أنا قررت أخرج شوية من الطور المضحك و اركب بقى الحنطور و اتحنطر !!!! لا لا لا بجد بقى البوست ده جد شوية
و ما تستغربوش ده و النبى عشان يمكن بكره لما أكتب شعر أو نثر تتصدموا م الاستغراب!!! فسيبوا الاستغراب لبعدين
.jpg)
تفتكروا حب زمان زى حب زمانا ده ؟؟؟؟؟
تفتكروا اختلفنا قد ايه ؟؟؟؟؟
تعالوا نرجع بالزمن ورا .. و نشيل سنين من دفاتر الزمن
هنبعد قد ايه ؟؟؟؟
تعالوا نبعد بعيد بأضعاف و أضعاف أعمارنا ....
و نفرق بين الحب زمان و الحب دلوقتى ..
(1)
زمان ..
كان الحب أجمل شئ ف الوجود .. كان الهدف الأول و الأخير للناس انهم يحبوا و يتحبوا و يعيشوا قصة حب جميلة عذرية خالية من أى غرض أو هدف تانى ..
دلوقتى ..
الحب بنبيع و نشترى فيه !!! زى الطماطم زى الكوسة !!!!! عايز تحب ؟؟؟؟ اتفضل تاخد بكام ؟؟؟؟؟؟؟؟!!! ... بقى الحب ديكور جميل زى فازة حلوة بنزين بيها البيت عشان مايبانش كئيب قدام الناس .. لكن الورد لا بنرويه و لا بنخليه يتنفس
و الورد ف الفازة نلاقيه بيدبل و نشوفه بيموت قدام عينينا و ما بنتحركش
بقى الحب زى رسمة حلوة بتترسم بمهارة على قلوب و عقول الناس !!!
بقى الحب غنوة جميلة و كام كلمة بننردها يمين و شمال !!! و الغنوة تقدم و نزهق منها و نردد غنوة جديدة !! و الناس دلوقتى عشان تحب لازم يكون ف مقابل مادى !! بقى هدفهم الأول و الأخير ... الماديات و طبعا الوسيلة الرخيصة .... الحب !!!! بقى الحب بالنسبالهم زى الأكل زى الطبيخ زى ترويق البيت زى أى روتين عادى !!!!!!
(2)
زمان ..
كانت الناس بتعيش قصص الحب و تتوجها بالجوازعشان كان هدفهم انهم بالحب و الجواز يبدأوا صفحة جديدة تضمهم هما الاتنين ... كان الجواز بالنسبالهم هو حياة تانية للحب و تكملة ليه .. كانت الناس بتتجوز عشان بتحب عشان ماتقدرش تكون ف غنى عن الطرف اللى بتحبه ..
دلوقتى ..
الجواز بقى مقبرة للحب .. بقت الناس بتتجوز عشان المفروض انه ده نهاية الحب و مش بدايته الحقيقية !!! و بقى كل طرف – ولد أو بنت – يرسم ع التانى مشاعر الحب الفياضة عشان بالحب تعمى العيون و ميبقاش فيه طريقة لتدخل العقل !!!!! و بقت الناس عايزة تتجوز و خلاص .. تحب و لا ماتحبش ما تفرقش كتير !!! و تلاقى واحد بيقولك : يا سيدى انت مكبرها ليه ؟؟ بكره الحب ييجى 
بعدين بالعشرة !!! و تلاقى واحدة تقولك : أنا أتجوز و اتستت و يبقالى بعل و بيت و عيال أهم حاجة و بكره برضه الحب ييجى بعدين !!! – ييجى يزورهم يعنى ؟؟ و ياترى هييجى بقى من أنهو داهية ؟؟؟ - لأ و الغريب بقى لما تلاقى ناس بجحة تقولك : حب ايه و هباب ايه !!!! أنا آه ممكن أرسمه على واحدة عشان تقبلنى بعيوبى و نواقصى لكن انى أحب بجد يا ابنى أنا من النوع العملى مليش ف العواطف !!! و تلاقى بنت معندهاش دم تقولك : حب ؟؟؟؟ بطلوده و اسمعوده !!!! ليه هنأكل الولاد حب و ندخلهم المدارس بالحب و ندفع فواتير و نجيب لبس و شقة و عربية بالحب ؟؟؟؟!!!!!!!
.jpg)
(3)
كان لما اتنين يحبوا بعض كان كل واحد فيهم يحاول ينقل مشاعره الحقيقية ف أبيات شعر أو حتى كتابة عادية بس صادقة .. كانوا بيهادوا بعض بقصايد شعر كتبينها بإيديهم و بأحاسيسهم و عواطفهم الجياشة ..
دلوقتى ..
بقت المشاعر و الأحاسيس بتتنقل بضغطة واحدة على الكيبورد !!! لأ و بقى الموضوع سهل جدا ف تبادل المشاعر .... الحب بقى رنات – مسد كوولز – المسد الأول الساعة 1 يعنى بحبك و الساعة 2 يعنى اشتاقلك و الساعة 3 يعنى بفكر فيك و الساعة 4 يعنى بطمن 
عليك .... و هكذا لحد الساعة 12 اتخمدى !!!! – يا حلاوة يا ولاد !! بقى الحب رنات و رسايل و شات !!!!
(4)
زمان ..
كان الحب حتى ف الأغانى ليه معنى سامى و ليه كلماته المعبرة ... كنت تعرف تفرق بسهولة بين الأغانى العاطفية و أغانى حسبالله !!! من كلماتها من لحنها من صوت مغنيها
دلوقتى ..
تلاقى الأغانى العاطفية - أو اللى مفروض انها عاطفية – شوية كلمات ركيكة على شوية طبلة و شوية رقص ف الفيديو كليب 
و يقولولك دى اغنية حب جامدة جدا !!!!! منتهى الرومانسية
لما مثلا نبطل نسمع لأم كلثوم و عبد الحليم و فيروز و نسمع بقى لسعد الصغير و نحب ف العنب و نحب ف الحمار !!!! أو لما واحدة تقول لحبيبها بحبك يا حمار و يروح هوه منهق !!! منتهى الرومانسية
(5)
زمان ..
كان الحب شعور مستخبى جوه قلوب الناس مش سهل التصريح بيه ... كان الحب ممكن يكبر و يكبر جوه قلب الواحد سنين و سنين من غير ما يصرح عنه أو يلمح بيه ... كان الحب بنقدر نشوفه ف عيون الناس .. ف أفعالهم .. ف مواقفهم .. كان الحب كلمة بسيطة بتتردد ف خجل بين شفايفهم لا عارفين يقولوها و لا عارفين يكتموها
تلاقى الشاب من أول أو تانى مرة يقابل فيها البنت يروح يقولها بحبك !!! طب تيجى ازاى ؟؟؟؟ أو تيجى ازاى لما البنت تخرج عن طورها الخجول بفطرته و تروح لعند الشاب و تقوله بحبك من غير لا احم و لا دستور !!! و تبقى مستنية رده عشان لو وافق تروح تخطبه
بقى الحب شوية كلام أغانى على شوية من سيناريوهات الأفلام !!!! و بقى كل انسان – ولد أو بنت – بيتنافس مع غيره من نفس النوع مين هيقدر يوقع البنت دى ف حبه أو مين هتقدر تخلى الولد ده خاتم ف صباعها !!! و بقى الحب شعور جرئ أو ممكن تقول بجح مايتكسفش انه يتقال أو يتعبر عنه قدام ملايين الناس
(6)
زمان ..كانت البنت تطل من الشباك المتوارب و ف لحظات صمت و لهفة عينيها تقابل عينين حبيبها و الكلام بعينيهم ياخدهم لوادى بعيد .. كان الحب بطبعه شعور خجول
دلوقتى ..
عادى خالص لما تشوف البنت مستندة على دراع حبيبها و ماشيين يتلكعوا !!! و ميبقاش شئ مثير للدهشة ف زمانا ده انه تلاقى بنت حاطة راسها على كتفه أو حتى حاضناه !!! و بقى شارع الغرام هوا الشارع اللى بيحصل فيه المفاسد !!! بدل ما كانت " شادية و عبد الحليم " عمالين يغنوا للحب ف شارع غرامهم ..... و كل اللى بيحصل ده و أكتر منه بكتييييير تحت منطلق الحب !!!!! حبهم عزرائيل
لأ مش هوا ده الحب ... سموه أى شئ تانى
(7)
دلوقتى ..
الحب يعنى مصلحة !! الحب يعنى تسلية !! و الحب يعنى اعلان عن البنات و عرض عن الرجال و اللى ما يشترى يتفرج !!! و الحب بقى دلوقتى ليه سمسار عشان يوصل الحب للناس بأقل التكلفة و بأسرع وقت !!!! حاجات كتيييييييير اتغيرت ف الناس مش الحب هوا اللى اتغير ... الحب مفهوم واحد عمره مايتغير بس للأسف احنا اللى بنتغير و ياريتنا للأفضل لكن للأسوأ .. طريقة تفكيرنا ف الحب و طريقة تعبيرنا عنه ..... كله اتغير
مبقيتش أستغرب أحوالنا دى لإنى عايشة ف زمن تانى بعيد أوى عن زمانا ده ..... بس لسه السؤال محيرنى : هوا حقيقى ممكن نسمى ده الحب على الطريقة الحديثة و لا انا اللى عايشة بسذاجة على الطريقة القديمة ؟؟؟؟؟؟
ايمان
40 comments:
ايه ده
هو مفيش حد هنا ولا ايه
على العموم
هو الواحد عشان يغطى البوست كله عايز بوست زيه
بس اقولك بقى زتونه الموضوع
حلوه زتونه دى
الزمن بيتغير و احنا الوقتى فى عصر السرعه و كل حاجه فيه بقت تك اوى
حتى الحب و المشاعر
الناس الوقتى كمان بقت مهمومه و مش لقيه تاكل
هتفضى تحب
اكيد لا
بس برده لسه فى الناس بتحب زى زماااان
البوست حلو اوى و تقريبا غطى كل حاجه سلااااام
مساء الخير
اولا قبل ما اتكلم عن البوست واعلق عليه احب احييكي علي مدونتك انا عشت حالة فريدة وانا بقرا بوستاتك والف جوه مدونتك يمين وشمال بصراحة انا انبهرت انبهار غير عادي مجهود هايل ورقة غير عادية احييكي
بالنسبة للحب اعتقد ان الحب مالوش دعوة احنا اللي بقينا وحشين يعني كان المفروض يكون عنوان البوست اللي كانوا بيحبوا زمان واللي بيحبوا دلوقتي حرام نظلم الحب ، الحب اجمل حاجة في الوجود الحب بانواعه حب الامومة والابوة والبنوة والحبيبة والوطن حتي حبك لجهاز الكمبيوتر او لمدونتك الحب ده الطاقة اللي بتخلينا نعرف نكمل ، كون اننا بنفهم الحب غلط وبنحسب بالورقة والقلم وننسي ونقسي ونهجر وننتقم يبقي العيب فينا
معلش انا طولت بس البوست بتاعك محتاج تعليق كبير كبير اوي وياريت تسمحي اني ازور مدونتك مرة تانية ويارت تسمحي اني اضيفك عندي
تحياتي
أولا تسلم إيديكي على الكلام الرائع ده .. وأنا فرحت قوي عشان لسه في حد بيفكر بالطريقة دي في الحب .. بس خليني أقولك حاجة صغيرة عن تجربة ... أحيانا بجد الحب مبيكونش لوحده كفاية عشان يستمر وبيكون محتاج لعوامل دفع اللي هي الفلوس طبعا في زمننا ده .. الفكرة إن زمان كانت الفلوس مش مشكلة والشغل مش مشكلة والشقة مش مشكلة .. كله متوفر فالناس كان عندها وقت تروح حفلة أم كلثوم كل خميس بعد ما يلبسوا أشيك بدل وفساتين سواريه .. وكان العشاق عندهم وقت برضو يتمشوا على النيل بالساعات كانت حياة بسيطة وجميلة.... بس دلوقت معنى الحب جوانا اتشوه عشان احنا تفكيرنا اختلف لأنه بينحصر في حاجة واحده ( الماده ) ..
بس بجد بحييكي على الكلام الرائع ده .. واحساسك الجميل
mamado :
بشكرك اولا على تعليقك بس فيه حاجتين مش متفقة فيهم معاك و ده على سبيل ابداء رأيى مش أكتر
"الناس مش لاقية تاكل هتفضى تحب"
مفيش اى جهة ربط بين الاتنين
و كون ان الناس مهمومة فالحب هوا اللى بيديلهم الأمل ف الحياة و بيخليلهم الدنيا وردى حتى لو كانت الدنيا غير كده
"احنا بقينا ف عصر السرعة و كل حاجة بقت تيك اواى حتى الحب و المشاعر"
اول مرة أسمع عن مصطلح الحب تيك اواى
على كده انا بقى استئذنك أجيبلى 6 كيلو حب و عليهم شوية عاطفة لزوم السلطة!! هههههههه
ماهيا بقى ماتجيش غير كده
و كويس انه فيه ناس لسه بتحب زى زمان
بحييك انك مش من ضمن مؤيدين عصر السرعة
و لا انت من مؤيدينهم ؟؟؟؟
عموما تحياتى ليك
__________________________________
sendbad :
انا بشكرك جدا على الكلام الجميل ده و بجد دى مجاملة رقيقة جدا رفعت جدا من روحى البلوجية
فعلا مش الحب هوا اللى اتغير لكن الناس هيا اللى اتغيرت و انا سميت الموضوع ده و مقصدش انى أظلم الحب لانى و ضحت ف البوست انى أقصد الناس مش الحب
بجد كلامك كان معبر جدا لما اتكلمت فيه عن الحب و عن انه العيب ف الناس مش الغلط ف الحب
أنا بشكرك على تعليقك و طبعا يشرفنى انك تكون من أصدقاء مدونتى و يسعدنى جدا انك تضيفنى واضيف مدونتك
تحياتى ليك
__________________________________
Mohamed :
نا بجد بشكرك على تعليقك عندى
بس اسمحلى أقول حاجة
أنا اتعلمت انه الحب الحقيقى مفيش حاجة بتمنعه و بيقدر يصمد قدام أى ظرف الا مشيئة ربنا
كون انه الحب محتاج فلوس عشان يستمر اذن هوا مش حب هوا تجارة
لانى بسمع عن قصص حب كتير قدرت تقف قدام نقص المادة أو حتى الفقر
بس بجد كلامك كان جميل خصوصا ذكرك لحفلات ام كلثوم و التمشية على النيل و انه قد ايه كانت الحياة فعلا بسيطة و جميلة
تحياتى ليك
بوست هاااااااااااااااااااااااايل
(شايفة كام الف)
طريقة العرض هايلة يا ايمان
وشاطرة انك سمعتي الكلام وابتعدتي عن حكاية حقوق المرأة وكلام البتنجان ده
كلام جميل ما فيش كلام من بعدة بس كلة أكتئاب وزهق من الحياة أمال فين روح التفائل الي احنا لازم نعيشة لو كل واحد سلم نفسة للامثال الي ممكن تكون موجودة و منتشرة حيزهق انا شايفة لازم يبقي عندنا أمل في كل حاجة ولا نموت احسن وبلاش نعيش
أحمد العربى :
طبعا كلامك الأولانى فرحنى جدا بانه طريقة عرضى للموضوع كويسة
بس بقى كلامك التانى مش هقولك
احنا بتنجان ؟؟؟ ماشى يا احمد يا عربى ده انت بترخم بقى
طبعا و حيات أبلة نظيرة اللى معرفهاش و لا عايزة أعرفها ليكون البوست الجاى أو اللى بعده صدمة ليك ما بعدها صدمة
ماشى ماشى و ابقى ساعتها بقى قول آمنت بحقوق المرأة
__________________________________
رشا العايدى :
بنت خالتى العسولة منورانى و الله دى أول مرة تقريبا تنورى مدونتى أو على الأقل دى أول مرة أشوف تعليقك
كلامك فعلا ادانى الأمل و التفاؤل مش هقولك بقيت هنفجر من كتر التفاؤل
ياللا الواحد مايعرفش بكره فيه ايه
حبيبتى متشكرة ليكى جدا و بجد فرحنى وجودك ف مدونتى
ياللا بقى سلميلى على تاتو وابقى دوقينى من أكل النهاردة
عن اذنك البامية على النار
هههههههههه
لا لا طبعا ده أنا أصلا ف الكلية بامية ايه
أقصد ملوخية
تحياتى و قبلاتى ليكى
شوفى ياايمان
برة مسألة الهزار يعنى نتكلم جد بقى
الحب هوه الحب فى اى زمان ومكان .. عمره ما اتغير .. اللى بيتغير هيه الوسائل المحيطة بالحب ده .. الواحد اللى بيدى لحبيبته وردة جواه نفس المشاعر اللى عند واحد بيدى لحبيبته شريط سعد الصغير الجديد عشان تفتكره وهوه بيقول اتخنقت لأ زهقت .. الأهم هوه العلاقة السامية اللى جوا القلوب ودى مش بتتغير ..
ياخبر أبيض ده الجد معاك مش نافع خالص
حتى ف عز الجد بتهزر!!! ما انا قلت مالكش حل
بقى فيه واحد بيحب واحدة يديها بزمتك شريط سعد الصغير ؟؟
لأ و ايه بيقول اتخنقت و زهقت ؟؟
ده يبقى مفترى
ماينفعش خالص
شعبان عبد الرحيم ماشى
هبطل السجاير مثلا عشان تفتكره بكل عوب و حاطفة
هوا طبعا الأهم هو العلاقة السامية جوه القلوب زى ما قلت
بس برضه مهم اننا نعبر عن الشعور ده صح
صح؟؟؟
سيبك انت لو مثلا حبيبتك عشان تعبر عن حبها ليك راحت مدياك شريط بوسى سمير!!!!!! هيبقى ايه رد فعلك ؟؟؟
هتتشل طبعا بعد الشر
و ساعتها هتتعلم تحط بقى النقط ع الحروف
ههههههههههه
أى خدمة يا اشرف
بوست هايل ودمك سكر كالعادة
_________________
بس يعنى الحب فى مكان وزمان واحد احنا اللى بنلوثه بإيدنا
والدليل على كدة ان فى ناس بتحب بجد
ممكن يكونوا قليلين لكن موجودين
طب عارفة فعلا الحب دلوقتى اللى بجد احسن من حب زمان عشان بيبقة موجود فى البيئة العجيبة الغريبة اللى احنا عايشين فيها دى
تحياتى ياسكر
احب انى اكون اول واحد يهنيكى بالمسابقه انهرده ومبروك المركز الثالث
وزى ما قولت لكى قبل اعلان النتيجه انك تستحقى المركز الاول فعلا
بس للاسف مش عارف اوصل للموضوع اللى انتى قولتيه انهرده عشان اكتب الكومنت فيه
وكمان للاسف اخر سنه ليكى يعنى مش هش هتشاركى تانى
ومبرووووووووك
كمااااااان مره
البوست جميل وهايل
وكل كلامك صح وفعلا الحب بقى قليل قوى الأيام دى وبقت بتغلبة المصالح والماديات
تحياتى
شريف :
يارب يخلييييييييييييك و يكرمك كده انت بجد بتفرحنى لما أشوف تعليقك
أنا فعلا مشكلتى انى مشكلة !!!! انى مابعرفش أتكلم جملتين جد خالص من غير ما اضحك
يارب فعلا يكون الموضوع عجبك و تكون أهم حاجة من أنصار زمان
عشان بتنقط جدا لما حد يكون من أنصار دلوقتى
و جميل انه تكون مدونتى مرسى لناس كتير و سبب لابتسامتهم
ده أكيد يسعدنى جدا خالص موووووت
بس بشرط انى أخلى مسئوليتى من أى حد يحصله حاجة بسبب الضحك !!!! نادلة موووووووت
لا لا والله مش نادلة أبدا ..أنا دايما مع الشعب
اوكيه تكلم أيها الشعب كلى آذانٌ صاغية
و لا تحب تستنى برنامجى على الهوا ؟؟؟؟؟؟
اوكيه الى لقاء على الإم تى فى
و لك أعظم تحياتى
___________________________________
همسات :
انتى اللى سكر و الله و فعلا زى ما قلتى بيبقى شئ جميل أوى لما يكون ف وسط عالمنا و زمانا ده ناس بتحب حقيقى
عندك حق
لما الورد بيكون وسط الصبار بنقدر نشوفه كويس و نقدر قيمته لكن لما بيكون وسط جنينة مابنشوفهوش
تحياتى يا ألذ سكر
__________________________________
كريم :
بجد انا فرحت جدا لما قريت تعلقك خصوصا انه بيخلد الذكرى الجميلة دى و اللى للأسف انها آخر ذكرى ليا ف الكلية
كانت أول مرة القى شعر قدام كاميرا و قدام لجنة تحكيم و قدام عدد كبير من كل الفروع
و صدقنى و الله انا أصلا ماكنتش عاملة حسابى على شعر خالص
أنا كنت جاية أساسا عشان مسابقة الشطرنج زى كل سنة
مش عارفة ايه اللى خلاها طقت ف دماغى
بس الحمد لله انى فزت بيها
و بجد شرف ليا انى شاركت مع ناس بتكتب شعر حلو كده
على فكرة الشعر بتاعك كان جميل بس كان حزين شوية
عادى يعنى قال يعنى بتاعى اللى كان مزقطط !!! الحمد لله
و استغربت اوى انه عجب ناس كتير الحمد لله .. على بق واحد عايزين نسخة عايزين نسخة
خصوصا الراجل اللى هرى امى معرفتش أتصرف ازاى الحمد لله اننا مشينا بعدها !!!! بس فعلا خسارة كبيرة ليا جدا و شئ بيحزنى اوى انه دى آخر سنة ليا و انى هسيب الكلية بعدها و انى مش هعرف أشارك تانى معاكم
يارب تكون مدونتى عجبتك و يارب تكون من متابعينها بعد كده
وان كان على الشعر ياللا بكره تشوفنى بقوله ف التلفزيون
و تلاقيه مكتوب ف الجرايد !!! وسعت منى شوية
عادى لازم الانسان يكون عنده طموح برضه
و يارب تحقق كل طموحك
تحياتى ليك
___________________________________
Bosbos :
شكرا بجد يا بوسبوس على كلامك الحلو
و أكيد ف كل زمان لازم يكون فيه ناس بتحب حقيقى لان الدنيا برضه بخير
تحياتى ليكى
بوست حلو قوى يا إيمان
وأعتقد إن الخلاصه قولتيها وهى إن الناس هى اللى اتغيرت واتغيرت نظرتهم للحياة.
بس تصدقى فى أمل وحسيته أكثر لما قريت بوستك لأنه طلع لسه فى حد بيفكر ومفتقد معنى الحب الحقيقى .
آه قبل ما أمشى خفة دمك مش هتعرفى تتخلصى منها وياريت ما تحاوليش
تحياتى
أمل :
ياااااه أمل !! فينك من زمان ؟؟؟؟ دا انا قلت البنت نسيتنى
أنا فرحت جدا بوجودك و بمرورك على مدونتى و بجد سعيدة جدا بكلامك الحلو
و يارب ما تغيبى كتير كده
و فعلا عندك حق بلاش أتفزلك و اقول هتكلم جد لانى أصلا مليش فالجد كتير!!!! ههههههههههه
عادى مفيش فايدة فيا
ربنا يصبرنى على نفسى
تحياتى ليكى يا ألذ أمل
ياااااه اخيرا صفحة الكومينتات فتحت معايا
المهم
الحب زمان كان له طعم دلوقتي بقى ماسخ
الحب زمان كان حب على أصوله دلوقتي لعب عيال
الحب زمان وزاوومن
أقريها بالأنجليزي مش بالعربي
كل حاجه بتتغير مش عاوزه الحب يتغير
بتفكرينا بالذي مضى ليه
احنا عجزنا يا بنتي
ولسه عايشين في زمان
مش راضيين نصدق الواقع
تعليقى على الموضوع بقى :
لست من انصار من يلومون الزمان
او يقولوا زمان كان حاجه ودلوقتى اتغير
لا ... فى الحقيقه ان الحياه والدنيا ثابته , والانسان هو اللى بيغير فيها
................................
اما فى تحليلك للحب زمان ودلوقتى اعتقد انه مش فرق من زمان ودلوقتى اعتقد انه فرق بين شخصيه واخرى ، يعنى ممكن نلاقى النوعين بتوع زمان ودلوقتى موجودين دلوقتى .
...............................
واجمل حاجه فعلا عجبتنى فى موضوع ان دلوقتى بقى واحد بعد ما يشوف واحدهمرتين يقولها بحبك لانه فعلاً ده اللى موجود دلوقتى وللاسف اللى بيبتدى بسهوله بينتهى بسهوله
وبرضه موضوع الاغانى انا اه بحب اسمع اغانى واعيش معاها لكن مش اطبقها على نفسى ... لكن لو عايزاغنيه عن نفسى او عن اى حد انا بكتبها واللحنها واغنيهااا .
.................................
وكمان عايز اضيف حاجه اخيره ...
اللى يحب دلوقتى لازم ينعزل عن الناس لان الناس مش بتبقى حاسه بيه او شايفه اللى جواه فا من الافضل الان على العشاق ان ينعزلو عن العالم الخارجى ...
تحياتى ,,,
عندي ليكي تاج إبقى تعالي شوفيه
زمان ودلوقتي
زمان ودلوقتي
زمان ودلوقتي
هاتفضل المشكلة الأزلية .. طول الحياة .. لكن في نقطة مهمه انتي مش واخده بالك منها .. إن زمان ده انتي ما تعرفيهوش غير من الأفلام وحكايات الناس اللي زي جدتي وجدتك مثلا
واسمحي لي اقول لك ان كل الأفلام والروايات والحكايات دي كلها كلام فاضي
ولو رجعنا بالزمن أكتر ما انتي رجعتي كمان .. يعني انا بفترض معاكي انك عايشه مع قيس بن الملوح واللا حاجه .. وأكبر مثال من الشعر العربي على الحب العذري الطاهر المنزه عن كل شر
(حلوه المنزه دي ؟؟)
المهم .. انتي عايشه في الزمن ده .. برضه هاتلاقي مشاكل
انتي عارفه ان قيس ده كان بني ادم معفن بكل معنى الكلمة ... يعني كان لابس هدوم مقطعه وماشي في الصحرا يقول شعر في ليلي بتاعته دي .. طب انا بس عاوز افهم حاجه ... هو ابن عمها وهايتجوزوا .. فين المشكله بقى ؟؟؟
انا فعلا مش فاهم احمد شوقي لما كتب المسرحية معقدها ليه ؟؟
ما هو المواضيع محلوله اساسا
لكن لا مؤاخذه في اللفظ قيس ده أهبل اساسا ( الشعراء كلهم كده بما فيهم انا )
هي موافقة بيه .. لازم يعني يفضحها بشعره .. تقوم هي ترفضه عشان لو وافقت هايقولوا ان كان وكان والحكايات اللي مش محتاجه شرح بتاعة الأفلام العربي دي
طبعا الواقع مؤرف دايما ومتخلف .. لكن تعالي كده اتفرجي على مسرحية قيس وليلي بتاعة أحمد شوقي
هاتلاقي مثل دور قيس (أحمد علام) فتى شيك جدا ووسيم .. لكن الواقع ان قيس مش كان كده خالص
بلاش ده خالص
تعالى نروح لروميو
هاتلاقي في كمية جمل رومانسية بالغة الجمال قالها الكاتب على لسانه في الرواية أشهرها :
لو استطعت لعقدت لك عقدا من النجوم
لكن لو بصيتي في التاريخ هاتلاقي ان روميو ما كانش بيعرف يقول كلمتين على بعض
المشكله عمرها ما كانت في الزمان
المشكله دايما في الواقع .. احنا بنرفض الواقع بتاعنا فبنجمله .. بأي حاجه بقى .. رواية مثلا أو مسرحية أو فيلم أو حتى قصيدة شعر ... ده الفن ودي وظيفه من أهم وظائفه الأساسية
يعني مثلا جمله زي اللي فاتت بتاعة روميو دي .. الكاتب اللي مألفها أساسا عشان يكتب جمله زي دي فضل يدخن تلات اربع علب سجاير وخمس ست فناجين قهوة ويهرش في شعره كل خمس دقايق .. كل ده عشان يقول جمله
اقول لك على حاجه تانيه
انا شاعر .. بس عمري ما قلت لها شعر
وده مش تقصير مني .. الواقع حاجه والأدب والكلام اللي بنكتبه حاجه تانيه خالص .. وإن كنت انا شخصيا واحد من الناس اللي بيسعوا انهم يربطوا بين الأدب والحياة .. لكن دي مشكلة احنا كلنا بنقع فيها فعلا ولازم نعترف بده .. انتي نفسك اكيد مريتي بحاجات شبه دي كتير
يعني مثلا لو سمعتي قبل كده عبد الرحمن الأبنودي وهو بيحكي بيقول مراتي مره سمعت ليا قصيده كانت مأساوية جدا سألتني هو انت زعلان من ايه . في حاجه مضيقاك عشان كده كتبت الكلام ده .. الراجل رد عليها بمنتهى البساطه هو انا عشان اكتب حاجه حزينه يبقي لازم اكون حزين
بلاش ده وفكري في الموضوع بشكل أكبر .. هاتلاقي عشرات الشعراء اللي بيطلعوا كل يوم في ندوات .. والقدس التي .. والقدس عروس عروبتكم .. ومعرفش ايه في البتاع
وهو أساسا كان سهران امبارح مع البت سنية العارجه وبيشرب قطران وبلاوي زرقا .. ولما يطلع ع المنصة تقولي ايه الوطنية دي
وتحسي انه هايدوب الأرض من الوطنية بتاعته
كفاية كده
اصلي انفعلت شوية
شيرمين :
العسولة شيرمين بجد عندك حق ف كل اللى قلتيه ... كل حاجة بتتغير ... الحب هوا اللى مش هيتغير ؟؟؟ أو بمعنى أصح تعبير الناس عن الحب و اعتقادهم فيه هوا اللى مش هيتغير ؟؟؟
حلوة أوى أوى أوى بجد كلمة الحب ز مان وز ومان
بالعنجليزى !!! لول
و الحب فعلا فيه منه كتتير لعب عيال ... بيتهيألى زمان ماكانش فيه ناس كتير بتستعيل !!! هههه
بس بجد نورتينى يا شيرمين
و طبعا التاج الللى بعتهولى مش عارفة أقولك
ليه كده يا بنتى ؟؟؟ هوا انا ضايقتك ف حاجة ؟؟؟!!! عموما ان شاء الله أبقى أجاوبه بالرموز و تبقى الناس بقى تفك الشفرات !!!! لول
لا لا لا ان شاء الله أجاوبه بجد و عموما الحمد للله مفيش حاجة ممكن أتكسف منها او اخبيها
شكرا ع التدبيسة يا قمر
___________________________________
Karim :
كلماتك عين الحقيقة و عين الواقع و فعلا انا لما اتكلمت عن الموضوع مقصدتش أسئ للحب دلوقتى بس قصدت أسئ للناس اللى بتعيش الحب بالطرق المستفزة دى و ده موجود ف كل زمان و مكان بس دلوقتى أو الأيام دى الموضوع وسع أوى و الرباط فك !!! عشان كده قلت أتكلم يمكن يتربط تانى
قال يعنى صوتى هيوصل للناس كلها
جميل أوى انه الانسان فعلا يحاول يألف كلمات و اغنية لوحده يعيش فيها و يتأملها و يسمعها بعيد عن الناس و يوم ما يحب لازم فعلا ينعزل عن العالم الخارجى - شوية مش انعزال كلى - عشان مش كل الناس بتقدر تفهم يعنى ايه حب
كلماتك جميلة يا كريم و احساساك مرهف جدا بحيييييييك على شخصك
أجمل تحياتى
__________________________________
darsh :
يا خبر أبيض !!! لأ ده احنا نروح القسم بقى
ايه يا ابنى ده ؟؟؟ ده انت بهدلتنى و بهدلت كل الشعرا اللى انا منهم برضه
و بهدلت قيس و بهدلت روميو !!! حتى أحمد شوقى شاعر الشعرا معتقتوش
قيس كان معفن بس كان بيحب بصدق ... و روميو يمكن ما كانش بيعرف يقول كلمتين على بعض بس كان بيحب بجد ... و هوا يعنى اللى بيتكلم بربنط و بيعرف ينمق كلماته مش ضرورى يكون صادق
ما هو ممكن واحد يقول لواحدة زى ما بتقول : لو استطعت لعقدت لك عقدا من النجوم... أو بالعربى بتاعنا لو كنت أقدر أجيبلك نجمة من السما كنت عملتها ( على روحه طبعا ) ههههههههههه لول ... و بعدين لما تقوله لا يا حبيبى انا مش عايزة تحيبلى نجمة من لسما ( مالهاش مزاج ف النجوم ) و تقوله اتقدم لبابايا بدل النجمة يقوللها لا ما انا ماقلتش كده أنا قلت نجمة !!!!!!!!! استهبال يعنى
و هكذا و هكذا على رأى ريكو
بيقوله : الكلمات الصادقة ليست دائما جميلة و الكلمات الجميلة ليست دائما صادقة
فأنهو أحسن ؟؟؟؟
ها ؟؟؟
ما بتردش ليه ؟؟؟؟
غلب حمارك أكيد
أنا فعلا زمان معرفهوش كويس لانى معشتهوش بس ملامح زمان بنقدر نشوفها ف كل حاجة
مش هقولك الأفلام و لا الروايات لانه برضه ممكن يطلع فيلم جميل أو رواية أجمل من زمان
بس الناس اللى عاشوا زمان و قدروا يعيشوا دلوقتى ( أمثال جداتنا ) دول بيعرفوا الفرق كويس بين الزمنين
و بيلعنوا زمانا ده
و بينى و بينك انا بسب ف الزمن ده معاهم ( بلاش ألعن دى ) عادى ... ليه مش حلو الزمن ده لانه مش العيب ف الزمن و لا العيب ف الحب انما العيب فالناس
كان فيه زمان اغنية تقولك (هزيها بشويش بشويش ) !!!! يا ابنى مفيش مقارنة و الله
أنا معاك انه مش ضرورى الانسان يكون ف مود معين عشان يكتب فيه ... ممكن انه يعيش المود ده ف خياله واذا ماكانش بيحب أو مش عايش ف قصة حب يقدر يكتب أجمل قصيدة حب
لانه ممكن يتخيل بطلة ف خياله و حتى لو ماكانتش موجودة ف الواقع حقيقى
بس معلش و النبى أنا لما بكتب شعر مش بشرب تلات أربع علب سجاير ( قال يعنى بشرب !!! ) و عمرى أصلا ماشربت فنجان قهوة و لا حتى ف الامتحانات
و عمرى ما هرشت ف شعرى عشان أكتب شعر
تلاقى الراجل هرش ف شعره عشان حاجة تانية !!! لول
يا ابنى الحب مدرسة اتعلموها بقى
حلوة مدرسة دى ؟؟؟؟؟؟؟؟؟؟؟؟؟
بصى يابنتى الحب مش هو اللى اتغير بس الناس هما اللى اتغيرو وظروف الحياة هى اللى اتغيرت زمان كانت الناي فاضية ومش لقية حاجة تعملها غير انها تحب لكن دلواقتى الناي بتجرى ورى اكل العيش ومش طيلان اى حاجة بردوة وكمان بصراحة مفيش بنات تتحب زى بتوع زمان والوفاء والاخلاص والكلام دة كله بقى مش موجوج فى بنات اليوين دول وعلى رأئ انا كلهن خائنات والشريفات منهن لم يجدن فرصة للخيانة وصدقنى لو كانت لقت فرصة مكنتش سابتها وكانت هتخون
عمرو بدر
the man who can make adifference
انا كنت من غير الصحاب صاحب قلق
وكنت عايش ف الحياه ع المفترق
مين اللى قال انك هتقدر تنتفض
من غير ما حد يشد ايدك م الغرق
نروح القسم ؟؟
بلاش تبيعي الميه في حارة السقايين
على فكره انا محامي
وبعدين انتي يا بنتي بتغيري رأيك كل خمس دقايق .. يعني لا الكلمات الجميلة عاجباكوا ولا الصراحه عاجبه
يعني نعمل إيه يعني انا مش عارف
أما عن الناس اللي عاشوا زمان وبيلعنوا زماننا .. أولا شتم الزمن حرام .. بعدين الناس دي المشكلة فيهم هم مش الزمن لان هم اللي مش عارفين يتعايشوا مع الزمن لانهم أخدوا على وضع معين .. كل حاجه بتتغير وإيقاع الحياة بيتغير ..
وبعدين انتي بتسألى كان في زمان أغنية بتقول هزيها بشويش بشويش ؟؟
تصدقي بالله
كان في أمر من كده
عارفه منيرة المهدية ؟؟
السلطانة ؟؟
كانت بتقول في أغنية مشهورة جدا
بعد العشا يحلا الهزار والفرفشة
وكانت بتقول
مافيناش م الزغزغة
والله ده كلام الأغاني القديمة
بزمتك حد الوقتي في بني ادم حتى لو شعبان عبد الرحيم سمع الزغزغة دي في أغنيه هايقول عليها فن هابط
يا بنتي كان في زمان أغاني .. أغنية هابطل السجاير أرقى منها
والله ما بتتريأ
إرجعي للتراث كله
مش تشوفي الحلو وتنسي الوحش
كل زمن فيه كده وكده
وبعدين انا قصدي لما بقول انه بيشرب تلات اربع علب سجاير عشان يكتب كلمتين ان أي كاتب أو شاعر بيتعب فعلا على ما يطلع جمله حلوه الناس تسقف عليها لما تسمعها .. مش كده وخلاص يعني
يللا كفاية عليكي كده النهارده
ازيك يا ايمان انا اول ما شوفتك حسيت انك عقلك كبير وعندك فكر ( احساس وشعور داخلي )
اعرفك بنفسي انا طالب كنت في اللقاء الطلبي ومبروك المركز الثالث
عموما تعليقي علي البوست اولا الحب واحد في كل زمان ومكان وكمان في فرق كبير جدا بين كلمتين :
حب
واعيش الحب
الحب : عمري ما شوفته ولا جربته في حياتي بس شوفته ادامي حالتين
عايش الحب : ده بقا حكايته حكايه مزاجه عالي بالنسبه للطرفين
الولد : بت حلوة اموره استايل رقيقه او زي ما هو عاوز بتقوله بحبك طبيعي لازم يقوله بحبك وغالبا بيبقي شاب تافه عنده نقص في شخصيته .
البنت : عايزة واحد يحسسه بانوثتها ويقعد يقولها كلام لذيذ ويدلع فيها ويجيبلها هدايا
والعلاقه دي فاشلهــ
اما حب زمان زي حب الوقتي
انا مؤمن جدا ان الحب بدايته الجواز مش نهايته الجواز
كل اتنين من اياهم تساله انته بنحبه ليه ولا انتي بتحبيه ليه
تقولك عشان نجوز
ايه اللي بعد الجواز ياااد ولا يا بت
صما بكما عميا
سلام يا ايمان وبهنيكي علي المركز الثالث .
أحمد الهادي دكرنس
سوري يا ايمان حابب تشرفيني في موقعي المتواضع www.elhady.info
تم أفتتاح العدد الأول من مجلة نفسنا
نتمنى منكم زيارتنا
Amr Badr :
ايه مفيش بنات تتحب زى بتوع زمان ده ؟؟؟؟؟؟؟؟
حضرتك بتلغبط على فكرة
يعنى النيك نيم اللى انت حاطه و سكتنالك عليه
" كلهن خائنات و البتاع ده ...... !!!!!" مش كلهم و الله ... يبدو انك بتقع ف أزبلهم !!! عادى يا سى عمرو فرفش و بلاش النكد و عموما الخاين او الخاينة ميستاهلوش اننا نبكى عليهم او انه يأثروا ف حياتنا بعد كده و يعقدونا
و لا ايه يا سي عمرو ؟؟؟؟؟؟؟
بكره ان شاء الله ربنا يوفقك و تتأكد من كلامى
تحياتى ليك
__________________________________
حقى أهرتل :
جميلة أبياتك و كم جميلا لو يبقى الأصدقاء دائما أصدقاء
حقك تهرتل و حقى أهرتل و حق الناس كلها تهرتل و يشرفنى انى أسمع للناس و لو مالوش أى علاقة بالبوست ... أنا برضه ساعات كتير بحب أهرتل ف مدونات الناس
حال الناس كله من بعضه
تحياتى ليك
__________________________________
darsh :
مين حارة السقايين ده ؟؟؟؟؟
حضرتك بتغيظنى انك محامى ؟؟؟؟؟؟
طب مش هتغاظ !!! و بعدين و ماله أنا أعرف لواء قد الدنيا
و اعرف المكوجى و البواب !!! و اعرف ناس بالهبل اذا كنت بتهددنى
و بعدين هوا انا يعنى مش كافية ؟؟؟؟ دا انا كمبيوتر يا ابنى ... ممكن الخبط برمجة دماغك
واغيرلك السوفت وير المخى كله و اخليك تقول حقى برقبتى طبعا حب زمان أجمل بكتيييييييييييير من حب دلوقتى
ههههههههههه
و بعدين مين قال لحضرتك انه الصراحة مش عاجبة ؟؟؟؟؟؟ أنا مبقبلش بغير الصراحة و لو هتودى ف داهية
و بعدين الكذب مالوش رجلين
طبعا انا معاك انه الناس اللى مش عارفة تتعايش مع الزمن بتاعها بيبقى أكيد بتعانى من مشكلة... بس ممكن يكون فيه ناس عارفة تتعايش و كل حاجة و لكن بتحن للزمن اللى قبل كده
أمثالى يعنى
و بعدين ايه مافيناش م الزغزغة ده ؟؟؟؟؟؟؟؟؟
شكلك هتخلينى أغير رأيى و احب الزمن ده و خلاص
عموما هوا ف جميع الأحوال زمانا ده أحسن م اللى بعده و هكذا
الحمد لله على كل شئ
طبعا كل زمن فيه كده و كده و انا معاك جدا ف ده
و على فكرة انا مقتنعة بده تماما بس أنا كنت أقصد انه مساوئ الزمن ده أكتر من مميزاته و اكتر من مساوئ الأزمنة اللى فاتت
شئ طبيعى ميتهيألى لانه فعلا اننا ف عصر التحضر كل شئ بيتغير
لكن ف مسألة المشاعر و العواطف بيتهيألى انها ماينفعش تكون خاضعة لقانون التغير و تكنولوجيا البطة المسلوقة!!! ههههههه
عموما كفاية عليك كده النهارده
__________________________________
أحمد الهادى :
أنا بشكرك جدا ف البداية عن كلماتك الحلوة ... و جميل انه الناس تشوفنى بالشكل اللى أتمناه
صحيح انى مش واخدة بالى كويس من شخصك و مش عارفة أحدد بالظبط
صحيح انت جبت السايت بتاعى منين ؟؟؟؟؟؟؟
هههههه مجرد سؤال خطر على بالى
عموما انت طبعا نورتنى بتعليقك اللى أنا حقيقى استفدت منه خصوصا كلامك بخصوص الفرق بين ان الناس تحب بجد و انها عايزة تعيش الحب و خلاص زى ما بتشوفه ف الأفلام حتى لو كانوا هيعيشوا ده مجرد ف خيالهم
و حتى لو كانوا هيعيشوه غلط
و مش الحب ان الولد يشوف بنوتة حلوة و عسولة - زيي يعنى - هههههه فيحبها .. ده على أساس انه القلب ملك الايدين و بنقدر نوجهه ونقوله حب ده و ماتحبش ده
و مش الحب انه البنت تشوف الولد الوسيم و الجنتل فتحبه لانه الحب عمره ما كان كده
الحب كيميا بين اتنين
بتجذبهم لبعض غصب عن بعض
مش باختيار الانسان يعنى
و مهما حاول الانسان انه يحب اللى قدامه و هوا مش طايقه او مش مرتاحله و حاول يقنع نفسه بانه خلاص بيحبه هيكتشف بعدها انه ماكانش حب
لانه الوضع هنا كان بالاجبار او بالاختيار و ماكانش خارج عن ارادة الانسان اللى هو شرط الحب الحقيقى
بشكرك على مشاركتك المفيدة و أكيد يشرفنى انى أزور مدونتك
تحياتى ليك
عرفت المدونه من خالد وزيزي بعد ما طلبت نسخه من الشعر اللي قولتي عليه :)
أحمد الهادى :
أنا آسفة اذا كنت ضايقتك بسؤالى بس أنا حقيقى كتير بستغرب لما الناس تعرف مدونتى او حتى ايميلى من غير ما اعرفهم فحبيت أستفهم مش أكتر ... و عموما انت تنور مدونتى دلوقتى و بعد كده
تحياتى ليك
_________________________________
مجلة نفسنا
أنا يشرفنى انى أزور مجلتكم
أنا اطلعت عليها بس كانت طلعة قصيرة و أكيد هطلع عليها براحتى بس بعد الامتحانات ان شاء الله
تحياتى ليكم و بالتوفيق دايما
العفو يا ستي ويارب ما يكونش مضايقك يا قمر أني مررتلك التاج
رموز ايه وتشكر ايه ومبروك ايه بس
لالالالا مش عاوزين رموز
خليكي ف تشكر
سلام يا قمر
بيييييب بيييييب انا جه تانى
انا الى مكمنت فوووووووووووق
ورجعت اوضح وجهه نظرى
نبدأ من اول
انا معاكى ان مممكن التيم اوى مش مشايه مع الحب
بس انتى لو تشوفى الناس الوقتى هتحى بالسرعه التيك اوى
يعنى تلاقى الوقتى اتنين بيحبو بعض النهاره و بكره تلاقيهم سابو بعض
و لما تسال يوقلك يعم كفايه عليه كده
انا عارف انك هتقولى ان ده مش حب
بس ده الى بيحصل الوقتى
نقلب الصفحه...سطر
التوضيح التانى
معلش بقى الامتحانات بوظتنى
فى ناس مش كل الناس
تحس انها مهمومه و مش لاقيه تاكل و تقولك
هو انا فاضى احب
بفكرة
ان الحب الصح اخره جواز
و حرام انه يظلم حد معاه فى الحب
حتى لو مش اخره جواز برده كده بيظلمه معاه
لان اخرها الفراق
ولا ايه
اما النوسبا ليا انا فأنا مع حب الماضى
بس خلاص
شيرمين :
لا و الله يا شيرمين مش مضايقة أكيد يا قمر ... انتى تنورينى علطول و لو هيبقى ف ايدك تاج كل مرة
بس باذن الله بعد الامتحانات هرد عليه ان شاء الله و على تاجين كمان غيرهم اتبعتولى و كلكم دفعة واحدة
كلكم عليا و لا ايه ؟؟؟؟؟؟
هههههه دا انا غلبااااااااان
استنينى يا ألذ شيرمين ان شاء الله بعد الامتحانات اواعدك هجاوب التاجات ان شاء الله
اذا عشت يعنى لبعد الامتحانات !!!!! هبقى فسسسسسسسسسس خالص
ياللا ربنا يستر ادعيلى لحسن مفتحتش لسه ولا مادة !!!! قلة أدب بعيد عنك
تحياتى يا قمر
__________________________________
mamado :
يا سلام شعقول يا اولاد (مامادو) جاى عشان يرد عليا !!! انت لسه فاكر يا باشا
ياللا سماح المرة دى عشان الامتحانات
بيب بييييييب انا جاية برضه أكمنت عليك
نهارك فل كويس انك عارف انى هقولك انه ده مش حب
أما بخصوص انه ممكن عشان مش لاقيين ياكلوا فميحبوش على أساس ميظلموش حد معاهم
اوكيه انا معاك ف دى تماما
و لو انى بسمع انها بقت حجة شباب كتير
يعنى تلاقى الواحد يحب و يعلق و يظبط و بعد كده عند الجد حجة الأهبل معيش مادة عشام أتجوز
طب يا ابنى يا ضنايا امال اتهببت ليه م الأول ؟؟؟؟؟؟؟ سكتون بكمون
فعشان كده انا معاك ف انه الشاب اللى عارف انه معندوش القدرة ف انه يتجوز فيخلى عند أهله دم وما يعيشى بقى ف قصة حب و يعملى فيها روميو الحبيب
يعنى ياخدها من قاصرها من الأول
مش بعد كده تكون حجة العبيط و يكون الحقيقة مثلا واحدة تانية ... طب هيكون مثلا منين مش عارف يتجوز و منين يرتبط تانى
صباح الياسمين المزفت الواحد من كتر مابيسمع عن بلاوى كتير بقى متعقد و المصحف
أنا آسفة اذا كنت بغلط فيكم بس أكيد السيئة مابتعمش فاطمن
خصوصا انك مع حب الماضى
تحياتى ليك
ضحكتيني بجد حسستيني ان الدنيا
بقت سعد الصغير
بقى لما واحده تيجي تقول لواحد بحبه تقوله بحبك ياحمار
وهوا ينهق
جامدة ديه هههه
بصي الحب لسه معناه زي ماهو
لسه الخجل موجود لما العيون تتقابل
ولسه صعب كلمة بحبك يقولها حد بسهولة كده
وأقصد كلمة بحبك اللي طالعة من القلب صح لما تجسها بتخرج شايلة قلبك معاك لهم
مش الغلط هو السائد أبدا
ممكن علشان دايما الغلط بيبقى منفر فبناخد بالنا
لكن الحب الصامت اللي لساه بيخجل موجود
لكن بنحسهوش لأنه زي النسمة محدش بيحس بيها غير أصحابه
الحلو لسه موجود المهم إحنا نكون مؤمنين
بوجوده لسه
تحياتي لكِ
وشكرا لضحكة جاءت في وقتها
شوفى يا بنتى أنا معرفكيش شخصيا بس إسمحيلى اقوللك
نقطة عكرة تفسد الإناء
لما النفوس تفسد تفسد وراها الضماير و وراها العقول و وراها القلوب
انا معجب جدا بكلامك و حاسس بكل الحب بتاع زمان و بأتحصر علية بس للأسف ماينفعش أحب بهذة الطريقة لأنى ماضمنش إللى بحبها هتكون زى حالاتك ولا مظبوطة على نظام الالفية التالتة يمكن غنت الوحيدة على النت دلوقتى إللى هتعرفى القصة دى أنا قعدت احب فى زميلتى حوالى7 شهور طبعا على مقاييس زمان وقت قصير المهم لانه حب أفلاطونى و كنت بحلم بيها بجد و بدأت تشغلنى عن كل حاجة فى حياتى بمعنى الكلمة المهم لما وجدت إن السنة الدراسية (سنة رابعة)قربت تخلص تجرأت و كلمتها و تخيلى قالتلى إنت زى اخويا عارفة ليه لانها شافت إن أنا خجول و ده مش عاجبها المهم بقى إن لما أخذت الألم عملت زى أى جهاز كهربائى قديم لما يتخبط يتظبط الصورة اصبحت اوضح و شفت حاجات تانى كتير لو تحبى تعرفيها إبقى شرفينى فى المدونة بتاعتى
http://earsofgold.blogspot.com/
ايه الحلاوه دى يا ايمان موضوع حلو ولزيزوجديد من نوعه بس انا ليه تعليق بسيط على الموضوع انك باين عليكى قبل ما تكتبيه كنتى ببتفرجى على فلم ابيض واسود واتاثرتى بيه اوى اولا يا ايمان انتى كل معلوماتك عن الحب زمان كان من لافلام واكيد مش هيجيبوا فلم البطل والبطله بيضربوا فى بعض اكيد هيحبوا فى بعض ولو على الحب انا تهيقلى مفيش حاجه اسمها حب فى حاجه اسمها اعجباب الحب الحقبقى بيجى بعد الجواز على العموم يا ايمان بطلى تتفرجى على فلم لعبد الحليم وركزى فى المزكره واستغطى كويس وانشاء الله هتصحى تانى يوم هتلقى نفسك كويسه ومفيش افكرا زفت عن الحب ده
هشاااااااااااااااااام
وثاينا يبنتى خلاص اتلغت ان البنت تفضل تبص من بين الشيش والولد ووهوه معدى يقعد يخطف عنيه ويبص لفوق خلاص ديه كانت ايام لاحتلال وانتهت معاه خلاص كل الناس ركبوا شبابيك اونيميتال ولايام دى الولد الى بيبصوا منها والبنات هيه الى بتمشى فى الشارع تبص علينا على العموم يا ايمان ان الحب بتاع زمان ده كان حب ملل ورهاق يعنى انا اجيب للى بحبها لسه ورده واقعد اتمشه على الكرنيش طيب انا من مدينه نصر على ما اولص الكرنيش نكون ضربنا بعض وثانيا ترمس ايه الى هاكلهلها على الكرنيش هيه نقصه عبط
هشام
نهى جمال :
بداية كده انا سعيدة جدا بزيارتك ليا و قد ايه فرحانة انه الموضوع عجبك و انى حسيت بتفاعلك معاه
على فكرة كلماتك جميلة اوى و فيها رومانسية شديدة
خصوصا
الحب الصامت اللي لسه بيخجل موجود
لكن بنحسهوش لأنه زي النسمة محدش بيحس بيها غير أصحابه
بشكر حقيقى على كلماتك لانها فادتنى و أكيد هتفيد أ حد هيقراها
تحياتى ليكى
_________________________________
مجدى الجبالى :
أولا انا بشكرك على زيارتك ليا و لمدونتى
ثانيا انا فعلا مقتنعة جداو معاك ف انه لما النفوس تفسد تفسد وراها الضماير و وراها العقول و وراها القلوب
عشان كده للأسف الدنيا مبقاش فيها أمان كتير عشان الناس اللى فيها اتغيرت للأسوأ
أحزنى حقيقى القصة اللى حكيت عنها و انه رغم انه بنات كتير مابتحبش الراجل الخجول - و ده مش عارفة أسميه ايه !! عبط يمكن !!! - الا نه الانسان الخجول شئ عظيم جدا لانه النبى ف وصفه كان خجول بدرجة العذراء ف خدرها
عذرا انى مش عارفة النص حرفيا
بس الخجل أصلا كل الايمان و مفيش ايمان من غير خجل
و ده برضه من حديث شريف مش هقدر أقوله بالنص عشان مافتيش فيه
و عموما فعلا الانسان مش بيعرف يشوف كويس غير لما ربنا سبحانه و تعالى يبتليه بشئ فيفوق
أنا يشرفنى أكيد أزور مدونتك و اكون صديقة دايما لها
تحياتى
_________________________________
هشام :
انت فعلا مش عاتق
يعنى الموضوع أصلا مش للهزار و بتكلم فيه بجد و باسلوب و اقعى و بعدين تقوللى انتى أكيد كنتى بتتفرجى على فيلم أبيض و اسود
يا أخى حراااااااااام عليك
انت معجوووووون من ايه ؟؟؟؟
و النبى بلا مفيش حب بلا الكلام و النصايح الخطيرة بتاعتك
يا ابنى اتكلم عن نفسك !!!! و بعدين يا سيدى متبقاش تقزقز ترمس مع خطيبتك
و ابقى قزقز سودانى ف جنينة الحيوانات
هههههههههههه
هيبقى شكلكم تحفة
ياللا كفاية عليك كده
أسف يا إيمان جت فيكى نسيت أفتح التعليقات أصل إنت أول تعليق ربنا يرزقنى بيه و كمان عايز أقول لك إن تعليقك كان اغلى تعليق فى حياة المدونة لأنه مش بس الاول ده يمكن يكون الاخير لأنه عقبال عندك يوم 21 يونيو رايح اذود عن تراب الوطن و أحمى الحمى أحمى مصر من الغزاة أل إية الغزاة مهماش قاعدين فيها و على قلبها فى الداخل بس اللى بره هما إللى عايزيين حد يوقفهم , المهم فى الاجازات هحاول أفرغ المواضيع اللى هكون كتبتها على الجبهة فيا ريت تمرى على المدونه و تقريلى الفاتحة ,و انا متشكر على كلامك الجميل ده سواء عندك أو عندى و بالنسبة لوجهة نظرك (عن الوجود يعنى)فياريت تمرى تانى لانى ممسكتش نفسى عن الكتابة
وشكرا أخوكى الشهيد ملازم:مجدى الجبالى
أه نسيت أقولك يوم 21 هعرف إذا كنت هلبس ظابط ولا مجند يعنى يا ثلاث سنوات يا سنة شفتى النكته
مجدى الجبالى :
بداية انا بتأسف انى اتأخرت فالرد لانى بعيد عنك كنت مشغولة جدا ف مشروع التخرج
عقبال عندكم
هههههه
ما هو أكيد انت صحيح خلصت
على فكرة الجيش ده أمر حتمى على كل شاب فاطمن جدا هتلاقى ونس كتييييير
أنا يشرفنى حقيقى تكون صديق لمدونتى و أكون صديقة لمدونتك علطول ان شاء الله حتى لما تروح الجيش هتلاقينى مكمنتة - سايبة كومنت !!! - يعنى لحد ما تقول يا بس
ههههههههه
عموما ما تزعلش نفسك الشباب بيروحوا الجيش و بيتعلموا فيه حاجات كتير اولها الالتزام و اهمها و احلاها الصبر
ربنا يصبرك بقى
تحياتى ليك
اولا مدونتك جميلة جدا ماشاء الله
ثانيا مش هقولك : الحب مشاعر فيها قديمة وجديدة لان بساطة بعتقد انه ميعرفش زمن بدلبل إنه في كل عصر معهود قصة حب معروفة زي انطونيو وكبلو باترا عنتير وعبلي روميو وجوليت واجمل قصة حب اثرت فيا محمود(قطز) وجهاد بس كل اللي هقوله قد الشخص اللي انتي بتختريه هو اللي بيفرق
Post a Comment