيذة موووووت ف مدونات تانية و بجد قلت انا عايزة ابقى أتعرف على صاحبة المدونة
و انتى سبقتينى
القلوب عند بعضها
يارب بقى نكون أصدقاء علطول
و شفتى بقى طولة بالى
دا انا كنت هتشل يا بنتى
الحمد لله جات سليمة
تحياتى ليكى
__________________________________
انسانة :
ايه ده يخرب عقلك
أنا بجد فطست م الضحك
لو انا خفيفة الدم امال انتى ايه ؟؟؟؟؟
بشكرك بجد على كلامك الحلو
و فعلا اللى هيعيش ياما هيشوف
تحياتى ليكى
_________________________________
بنت القمر :
بشكرك بجد على كلامك الحلو ويارب تكون مش مجاملة
عموما لو حتى مجاملة فهيا مجاملة رقيقة
وفعلا بشوف الأسماء بتتشابه بشكل غريب
وف كل القنوات مش عاتقينها
حتى القنوات الدينية
و فعلا تلاقى معظمهم أصحاب ورش و سباكة و كده
و دى مش معايرة و الله بس لانهم بيكدبوا و يستهبلوا فيستاهلوا أى اهانة
أنا يشرفنى أزور مدونتك بس بشرط تغدينى ؟؟؟؟؟؟؟؟؟؟
تحياتى ليكى
اجمل حاجه فى مدونتك الصور
اجمل حاجه فى مدونتك الصور
على فكره انا برده بفضل اقرأ الكلام الاهبل اللى بيتكتب دا
ولا اللى لابس اسود عامل نفسه ظل وال بيحل مشاكل الناس والناس بتشتغله ووكل شويه واحده تبعت قصة ما تتصدقش وهو بهبله مفكر نفسه مهم اوى وعمال يرده
احسبينى من اللى هيتشلوا معاكى اصلها حاجه بقت تكسف والله الناس سبت الدنيا وقعدت للشات
بوست هايل
ازيك يا يمان بجد ....... مووووووووووووووت بجد موضوع لزيز اوى بس انا مستنى المضوع التانى الى كنت سمعت جزء منه على العموم لتانى مره الموضوع ده تحفه ومهم وكله صح
هشااااااااااااااااام
اه صحيح يا يا ايمان بليز تبقى تكتبى ارقام تليفونات البنات الى فى الشات بتاع التليفزيون عشان اتصل بيهم انصحهم ولو كتبين العنوان مفيش مانع لزم نعمل خطوه ايجابيه
هشاااااااااااااااااام
LOL :D
and there are special channels for these stuff (chat),...
we7agat 2eh...tehwes...7aga te2ref!
يعنى الست عندها 75 سنة و عوزه تتجوز
ليه بتبصوا على نعمة غيركم و تبقوا عايزين تأكلوها ما تسيبوها فى حالها تعمل اللى عايزة تعمله
دى يا حسرة لسه شابة
هههههههههههههههههههههة
تحياتى
karim elmasry: bgd madiontak gamila wa rabana ya wafa2k wa ana raiee ana dah fada wa 3la fakra kol wahd 3arf ano
biadhk 3ala altani
هههههههههههههههههههه
بجد انتي مش ممكن
انتي قاعد ه راصده البانر اللي تحت في الششاشه
انتي جباره
بس بجد بجد عندك حق
حاجه تفقع المراره
ههههههههههه
ظريف اوى الموضوع ده
هيافة. تفاهه يمكن
أعتقد ان التفاهه والهيافه بقت الوسيلة التجارية رقم واحد اللى ممكن تنفع معانا ميه ميه
يعنى اعملى اى حاجه تافهه وهتنجح وهتكسر الدنيا
وكل اما الحاجه تكون هايفه وتافهه هتلاقى الإقبال عليها زى الفل
واهو رزق الهبل على المتخلفين
عندى كلام لكن لزوم الأدب بقى مش هعرف هقوله فى التعليق
لأ مش معقول
بتطرحى قضية هامة جدا بأسلوب ساخر
برافو عليكى
تصفيق حاد
هاي أيمي أنا رشا تعليقاتك فطستني من الضحك بجد ونستني كل حاجة بس بردة أنت قروبة خالص يا عفريتة أخت بالك من الكلام أحلي تعليق بتاع الراجل الي عندة 75 سنة أستمري يا جميل في الكتابات
ana ma2aretsh el post dah,,
asli mesada3 delwa2t elsara7a,weba3din da post tawell ta7n,bas wade7 eni betekalemi feeh 3an elshabab elshankoti,rabena yehdehom we yehdeena isa.
bas elmadmon wade7 ,welgawab beyban men 3enwano,shkelk modawentek gamda esara7a,akeed i ll visit u again,
btw,elmazzika eli enti 7ataha dii gamda gedan,
حقى أهرتل :
ويارب متكونش الصور هيا بس اللى جميلة.. أتمنى تكون الموضوعات أجمل
تحياتى
___________________________________
Sendrlla :
عندك حق أنا فعلا كتير بقرا للى مسمى نفسه الظل و قاعد يحل ف مشاكل غيره و ده شئ مش غلط بس المشكلة انه المشاكل اللى بتطرح بتكون أتفه م التفاهة
ياللا كلنا مشلولين ... كلنا لها
تحياتى ليكى
________________________________
هشام :
التليفونات و العناوين بتاعة البنات هتلاقيها عند الكنترول بتاع أى قناة
هيييييييييييييييييييص بقى
الحمد لله انك مش بترخم زى كل مرة
ربنا يكملك عقلك علطووووووووووول
و الموضوع اللى هتتجنن عليه هنزله بكره ان شاء الله
و ذنبك بقى على جنبك
تحياتى
_________________________________
Hurricane_X :
yes, I watched some channels for chat.. But the problem is in the other channels cause no one will open the chatting ones unless there's an intent to chat!!!!!
of course, 7aga Te2ref !!!!!
Regards,
__________________________________
بيجاسوس المصرى :
لا و الله مش بنقطع على بعض و لا حاجة
الست عندها 75 سنة و عايزة تتجوز و لا الراجل كركوب و برضه عايز يتجوز
ما يولعوا ف بعض
أنا مال أهلى
الغيرة بقى انت عارف
تحياتى
ellithy :
I added you to my blog list...
Ay khedma !!!
Thank you for your information & I'm much thankful for your interest in caring of other...
Regards,
__________________________________
Karim Elmasry :
منور المدونة يا كريم و شكرا لذوقك
و عندك حق كل اتنين بيبقوا بيضحكوا على بعض
بس المشكلة انه فيهم اللى بيكون مش فاهم حاجة و بيتصدم
عموما هو الأساس غلط أصلا و ماينفعش يكون بالشكل ده
يارب تتابع المواضيع الجاية
تحياتى ليك
_________________________________
اسكندرانى أوى:
ههههههههه
انا جبارة ؟؟؟؟؟
أنا قروبة بس
با ابنى دى حاجة فقعت مرارتى
الحمد لله انى لسه بخير بعد البوست ده
تحياتى ليك
__________________________________
مدونة كسبان :
فعلا الهيافة هيا اللى ماشية دلوقتى
و هيا القنوات دى لو ماكنتش متأكدة ان نص شعب مصر متخلف كانت اخترعت الشات ده ؟؟؟؟؟
طبعا لأ
بس عشان هيا واثقة تمام الثقة انه فيه ناس هبل كتير فرزق الهبل ع المجانين
تحياتى ليك
_________________________________
Voice of love :
ربنا يخليكى يارب
ده أكيد من ذوقك
و ده بعض ما عندكم لانه انتى كمان بتكتبى حاجات حلوة أوى
تحياتى ليكى
__________________________________
رشا بنت خالتى :
حبيبة قلبى رشا بجد فرحانة انك أخيرا دخلتى المدونة بعد غيبة طويلة
و حقيقى فرحانة بوجودك فيها
أنا عفريتة موووووووت لزوم البوستات
لازم أتشل طالما بعالج قضية مهمة ف حياتنا
ياللا كله بثوابه
يابرب تتابعينى علطووووووووول
تحياتى و قبلاتى ليكى
_________________________________
Ahmed Hussameldien :
لما الناس بتقرا موضوعاتى و بتعجبها كفكرة و مضمون ببقى فرحانة أوى
انا طبعا يسعدنى تعليقك بس كان يسعدنى أكتر انك تقراه
و ان كان ع الصداع كنت تأجل اكتشافك للمدونات بعد ما يروح الصداع أحسن
ياللا حصل خير
تاخد اسبرين ؟؟؟؟؟؟؟؟؟؟؟؟
ياللا كلنا لها ... كلنا بيجيلنا صداااااااع
تحياتى ليك
والله انتي عسل اوي
اللى بيحصل ده كتيييييييييير .. شئ ميبقبلوش لا قلب و لا عقل ولا منطق .. استهتار و استخفاف بالمشاعر و كذب مالوش نهاية و ضحك ع العقول !!!! و الدهشة انه كل اتنين بينافقوا بعض و الوسيلة الرخيصة ...... الحب !!!!!! مع ان كل كلمة حب غالية أوى .... ايه اللى جرى للناس ؟؟؟؟؟؟ و ايه اللى جرى للمجتمع ؟؟؟؟؟؟؟؟؟؟
مفيش اكتر من انهم ناس فاضيه مش لاقيين حاجه يعملوها
الناس مبقتش لاقيه اللي يشغلها
خلاص حتي اللي عندو70 سنه بقت حاجه تفقع
Mai :
عندك حق يا مى بقت حاجة تفقع وربنا يخليكىبجد على المجاملة الجميلة
و يارب تتابعى مدونتى علطول
تحياتى
ya ahlan ya ahlan be el shabab el ammor
to7fa
eh el 7alawa de
el zaher enne la2et sherek a leya fe el defa3 3an 7okok el mar2a
3omoman el sabbab fe elle beye7sal dah en el balade fe 7ala men al khomol al sakafi wa el egtema3y
we el shabab mesh la2yen kodwa
التعرف ما بين طرفين مش من الشات بس ده من الجرايد كمان جاية اقرأ في الجرنان لقيت مطلوب مرأة مطلقة او ارملة او معوقة بشرط يكون لديها شقة شوفتي وصلت لدرجة ايه
تحياتي دي اول مرة اجيلك بس حكررها
التعرف ما بين طرفين مش من الشات بس ده من الجرايد كمان جاية اقرأ في الجرنان لقيت مطلوب مرأة مطلقة او ارملة او معوقة بشرط يكون لديها شقة شوفتي وصلت لدرجة ايه
تحياتي دي اول مرة اجيلك بس حكررها
HaMbAcAWeY :
أنا اللى فرحانة بجد انه لقيت شريكة تدافع عن حقوق البنات و مش تيجى على الشباب بظلم
احنا ما بنظلمهمش و لا حاجة
و بجد ردك حلو اوى و يارب تتابعينى علطول
تحياتى
_________________________________
عروس البحر :
يا خبر الناس فعلا بقت بتكتب ف الجرايد و المجلات حاجات غريبة بس اللى انتى كتبتيها دى بجد غريبة جدا
ربنا يرحمنا و يعينا
و ياريت فعلا تزورينى علطول و نكون أصدقاء
تحياتى
÷هههههههه
لأ بصراحة تعليقاتك روعة روعة ..يعني
..
معاكى فلان ممكن أعرف اسمك سنك طلباتك ***
آه و ماله أنا فلانة يا ابنى ... و النبى اطلبلى واحد كباب و اتنين بانيه !!!!
احم احم .. و ياريت لو معاهم جوز حمام
يخرب بيت الضحك اللي انا ضحكته عالموضوع ده
بجد عندك حق.حاجه تجيب الشلل
كنترول، أنا عايز أغنية دايما دموع،كررررررر
هههههههههههههههههههههههههه
يخرب بيت عقلك ع الكلام الروش ده، أنا اتفطست من الضحك
كدونة هااااااااااااااااااااااااااايلة
كملي المشوار و اوعي تتزحلقي
سلاااااااااااااااااااام
other things :
هههههههه مهو من الشلل اللى انا عانيته لازم ارد عليهم كويس .. يارب تعجبك المدونة علطول
________________________________
el3araby :
ههههههه يارب مواضيعى كلها تعجبك و تضحك يها علطووووووول
:)
________________________________
المهندس السرى :
ههههههه بقى عايز اغنية دايما دموع
طب مينفعش اغنية دايما مسقعة ؟؟؟؟ دو رى مى فاصوليا مثلا ؟؟؟
ههههههههه
يارب فعلا أكمل علطول ( او حتى وقت كتير شوية ) يسمع دعاك أنا خايفة أتزحلق
هلبس كوتشى عشان متزحلقش !!!!!! هههههه
:)
Post a Comment