النهارده هعلمكم شئ مفيد جدا ينفعكم ف حياتكم المستقبلية !!!!!!!! أصله الجواز ده عامل زى البطيخة
يا تطلع حمرة يا تطلع قرعة !!!
لو طلعت قرعة مفيش مشكلةوقعتى ف شخصية مقرفة ؟؟؟؟؟
كان حاجة تانية قبل الجواز ؟؟؟؟
مش نافع معاه الوش الحلو و بيتأمر ؟؟؟؟؟؟؟؟؟
عمال يقرفك و مش نافع معاه الأدب ؟؟؟؟؟؟؟
و لا يهمك وريله الوش المصدى !!! و ان كان مقرف خليكى أقرف منه !!! و أنا بقى هقولك ازاى تطلعى عينه
و تخليه يلف حولين نفسه
و تخليه يلف حولين نفسهعشان بس يعرف انه كان ف نعمة
و ان كان الزوج عنده استعداد انه تكون الجوازة زى حرب اكتوبر يبقى جابوا لنفسه و ذنبه بقى على جنبه !! مش بيقولوا البادى أظلم ؟؟؟؟
هما يعنى فاكرين ان هما بس اللى يقدروا يطفشونا و يرخموا علينا ...!!! ماشى ماشى أنا هوريهم انه ده بس بمزاجنا
بينا نبدأ الكورس من صباحية ربنا
إليكم البيان التالى
(1)
طبعا جوزك بيبقى ظابط المنبه عشان يصحى يروح الشغل و عنده أمل انه لو ماصحيش انتى تصحيه و تدلعيه و
تعمليله الفطار زى ما عودتيه .. بس طبعا الكلام ده دلوقتى ماينفعشأولا تطفى المنبه و تتخمدى !!!!! و بالتالى هيضيع منه الشغل و يفضالك .. أما بقى اذا كان نايم يحلم بيكى و الكابوس صحاه !!!! فطبعا هيحاول يقومك عشان تحضريله الفطار و انتى طبعا و لا كإنك سمعاه !!! أما بقى اذا كان رخم و هزك عشان يقومك تروحى انتى طبعا مشخرة و تقلبى نومك الناحية التانية !!!!!!!! و افضلى كده تاكلى رز مع الملايكة لحد ما هوا ياكل ف نفسه و ييأس منك
(2)
لما جوزك يروح الشغل و لا تسئلى عليه و لا كإن ليكى جوز أصلا !!!! و اذا اتصل هوا بيكى سيبيه يتفلق !!!! فلفليه يعنى انتى قدها
و قدود (3)
قبل معاد مجى جوزك من الشغل متنسيش تنكشى شعرك و تلبسى أزبل حاجة عندك !!!!!! و مفيش مانع انك تحطى برفان زى الجاز أو أسوأ شوية !!!!!!
(4)
جوزك بيفتح الباب و لسه جاى من الشغل و لا كإنك شايفاه !! و تنحى ف التلفزيون ع الآخر و اذا نده عليكى اديله الطرشة !!!!!!!! و اذا نده تانى معلش تعالى على نفسك شوية - ربنا يصبرك - و قومى شوفيه عايز إيه !!! هوا طبعا هيشوفك هيتسرع !!!!!!!!!! و هينسى هوا كان عايز إيه
(5)
جوزك هيطلب الغدا طبعا انتى محضراه ..... الخضار لازق ف الحلة و رز بطعم الفشار و شوربة بطعم الغسيل المنقوع !!!!!!! و طبعا السلطة بصل و توم و ما تحطيش غيرهم أما بقى البروتين فده موضوع تانى ..... عايزاكى تخليه متفحم !!!!!!! هوا هيشوف الأكل من هنا هيبقى قدامه شئ من اتنين ..... يا يرجع يا ياخدها من قاصرها و يسيب الأكل و ينام
(6)
طبعا لإن جوزك جاى تعبان من الشغل فالمفروض انه هينام و انا بقول "المفروض" لانه ده طبعا مش هيحصل !!!! ...... انتى تجرى ع الغسالة و تشغليها و لو مش معاد غسيل سيبيها تشتغل فاضية مع نفسها !!!!! و اذا عاتبك قوليله : أعمل
ايه اللبس كتير لازم أغسل !!!!! و لانه ساعتها هيضطر يحط مخدة على دماغه عشان ما يسمعش فانتى بقى خليكى مستفزة كالعادة و شيلى كل المخدات من جنبه !!!!!!!!! لو رغم كل اللى عملتيه برضه اتخمد اوعى تسيبيه يرتاح من وشك !!!!! اتبعى كل الأساليب عشان تقرفيه و تصحيه من نومه !!! و طبعا مسيره هيصحى مفزوع(7)
أول ما تلاقيه بيتاوب و لسه مغمض عينيه
تروحى انتى بسرعة جاية ناحية مناخيره و ترشى المبيد الحشرى !!!!!!!!!!!!!! طبعا هيولع فيكى !!!! ........ خليكى كوووووول و باردة زى مية الفريزر !!! و قوليله : ايه يا حبيبى كان فيه دبانة على مناخيرك
(8)
طبعا زى ما انتى عارفة هوا مش محتاج يزور حديقة الحيوانات !!!!!!! خليكى كريمة معاه
و فرجيه ع الغوريلا البنآدمينى !!!!!! اوك ؟؟؟؟
و طبعا طول ما انتى ماشية ف الشقة تكونى رابطة دماغك ببتاعة كده زى 
نينتو الحاجة !!! و تكونى لابسة لبس ما اتغسلش من العصر
نينتو الحاجة !!! و تكونى لابسة لبس ما اتغسلش من العصرالحجرى و يكون هوا نفس اللبس اللى انتى كنستى و مسحتى بيه !!!!!! مفيش مانع طبعا تحطى مكياج زى الأراجوز
(9)
مش صحى خلاص ؟؟؟؟؟؟؟؟ سمعيله بقى نشرة الأخبار اليومية !!! اهرى ودانه متعتقهاش !!! كرهيه ف نفسه و ف اليوم اللى قابلك فيه !!! قوليله على فاتورة الكهربا و التليفون و الغاز و المية و كل الفواتير دفعة واحدة !!!!! احكيله عن الجارة و اصحابك و مامتك و باباكى و اخواتك و العيلة كلها و ما تنسيش حد !!!! و أهم حاجة متنسيش تعكننى على أهله !!!!!!! يعنى لازم كلامك يكون مستفز و ما يخلاش من اللى قلبه يحبه !!!!! يعنى مثلا قوليله : هو انت كده دايما مش نافع ف حاجة !!! – مشفتش منك يوم حلو أبدا ..... و هكذا يعنى !! و ماتنسيش تزمأرى ف وشه و تبرطمى قدامه و لو اتخانق معاكى بهدليه مرمطيه و ياريت لو تديله بوكس !!!!! بس بشرط تكونى متغذية كويس و واخدة كورس رفع أثقال !!!! و ياريت لو تحاولى تقوى أسنانك عشان لزوم العض و كده !!!!!!!
(10)
الليل جه .... طبعا الليل ما يحلاش من غير البصل و التوم !!!!!!! أنصحك بعدد سبعة فص توم تدلقيهم ف معدتك مرة واحدة و تبلعى
بعصير بصلاية !!!!!! دلعى جوزك يعنىو بعد النصايح الخطيرة دى أتمنى تكونى استفدتى !!!!!! انتى بس نفذيها و ادعيلى و ان شاء الله يا طلاق يا قتل !!!!!!!!! أصله مالهاش تالت
و احب أقول لكل زوج مستفز و رخم : كشكشها أحسن هتبقى نهايتك كده
نسيبنا بقى من التهريج و نتكلم جد .......أكيد ما كانش هدفى انى أقول للبنات ازاى يطفشوا أزواجهم حتى و لو كان أزواجهم مقرفين و طالما هما مش بايعين المسألة.. بس حبيت أقول الحاجات دى - و اللى متأكدة ان معظم البنات يعرفوها أكتر ما انا متأكدة من اسمى - بس فيه بنات بتعرفها عشان تتجنبها و بنات بتعرفها عشان تنفذها !!! سو البوست ده عشان ايه ؟؟؟؟؟؟؟
عشان الواحد أحيانا مابيعرفش ايه الصح عشان يعمله غير لما يعرف ايه الغلط عشان يتجنبه ...... لو كل واحدة قدرت تتجنب الحاجات دى و قدرت تقوم بالعكس بتاعها صدقونى هتبقى كل الجوازات ناجحة و طبعا لان لكل قاعدة شواذ ففى جوازات مبتبقاش ناجحة حتى لما تتبع الواحدة كل الطرق اللى ممكن تساعدها على حفاظ حياتها الزوجية ..... و ده لشئ خارج عن ارادتها مثلا ف حالات الرجالة اللى عيونهم زايغة .. بهلوانات أقصد دنجوانات عصرهم و زمانهم دول طبعا مالهمش حل !!! بينطبق عليهم المقولة الصينية الشهيرة : " جوه و بره فرشتلك و انت حالك مايل و ايه يعدلك " !!!!!!! و بالتالى فعلى رأى المقولة اليوغسلافية : ابعدى عن الشر و غنيله
و فيه نوع تانى من الرجالة مستحيل العيش معاه برضه و هوا الرجالة اللى ما بيتمرش فيهم ( الصنف الجاحد يعنى ) ده برضه بيعيه بشلن !!! و أهم حاجة ما تزوديش عن شلن
الخلاصة : الكورة ف ملعبك انتى .. بإيدك تشوطيها و بإيدك تسيبيها واقفة مكانها .. يعنى ايه ؟؟؟؟
يعنى المفروض تكونى انتى البداية لكل بداية .... اذا حققتى هدفك يبقى الحمد لله و اذا ماحققتهوش يبقى برضه الحمد لله عملتى اللى عليكى و ارتحتى من تأنيب الضمير
بس ده طبعا مش معناه انه الراجل مالوش دور او انه دوره أقل منك ف الحفاظ على حياة زوجية ناجحة
لانه أى علاقة عشان تنجح محتاجة عوامل مساعدة من الاتنين .... و حطوا مليووووووووون خط تحت كلمة " الاتنين " لانه طرف واحد مخلص عمره ما كان كفاية .............. ادعوا ربنا يجعل جوازاتنا جميعا ناجحة
إيمان
39 comments:
البوست عجبنى جدا وفى منتهى خفة الدم
وفعلا كلامك كله صح ويا ريت الستات يقروه ويتعلموا
بس للاسف انا جوزى من النوع بتاع اللى عينه زايغة يعنى مش نافع معاه حاجة
تحياتى على المدونة وألف مبروك
وأهلا بيكى فى اسرة المدونين الجميلة
Hahahahahahahahahah
ايه الكلام ده يبنتى انا بقيت خايف عليكى والله وخايف على البتنجنات الى بيقراوا الكلام ده ةكله هيجى على دمغكم بعدين انا لو مراتى لقدر الله عملت كده مش هرد عليها انا بنصح اى راجل مراته عملت او بتفكر تعمل كلام ايمان انه ميوسخش ايديه كفايه عليها الجزمه الى فرجليه ولو كانت غليه يبقى يستخدم المقشه سعتهاوانا لو مراتى عملت معايا كده هروح اتجوز عليها واحده تنيه وتبقى هيه تعض فى الارض وسعتها هيه الى هتبقى طفشت وهترجع زى ... ..... تشتغل زى زمان ورجليها فوق رقبتها او ممكن تبقى تروح تساعد امها فى البيت
هشام
لاحول والله قوه الا لله مش باين عليكى الكلام ده يايمان الى يشوفك فى الكليه قول البنت دى هتبقى ست بيت مطيعه وطيبه اوى وهتتجوز واحد امه دعياله بس الكلام ده جيباه منين
ايه الصور الحلوه الىانتى حطاها دى تعرفى انا عارف ليه دلوقتى مبقتش احب اروح حديقه الحيوانات عشان كل يوم تقريبا بشوفك فى الكليه...lolعلى عموم يا ايمان نوضوع حلو اوى بس بليز خفى شويه عننا بجد يا ايمان انتى اطيب انسانه شوفتها فى الكليه دى وبجد بعزك موووووووووووووووووت ومش معتقد انى هلقى صديقه طيبه كده زيك
هشام
:ياسمين
بشكرك بجد على زيارتك لمدونتى و على مدحك ليها و ياريت كنت أقدر أوصل صوتى لجميع البنات علشان يقروه بس مش علشان ينفذوا الحاجات دى بس علشان ياخدوا بالهم منها و ما يعملوهاش
بشكرك تانى و أتمنى تكونى صديقة دايمة لمدونتى
تحياتى
:الحصان الاسود
هههههههههههه طبعا مظبطاكم ع الآخر !!! أى خدمة
تحياتى
: هشام
بداية كده حضرتك خايف عليا و لا خايف منى ؟؟؟؟؟؟ طبعا خايف لشريكة حياتك تقرا الموضوع ده و تروح انت ف خبر كاااااااان !!!!!! و بعدين هيا لو مراتك - بالكلام ع المستقبل اذا هيبقى فيه يعنى !!! - لو عملت معاها الحاجات دى و لو فكرت حتى انك ترخم عليها بيتهيألى أى واحدة مكانها لو انت رفعت الجزمة او المقشة قدامها مش هتلاقى غير الشاكوش على نفوخك !!!!!! و ابقى الحق بقى !!!! هههههههههه أو ممكن تبقى اليوم اللى بعده تعمل حسابها ف الأكياس !!!!! و بعدين بقى حضرتك قصدك ايه بالنقط اللى بتكتبهادى ؟؟؟؟؟؟ المفروض بقى انى أحزر مش كده ؟؟؟؟ و لا بتحذفها عشان الرقابة ؟؟؟؟؟؟ نهارك شكله مطين و شكلى هخرب بيتك ف الكلية
بخصوص تعليقك التانى و اللى مش عارفة ازاى بقدرة قادر بتكتب كلام يعكنن و بعدها بدقيقة تقول كلام حلو - سبحان الله - طبعا ماعدا انك مش محتاج تزور حديقة الحيوانات ده على أساس يعنى انى منهم و لا ايه ؟؟؟؟؟ سبحان الله القمر ده تقول عليه كده ؟؟؟
ههههههههه
و سعت منى شوية ؟؟؟ مفيش مشكلة لو الشارع ضيق نوسعه
و عموما بقى دى مش كلمتى ده كلام أى حد غيرى :D
اتغاظ بقى
ولع
لأ أكتر
ايه ده ايه ده ؟؟؟؟ معقوووووول بعد الكلام المهبب ده تقولى انى طيبة ؟؟؟؟؟
و لسه انت شفت حاجة من طيبتى :D
ههههههههههه
انت برضه طيب جدا يا هشام و محترم جدا و ما اعتقدش برضه هلقى صديق أحسن منك
احرجتينى بكلامك ده ايوه كده حسسينى انك ايمان الى انا عرفها ولا انتوا متجوش غير بالجزم
هشام
بنسبه للنقط لو كملتى المثل هتعرفيه
هترجع زى الكلب طبعا الكلام ده مش لكل البنات الكلام ده للبنات الى هتسمع كلام ايمان
هشام
هههههههههههههههههه
في طرق تانية إذاي تعرفي عريسك من طؤيقة أكلته من قبل ما تتجوزيه وتكتشفي الحقيقة المرة
سلام يا قمر
اية يا ايمان هي كل مواضيعك كدة
طيب البوستين اللي فاتوا وقلت ماشي
لكن شكلك ناوية تستمري
لا جمعية يا رجال العالم بدأت تاخد وضعها
الله الله احنا فينا من كده دا الواحد يخاف على نفسه
بس انا لو ميراتى عملت كده دا لو اتجوزت اساسا
صدقينى الاحكام العرفيه هتنزل و بمنتها البرود هسيب لها البيت عشان تشغل الغساله برحتها ها
و واخلع واعيش
وو بيقى زنبها على جنبها
هشام
ايه ده يا هشام ده ؟؟؟؟؟؟ حضرتك بتشتم البنات علنى !!!!!! و بتقولى كمان انتوا ما بتجوش غير بالجزم !!!!!! ماشى ماشى
كذا مرة أقولك ما تنساش البفتة لما تيجى تاكل !!!!! قال انت ترخم عليا
قال
تحياتى
shermen
هههههههههه و ماله ممكن برضه أبقى أكتب ف الموضوع ده .. بينى و بينك أنا كنت ناوية أكتب ف الموضوع ده بس بالنسبة للبنات مش للرجالة بس زيادة الخير خيرين !!!!! أتمنى أشوفك ف مدونتى تانى
تحياتى
أحمد العربى
ههههههههه ليه كده يا أحمد ؟؟؟؟ ما انت كنت كويس !!!!! لالا خلاص آخر مرة بس بلاش موضوع يا رجال العالم ده .. أوعدك انى هغير شوية و اكتب ف البتنجانات
تحياتى
crazy-boy
أنا بدأت أخاف و الله بقى هوا الموضوع كده تسيبلها الشقة و تمشى !!!! لأ بجد عيب عليك سيبها تطفشك و خد فيها ثواب !!!! ههههههههه
و الله العظيم أنا ما أقصد الشئ الوحش ف الموضوع بالعكس أنا بنصح البنات مايعملوش الحاجات دى .. و عموما مفيش واحدة بترخم غير لما تلاقى جوزها رخم !!!!!!صح و لا مش صح ؟؟؟؟؟ طبعا الرد المتوقع لأ مفيش واحد بيرخم غير لما تكون مراته رخمة .. اوكيه صح برضه.. طب و بعدين ؟؟؟؟ ايه الحل ؟؟؟؟
كل واحد يعامل التانى بما يرضى الله
ياللا شد حيلك و اتجوز بقى و خليك مطمن ع الآخر
تحياتى
شريف
ايه ده يا شريف ده ؟؟؟؟؟ حرام عليك و الله ... انا فظيعة ؟؟؟ ليك حق ما انت متعرفنيش ... و الله أنا بيتهيألى انه لو حد من اللى بيقرا كلامى و شافنى مش هيصدق انه أنا اللى كاتبة ده !!!!! يا ابنى أنا زى النسمة !!!!! صحيح ساعات بتقلب على رياح بس عادى عادى و الله بتحصل ف أحسن العائلات !!!! بس و النبى بلاش حكاية ربنا يكون ف عون اللى هيتجوزنى لحسن الناس تصدق و لا حاجة !!!!! عمرها ما اتقالتلى و الله غير ف الهزار .. أتمنى بقى تكون بتهزر :D
و الله أنا اصحابى لحد دلوقتى بيحاولوا يستوعبوا انى أنا اللى بكتب الكلام ده !!!!!!! فما يغركش الكلام اللى بكتبه يعنى ده شوية تفاريح عشان العيد وكده
هوا صحيح بقى فيه عيد قريب ؟؟؟؟؟؟
تحياتى
ههههههههههههههههههههه
ده تحريض ده ولا ايه
بس الحمد لله لسه محدش هيطفشني
هع هع هع هع
تحياتي
9rold
ههههههههههه
بداية كده انا مش عارفة أكتب اسمك و لا حتى أقراه !!!!! ليه كده بس مش عارف تختار اسم أصعب من كده ؟؟؟؟؟
ده مش تحريض خالص مالص لا سمح الله أنا وش ذلك
مجربتش تطفش ؟؟؟؟ ياااااه ده انت مسكين أوى ؟؟؟؟ احمد ربنا و ادعيله يدومها عليك نعمة
احنا نبوس ايدنا وش و ضهر
أتمنى اشوف كل اللى زارونى ف مدونتى علطوووول
تحياتى
ايوة كدة
شاطرة
الجري نص الجدعنة برضة
كفاية علي البنات النص
ونصيحة من اخوكي
شيلي من دماغك فكرة حقوق المراة والكلام الكبير ده
ماما سوزان مش فاضية اليومين دول بتجوز اسم النبي حارصة
وصاينة
ههههههههههههه
بجد بوست هايل فعلا الكلام اللى فى الأول يودى للطلاق عدل
وفعلا لازم نعرفه مش علشان نعمله علشان نتجنبه بس نعمل أيه بقى لو الرجل غلس لازم نعمل كده
هههههههههههههههههه
أحمد العربى
ايه ده يا احمد يا عربى ؟؟؟؟؟؟ الجرى نص الجدعنة ؟؟؟؟ ده اللى هو انا ؟؟؟؟؟ لأ عيب عليك !!!! تبهدلنى من تانى بوست ؟؟؟ و يهون عليك العيش و الكفتة ؟؟؟؟؟؟!!!!! طب مفيش بقى كفتة و لا حتى فوووووووول
أشيل من دماغى حقوق المرأة ده انا مبقاش ايمان اذا شيلتها و بعدين و ماله ممكن نلغى العيون العسلى و نشغل العيون الحمرا
استعنا على الرجالة بالله
يا نساء العالم اتحدوا ربنا يلمكم
يا رجال العالم اتهدوا ربنا يهدكم
هههههههههههههههه
ها اقتنعت بحقوق المرأة و لا لسه ؟؟؟؟؟؟
شفتنى بالعين الحمرا ؟؟؟؟؟؟
أجنن مش كده ؟؟؟؟؟؟
تحياتى
________________________________
bosbos
هههههههههههه
يا بوسبوس لو لا قدر الله اتجوزنا شخصية غلسة هيبقى مفيش مانع ساعتها نعلمه الأدب شوية و نشغل الغسالة كل يوم ونشيل مخزون بيروسول لحين الحاجة
يا مامي
هايلة يا ايمان
ممتازة
مدونتك كلها حلوة و استخدامك للصور معبر جدا
انا سعيدة بيكي جدا
ربنا يسعدك
اوروفوار
انا بشكر كل الولاد الى بداوا يجتمعوا معايا فى جمعيه يا ورجال العالم اتحدوابجد ايمان بدات تحرضض البتنجنات علينا وبجد انت لو شوفتوا ايمان دى تلقيها بريقه جدا ده دليل واضح انهم خدعين وانهم ميتخدوش بالمظاهر بيبانوا فى لاول طيبين لغايط ما الفاس تقع فى الراس ويبانوا على حقيقتهم وانا اطلب كل الرجال ان نحافظ على الباقى من رجوليتنا وونجتمع ونقم الحد على ايمان لانها لو استمرت على كده هتخلينا بجد منسواش بصله
هشام
مش عارف اقولك ايه على المدونه كلهاعلى ما انا مبسوط اوى انك بتكتبى الحاجات دى بس بجد بقيت خابف اقف معاكى فى الكليه حاسس انك هطلعى سكينه وتشيلى رقبتى بس بجد يا يمان انتى شخصيه ظريفه جدا وطول الوقت بتضحكى وبجد انا سعيد اوى انى عرفتك قبل ما تشيلى راسى
الى كان صحبك هشام هههههههههههههههههههههههههههههههههههههههههههههههههههههههه
ابقي تعالي عندي بكتب قصة من تأليفي
تعالي أقرأيها
مستنياكي
أحمد العربى :
شكله العين الحمرا عملت شغل جامد أوى
معلش تعيش و تاخد غيرها يا احمد يا عربى
______________________________
bastooka :
متشكرة ليكى و يارب أكون أفدتك من اختك الصغيرة
نصيحة تقولى لجوزك يقرا الموضوع برضه عشان يتعظ و يعرف قيمتك أكتر
_______________________________
هشام :
ماشى ماشى يا هشام
قصدك ان انا منظر بس ؟؟؟؟؟؟
بيبانوا على غير حقيقتهم ؟؟؟؟؟ ده انت أكيد بتتكلم عن نفسك !!!!! صح ؟
أنا هوريك اما وريتك
هجيب سكينة معايا المرة الجاية لما اروح الكلية
و تبقى اتشاهد على روحك
_______________________________
Shermen :
أنا الأول بتأسف ليكى انى اتأخرت ف الزيارة و صدقينى و الله كنت عاملة حسابى هزور مدونتك من يومين بس معلش عموما استنى منى زيارة حالا
و يارب تكونى صديقة دايما لمدونتى
______________________________
:شريف
مش عارفة أشكرك ازاى بجد يا شريف انت بجد طمنتنى انك بتهزر !!!!!! كان هيجيلى حاجة بجد و الحمد لله جات سليمة
أنا فعلا بسمع انه فيه لقاء للمدونين و ساعتها هتبقى فرصة سعيدة جدا انى أتعرف عليك و على كل اللى عرفت مدوناتهم و عرفونى
ويومها هيكون فعلا عيد بفرحة لمتنا الجميلة
جوزك بيفتح الباب و لسه جاى من الشغل و لا كإنك شايفاه !! و تنحى ف التلفزيون ع الآخر و اذا نده عليكى اديله الطرشة !!!!!!!! و اذا نده تانى معلش تعالى على نفسك شوية - ربنا يصبرك - و قومى شوفيه عايز إيه !!! هوا طبعا هيشوفك هيتسرع !!!!!!!!!! و هينسى هوا كان عايز إيه
هههههههههههههههههههههههههههههه
فكرة البوست جميله والهدف منه اجمل
شكرا ليكى
وفعلا المرأه هى اللى عليها الحمل الاكبر فى ان حياتها تبقى جنه وسعاده دايما ولا لقدر الله تبقى تعيسه
ظروف الحياه بتخلى الراجل عصبى او تعبان من الشغل ومشاكله وهنا بييجى دور الزوجه بقى انها تخفف عنه وتشيل منه شويه
وعلى فكره والله الراجل الكويس والصالح مش بينسى ليها مواقفها دى وبيعوضها خير فى حياتها عشان هى دايما واقفه معاه وده المطلوب ان يبقوا الاتنين شخص واحد فى المر قبل الحلو
آسفه للإطاله
وربنا يوفقك
تحياتى لكِ
white angel :
بجد كلامك حلو أوى و فعلا بيعبر عن عقل كبير و ف نفس الوقت بيدينى أمل أو تفاؤل انه ممكن فعلا يكون فيه رجالة بتقدر زوجاتهم و بيقفوا جمبهم .. قليييييل أوى اننا نلاقيهم و يمكن نادرين تماما
بس أنا بجد بشكرك على زيارتك ليا و على فكرة أنا زرت مدونتك حلوة أوى و مواضيعها أحلى و افكارها جميلة
و انا سعيدة جدا بكلامك و تعليقك المفيد جدا لأى بنت
تحياتى
_________________________________
شريف :
ياريت فعلا يكون قريب باذن الله عشان نشوفك و كل أصدقاءنا و انا ان شاء الله اذا عرفت عن ظروف اللقاء ده هبقى أبلغكم و انتوا لو عرفتوا ابقوا بلغونا
و يارب يكون يوم جمييييييل أوى ساعتها
احيانا السخرية تكون اقرب نفعا من الكلام الصرييح وسياسة النقرزة و لفت الانتباه يمكن تكون افيد من الكلام المباشر المظهر للعيوب بطريقة مباشرة احيكى ويالتنا نعمم المفهوم عن اشياء كثيرا بحياتنا ولا نقف على المعنى اللفظى للكلام
زورونا تجدوا ما يسركم
الطائر الحزين :
صحيح فعلا كتير بيكون الكلام المباشر تقيل على النفس و ممل
لكن لما يكون بطريقة غير مباشرة و ملفتة للانتباه بتبقى مؤثرة أكتر و تححق الغرض منه
يعنى مثلا أى حد ف البداية هيقرا العنوان هيقول ايه البنت دى بتقوى البنات على ازواجهم و لما هيقروا الموضوع كله من غير ما يوصلوا للنهاية كانوا هيولعوا فيا !!!! بس الحمد لله انى قدرت أوصل اللى عايزة أقوله بطريقة منبهة للغلط عشان الواحدة تفوق من غير ما اتدخل شخصيا ف حياتها
بشكرك على تعليقك و ردك المفيد جدا و ياريت انه كل الناس ما تاخدش بالمعنى اللفظى للكلام و تحاول تقرا اللى بين السطور
أكيد هزور مدونتك و ده يشرفنى جدا
تحياتى
elpost 7elw moot w damek 5afef gedan ya 3asal w yarab kol elly ye2rah yestafed meno w zay manty 2olty eletnan beykono el2asas mesh wa7ed bas rabana yewafa2ek w yeb3atlek elbany 2adam elly yestahlek w ye7otek fe 3enah w maykonesh (waty) w yera3y rabana feky.
من مده مش بشوفك
ومش بتنزلي جديد
أنتي عندك أمتحانات
عموما ربنا ينجحك
تحياتي يا قمر
hii eman,
leeh bs 7araam 3aleeky eh el3onf dah bs :D
but it was soooooo funny walahy .
princessroyal :
مش عارفة أشكرك ازاى على كلماتك الحلوة و أتمنى فعلا يكون الموضوع عجبك و ربنا يسمع لدعائك ليا و يديكى زيه يارب و يوفقنا للانسان اللى يراعى ربنا فينا .. بشكرك تانى و يارب تتابعينى علطول
__________________________________
shermen :
شكرا يا جميل على سؤالك عنى أنا فعلا كان غصب عنى الفترة اللى فاتت كان عندى بعيد عن الجميع دور برد بهدلنى ايشى زكام و ايشى رشح و شوية سخونية ع الماشى !!!!الحمد لله كنت بروح الكلية بالعافية و انا طبعا مضروبة ميت جزمة عشان الغياب بتاعى مش مستحمل بس مقدرتش و الله انى أكتب البوست بتاعى ع الكمبيوتر لسه و هكتبه ان شاء الله النهارده و باذن الله هنزله الاسبوع ده و استنى منى زيارة قريب جدا
__________________________________
anonymous :
بداية كده ياريت بليز لو تكتبوا اساميكم قبل كل شئ حتى لو مش اسمكم الحقيقى حتى لو كان مستعار !!! بس عشان أبقى مستريحة الكترونيا !!!! و ما انا بشكرك جدا على تعليقك و والله مقصدش أى عنف بس هيا جات معايا كده !!!! و الله صدقينى أو صدقنى أنا قصدى كل خير طبعا دا انا غلبان مووووووووووووووت
:D
واضح ان الرجاله
متبهدله فى كل حته
www.gowwana6.blogspot.com
لاء حرام عليكى بجد ان كيدهن عظيم فعلن:)))
عجبتنى الحته الرومنسيه الأخيره ده فعلن الإتنين ذى ما العصفوره محتاجه جناحين
تحياتى:)
mamado :
ههههههههههه
ليه كده بس ؟؟؟؟ دا انا حتى مدلعاكم
تحياتى
___________________________________
واحدة من الناس :
ههههههههه كيدهن عظيم !!!! طب ده المفروض تدافعى عننا !!! لا لا لا كده هزعل منك و مش هجيب شوكولاتة
تحياتى
يارب اشوفكم علطول ف مدونتى و الكل يارب
ايمان
مدونة زى العسل
لأنسانة زى العسل
دمك خفييييييييييييف اوى
وحلوة اوى الكورسات دى جامدة
بس بجد مش الست هى اللى بتكون لوحدها سسب سعادة البيت او تعاسته
الراجل كمان عليه عامل كبير اوى
....................
بس ياستى لو اتبعنا خطتك دى
لو كان راجل محترم هيطفش
لو كان راجل حدق شوية هيجوز عليها
لو كان قليل الادب هى علقة وانتهى الامر
لو كان بقة عصبى ونرفوز فيها قتل على طول
تحياتى ياقمر
همسات :
انتى بتقولى ان انا دمى خفيف امال انتى ايه بقى ؟؟؟؟؟؟ انتى عسولة و الله و فعلا قلتى اللى ممكن يحصل و بكل بساطة من جانب الراجل انه يتجوز عليها بكل بلاهة او انه يضربها و ساعتها ياويله يا سواد ليله او انه يقتلها و ساعتها الله يرحمنا
هههههههههه
بس فعلا عمره ما كانت الست كافية انها تكون سبب سعادة غيرها و سعادة البيت باللى فيه الا اذا كان على حسابها
و التضحية طول العمر مش شئ سهل أى حد يقدر عليه
أتمنى تكونى قريتى الموضوع اللى قبله لانه بيهم كل بنت و عشان تاخدى بالك كويس
تحياتى يا أرق همسات و أتمنى أشوفك علطول
بلاش افترة ياايمان وارحمي نفسك
خااااااااااااااااااالد هشام
ايه يا باشا خالد ؟؟؟ ايه ارحمى نفسك ده ؟؟؟؟؟؟
لازم يا ابنى أعلمهم
امال
طب بذمتك الموضوع مش مفيد و مهم ليكم و للبنات طبعا ؟؟؟؟؟
تحياتى
الله و الله جميل يا إيمان فيلم الكرتون ده ، بس أحب ألفت نظرك إلى العالم الحقيقي ، يعني مثلا كل اللي قلتيه ده و لا ينفع معانا الرجالة بجد إذا مراتي طفت المنبه و مارحتش الشغل حعطيها علقة تنسيها أساسا هي عملت إيه و حيكون تفكيرها منصب على العلقة فقط ، لقد حاولت جيري الجميلة أن تطبق تعليماتك القيمة و النتيجة إن حياتها تحولت إلى مأساة حتى أنه تفكر بعمل بلوج خاص بها لتشرح مآساتها ، و لما تكون منكوشة الشعر و شبه الغوريلا زي ما قلتي بيعجبني قوي شكلها و بقعد أضحك عليه للصبح و بقضي يوم جميل قوي و أما عن الجميلات فهم في كل مكان ، إذا لم تحترم الزوجة نفسها و عملت بأفكارك الكرتونية ستكون النتيجة إهانة و إستهزاء حتى تشعر بمدى ضآلتها كإمرأة و زوجة و إنسانة ، أما إذا إحترمت نفسها مثل أمي و أمك فسوف تكون هي ملكة البيت بلا منازع و سوف يقوم الراجل بما يلزم لعزها و كرامتها و السبب بكلمة و حيدة إنها تستاهل ، تستاهل الإحترام و التقدير ، أما مدونتك اللذيذة فأرجو أنها لا تتجاوز ما إنشأت لأجله و هي الإضحاك و التسلية دون التطرق إلى العالم الحقيقي.... تحياتي و لك كل الإحترام
Post a Comment